İlyas Hüseynov: "Prezident İlham Əliyev COP29-dan əvvəl baza prinsiplərinin razılaşdırılmasına dair reallığın olduğunu bildirib"
"Düşünürəm ki, COP29-dan əvvəl Azərbaycanla Ermənistan arasında razılaşmanın, ən azı baza prinsipləri ilə bağlı razılaşmanın əldə olunması tamamilə realdır. Hesab edirəm ki, baza prinsipləri ilə bağlı razılığa gəlmək və sonra məzmunun təfərrüatlarına daha çox vaxt ayırmaq da bir variantdır. Lakin hətta layihə hazır olsa da, düşünürəm ki, bunun üçün hər iki tərəf gərgin işləməli və ola bilsin görüşləri bir gün deyil, bir neçə gün keçirməlidir".
Bu barədə Prezident İlham Əliyev aprelin 23-ü ADA Universitetində "COP29 və Azərbaycan üçün Yaşıl Baxış" mövzusunda beynəlxalq forumda bildirib.
Prezident İlham Əliyevin COP29-la bağlı ADA-da keçirilən beynəlxalq forumda COP29-dan əvvəl Azərbaycanla Ermənistan arasında ən azı baza prinsipləri ilə bağlı razılaşmanın əldə olunmasının tamamilə real olması barədə fikirlərinə Ermənistanın baş naziri Nikol Paşinyan pozitiv, məqbul cavab verib, bildirib ki, Ermənistan və Azərbaycan arasında sülh müqaviləsi noyabra qədər bağlana bilər.
"Bakı və İrəvan noyabr ayına qədər sülh sazişi imzalaya bilər".
O, həmçinin, mayın 10-da Almatıda iki ölkənin XİN rəhbərlərinin görüşünün yekunlarına əsasən irəliləyiş əldə olunacağına ümid etdiyini bildirib.
Məlumata görə, Azərbaycan və Ermənistan xarici işlər nazirləri Ceyhun Bayramov və Ararat Mirzoyan mayın 10-da Qazaxıstanın Almatı şəhərində görüşəcək.
"Paşinyanın son çıxışını biz bu tezisin təsdiqlənməsi kimi anlaya bilərik"
Siyasi ekspert İlyas Hüseynov "Bakı-Xəbər"ə şərhində "Nikol Paşinyan öz sonuncu çıxışında bildirdi ki, noyabr ayına qədər İrəvan və Bakı arasında sülh sazişi imzalana bilər. Bu, əlbəttə ki, sülh yönündə çox mühüm bir açıqlamadır. Hətta düşünürəm ki, bu siyasi şüurların, təfəkkürlərin yenilənməsi baxımından böyük bir bir irəliləyiş hesab oluna bilər. Eyni zamanda çox böyük ehtimallar var ki, bu ilin ərzində Azərbaycan və Ermənistan arasında sülh müqaviləsinin imzalanması mümkündür" - deyə bildirdi.
İ.Hüseynovun sözlərinə görə, ötən iki il məhz elə sülh anlaşmaları, sülh razılıqları və sülh müqaviləsinin imzalanması ehtimalları ilə başa çatdı. "Hər ilin sonunda müəyyən əngəllər, problemlər, tərəddüdlər yaranırdı və nəticədə sülhün əldə olunması qəlizləşirdi, hətta deyərdim ki, mümkünsüzləşdirdi. Bu il də belə bir ehtimallar, çağrışlar var ki, sülh müqaviləsi imzalana bilər. Amma mənə elə gəlir ki, bunun üçün siyasi iradə nümayiş etdirmək lazımdır. Almatıda Azərbaycan və Ermənistan xarci işlər nazirləri görüşəcəklər, vasitəçilər olmadan bu dialoqa çox böyük enerji sərf olunub və əsas məsələ buindan ibarətdir ki, heç bir moderatorun iştirakı olmadan bu görüş keçiriləcək. Eyni zamanda qeyd etməliyik ki, COP29-la bağlı ADA-da keçirilən beynəlxalq forumda da cənab Prezident İlham Əliyev COP29-dan əvvəl baza prinsiplərinin razılaşdırılmasına dair reallığın olduğunu bildirib. Sanki Paşinyanın son çıxışını biz bu tezisin təsdiqlənməsi kimi anlaya bilərik. Amma sərhədlərin delimatiyası və sərhəd təhlükəsizliyi ilə bağlı bütün məsələlər də öz həllini tapmalıdır. Ermənistanda buna qarşı müqavimətin, etirazların olmasına rəğmən düşünürəm ki, may ayının 15-nə qədər bütün problemləri kənara qoymaq mümkün olacaq, hansısa yürüşlər, çıxışlar, etirazlar da buna əngəl ola bilməyəcək. Erməni Qriqoryan kilsəsinin də aktivləşməsini müşahidə edirik. Bu revanşist dalğa kilsəni də artıq işə qoşub, amma çox ümid edirəm ki, sülh meylləri, sülh təşəbbüsləri bu müqavimətin də qarşısını ala biləcək" - deyə İ.Hüseynov qeyd etdi.
İradə SARIYEVA
