Qulamhüseyn Əlibəyli: "Bu o deməkdir ki, həmin deputatlar rüşvətə qurşanıb və lobbi təşkilatların girovuna çevriliblər"
"Transparency International" təşkilatı Avropa İttifaqını Avropa Parlamenti üzərində nəzarəti gücləndirməyə çağırıb. Qurum bunu onunla əsaslandırır ki, Avropa Parlamentinin deputatlarının bir çoxu Brüssel siyasətinə təsir etməyə çalışan şirkətlərdə yaxşı gəliri olan vəzifələr tutur. Bununla da həmin deputatlar bu yolla Avropa Parlamentinin qərarlarına, Avropa İttifaqınının siyasətinə təsir etməyə çalışırlar.
"Transparency International" təşkilatının dərc etdiyi hesabata görə, Avropa Parlamentinin deputatları, Brüssel siyasətinə təsir etməyə çalışan özəl şirkətlər də daxil olmaqla, belə "yan işlərdən" ildə 8,6 milyon avrodan çox pul qazanırlar. Məlumatlara görə, 705 millət vəkilinin üçdə ikisindən çoxu Brüsselin siyasətinə təsir göstərmək məqsədilə özəl şirkətlərdən pul alır. Tədqiqat müəyyən edib ki, bəzi hallarda Avropa Parlamentinin üzvləri əsas işləri ilə yaxından əlaqəli olan korporasiyaların direktorlar şuralarında otururlar və Avropa Parlamenti ilə müqayisədə daha çox qazanırlar. Düzdür, Avropada qanun deputatın şirkətdə işləməsini qadağan etmir. Ancaq həmin şirkətlər elə şirkətlərdir ki, onlar Aİ-nin siyasətinə təsir göstərirlər. Hətta Rusiya ilə gizli maliyyə əlaqələri olan şirkətlərdə işləyən deputatlar var. Bütün bunlar çox təhlükəli tendensiyadır. Görünən odur ki, AP-də maliyyə maxinasiyaları bir sistemdir.
"Halbuki, Avroparlament ümumavropa maraqlarından çıxış etməli idi"
Sözügedən məsələni "Bakı-Xəbər"ə şərh edən sabiq millət vəkili, hüquqşünas Qulamhüseyn Əlibəylinin fikrincə, məlum araşdırmalar ümumiyyətlə Avropa İttifaqında real vəziyyəti qiymətləndirmək üçün kifayət qədər əsaslı dəlillər yaradır: "Xüsusən də Avropa Parlamenti ilə bağlı. Heç kəsə sirr deyil ki, Avroparlament üzvlərinin əksəriyyəti bu və ya digər lobbi təşkilatlarının, o cümlədən, böyük şirkətlərin təsiri altında fəaliyyət göstərirlər. Azərbaycan dəfələrlə bunun şahidi olub. Yəni Azərbaycanla bağlı məsələlərdə müxtəlif lobbi təşkilatlarını, yaxud da şirkətləri təmsil edən deputatlar daha çox fəallıq göstərirlər. Məqsəd də o olub ki, Azərbaycana qarşı bu və ya digər qərarlar qəbul olunsun. Deməyim odur ki, Avropa Parlamentində qərarların qəbulu mexanizmi ayrı-ayrı şirkətlərin, lobbi təşkilatlarınin əlindədir. Bu o deməkdir ki, həmin deputatlar rüşvətə qurşanıb və lobbi təşkilatların girovuna çevriliblər. Bu dərəcədə bir biabırçı vəziyyət yaranıb. Halbuki, Avroparlament ümumavropa maraqlarından çıxış etməli idi. Bütün Avropanın maraqlarını təmsil edən bir qurum kimi fəaliyyət göstərməli idi. Ancaq Avroparlamentdəki deputatların böyük əksəriyyəti həmin şirkətlərdə çalışdıqları üçün öz fərdi maraqlarını daha çox təmsil etməyə çalışırlar. Daha çox təmsil etdikləri, vəzifədə olduqları Avropa şirkətlərinin maraqlarını təmsil etməyə çalışırlar. Bu da ümumilikdə parlament etikasına, bu təsisat haqqında təsəvvürlərə ziddir. Çünki Avropa maraqları ilə ayrı-ayrı şirkətlərin maraqları bir sıra hallarda toqquşur. Belə olan halda həmin deputatlar böyük şirkətlərin əlində alətə çevrilirlər. Şübhəsiz ki, bütün bunların müqabilində onlara ödənişlər edilir. Bu baxımdan hesab edirəm ki, Avroittifaqda müəyyən yenilənmələr olmalıdır, mexanizmlər formalaşmalıdır. Yoxsa qurum ciddi problemlərlə üzləşəcək".
Vidadi ORDAHALLI
