Ermənistanda ictimai-siyasi vəziyyət yenə gərgin həddə qalmaqda davam edir. Bunlar fonunda Nikl Paşinyan iqtidarının devrilməsi məqsədilə bu dəfə kilsə aktiv fəaliyyətə keçib. Radikal müxalifət və bəzi kənar qüvvələr də onlara yardım edir.
Məsələni şərh edən Ermənistan parlamentinin hakim "Vətəndaş müqaviləsi" fraksiyasının deputatı Arsen Torosyan qeyd edir ki, bəzi qüvvələr 2026-cı ildə şəffaf şəkildə keçiriləcək seçkilərdə qalib gəlməyəcəklərini bildikləri üçün hakimiyyəti seçkilərsiz ələ keçirmək istəyirlər. Deputat bu fonda Azərbaycanla sərhəddə yerləşən Kirants kəndindən İrəvana doğru başladılan yürüşdən danışıb: "Təbii ki, ölkəmizdə söz və sərbəst toplaşmaq hüququ var. 2018-ci il çevrilişi də bunun olmasına təminat verdi. Bu hüquqlar hakimiyyətə qarşı da həyata keçirilə bilər. Heç bir fəaliyyət mükəmməl deyil. Amma həmin yürüşün kimlər tərəfindən həyata keçirildiyinə baxmaq lazımdır. O qüvvələr anlayırlar ki, şəffaf seçkilərdə qalib gələ bilməyəcklər. Beləliklə iqtidarı seçkilər olmadan ələ keçirmək istəyirlər. Tavuşdan başlayan demarkasiya prosesinə gəlincə, biz onun sərhədlərimizin və dövlətimizin təhlükəsizliyinin təmin edilməsi baxımından əhəmiyyətini dəfələrlə vətəndaşlarımıza izah etmişik və bundan sonra da izah edəcəyik". Qeyd edək ki, Qazaxın kəndlərinin təhvil verilməsi və sülh prosesinin əleyhinə olduğunu bildirən "Vətən üçün Tavuş" hərəkatı Kirants kəndidən İrəvana doğru yürüşə başlayıb. Buna rəğmən, artıq Ermənistan Milli Təklükəsizlik Xidməti və polis əməkdaşları Kirants kəndinə gəlib. Bildirilir ki, kənddə demarkasiya çərçivəsində artıq ölçmə işlərinə başlayıblar. Sakinlərə əraziyə yaxınlaşmaq qadağan edilib. Kirants icmasının rəhbəri Kamo Şahinyan bildirib ki, neytral zonada işləri hələ də davam etdirirlər və ona yaşayış sahələrini daha sonra ölçəcəklərini bildirdilər. Erməni polkovnik Volodya Hovhannisyan baş verənlərlə bağlı bildirib ki, Tavuş istiqamətində 8 mövqe təhvil verilib, növbəti mərhələdə Geqarkunikin 12 kəndi və Qafanın 5 kəndinin sərhədlərinin müəyyənləşdirilməsi istiqamətində addımlar atılacaq: "Qardaşım oğlunun xidmət etdiyi Noyemberyan mövqeyində artıq Azərbaycan bayrağı dalğalanır. Ermənilər geri çəkilib. Söhbət 7-9 kilometrlik hissədən gedir, kilsənin sağında və solunda minalar təmizlənir ki, azərbaycanlılar maneəsiz irəliləsin. Azərbaycan bir güllə belə atmadan Ermənistanın ən güclü müdafiə xətlərindən birini qırdı". Hovhannisyan qeyd edib ki, erməni qoşunlar Geqarkunikdəki mövqelərdən də geri çəklilib: "Hazırda 2020-ci ildən sonra qurulan minalar sürətlə təmizlənir, elə edirlər ki, səs-küy olmasın. Bir də görəcəyik ki, orada Azərbaycan kəndləri salınır. Azərbaycanlılar təkcə Geqarkunikə yox, Masisə də gələcəklər". Bunlar fonunda Erməni Qriqorian Kilsəsinin dini xadimləri sülh əleyhinə fəaliyyətə keçiblər. Sözügedən din xadimləri siyasi tələblər irəli sürür, Azərbaycanla sülh əldə etməyə qarşı çıxır və aşkar şəkildə revanşa və müharibəyə çağırış edirlər. Erməni Apostol Kilsəsinin Tavuş yeparxiyasının nümayəndəsi, arxiyepiskop Baqrat Qalstanyan bu xüsusda daha çox fərqlənir. Paşinyan hakimiyyətinin qatı müxaliflərindən olan arxiyepiskop Baqrat Qalstanyanın rəhbərliyi ilə Kirants kəndindən İrəvana yürüşə başlanıb. Tavuş yeparxiyasının nümayəndəsi qeyd edib ki, yürüş iştirakçıları mayın 9-da günorta İrəvana çatmalıdırlar. Baş verənlərlə bağlı "armenianreport" portalı yazır ki, keşişlərə Rusiya və radikal müxalifət dəstək verir: "Rusiya Ermənistanda o qədər primitiv şəkildə əks-inqilab həyata keçirməyə çalışır, öz əlaltılarını yeni hakimiyyət kimi bizim üzərimizə sırıyır ki, siz bu aksiyanın təşkilatçılarının yaradıcı acizliyinə sadəcə heyrətlənirsiniz. Kremlin cəmiyyətdə heç bir dəstəyi olmayan açıq-aydın uduzanlara "stavka" edərək nəyə ümid etdiyi açıq sualdır. Ancaq görünür, Rusiyanın sadəcə olaraq başqa himayədarları yoxdur. Yalnız bunlar var.
Rusiyapərəst bloger Mika Badalyan qeyd edir: "Mayın 10-da vəziyyəti kökündən dəyişdirəcək və xəyanətkar hökuməti xilas etmək üçün praktiki olaraq heç bir şans qoymayacaq bir hadisə baş verə bilər. Bu, Nikolov hakimiyyətinə ağır zərbə olacaq!". Onu təxribat üçün rupor seçənlər, doğrudanmı, Ermənistanda kiminsə "rus dünyası"nın bu tərəfdarının çıxışlarına uyacağına inanırlar?! Yaxud bu ilin yanvarında Ermənilərin Milli Birlik Partiyasının təsis qurultayında partiyanın sədri seçilən Mihran Poqosyanın indiki Ermənistan hakimiyyəti ilə hesablaşmaq üçün öz səbəbləri var. 2019-cu ildə, yəni "məxməri inqilab"ın qələbəsindən bir il sonra Xüsusi İstintaq Xidməti (hazırda Korrupsiyaya Qarşı Mübarizə Komitəsi) Mihran Poqosyanın ictimai təhlükəli əməllər törətməkdə ittiham olunduğunu bildirib. Xüsusilə, Poqosyan vəzifə səlahiyyətlərindən sui-istifadə edərək, mənimsəmə yolu ilə xüsusilə külli miqdarda əmlakı talayıb və bu, ağır nəticələrə səbəb olub. O, bir çox başqa işlər də görüb. Və ölkədə hamı bunu bilir. Deməli, onun etirazlara dəstək verməsi vətən uğrunda döyüşmək ideyasını gözdən salır. Poqosyanı Kreml aktivləşdirib. Eduard Şarmazanov və Artur Vanetsyan kimi damğalanmış personajlar da döyüşə çıxıblar. Armen Aşotyan əsirlikdən etirazçılara dəstək sözləri göndərir. Bütün bu təxribatın pərdəarxası rolu özünü prosesdə iştirakdan sözlə təcrid etməyə çalışan Robert Köçəryandır. Qalan Serj Sarkisyanın beysbol papağı, köynək və əlində səsucaldanla "Rədd ol Nikol!" dediyini görməkdir. Ancaq "rus ətrini" aktiv şəkildə çaşdıran olayların bu təfərrüatı olmasa belə, arxiyepiskop Baqrat Qalstanyan özünün açıq məqsədinə - taxt-tacın başçısı olmağa can ataraq tamamilə gülünc görünür. O, çoxdan bütün ermənilərin yeni katolikosu, Erməni Apostol Kilsəsinin başçısı olmaq arzusunda idi. Robert Köçəryan isə hakimiyyətə gələcəyi təqdirdə bu işdə ona kömək edəcəyinə söz verib. Deməli, II Qaregin bu şəraitdə nədənsə daha fəal hərəkət etməlidir. Lakin qanuni, demokratik yolla seçilmiş hakimiyyəti aradan qaldırmağa xalqı təhrik etməyə hazır olanların hamısı bizim hamımıza nə təklif edir? Biz Rusiyanın Ermənistana necə biabırçı şəkildə xəyanət etdiyini gördük. Doğrudanmı Kreml bizim xalqın belə qısa yaddaşa sahib olduğunu düşünür? Vladimir Putin Qərbdə legitim prezident hesab edilmir. AŞPA və Avropa Parlamenti bunu açıq şəkildə bəyan edir. Demokratik ölkələrin liderlərindən heç biri Putinin andiçmə mərasiminə gəlməyəcək. Putin özü isə heç bir Qərb ölkəsinə gedə bilməz. O, başa düşür ki, Beynəlxalq Cinayət Məhkəməsinin qərarının qüvvəyə minməsi riski sadəcə olaraq çox böyükdür. Gəlin davam edək. Rusiyanın iştirakına qadağa qoyulan 68-ci Avroviziya Mahnı Müsabiqəsi mayın 7-də açılır. Bundan əlavə, mayın 10-da 87-ci dünya xokkey çempionatı açılır və Rusiyaya da iştirak etməmək üçün qapı göstərilib. İyunun 14-də futbol üzrə Avropa çempionatı açılır, orada Rusiya da olmayacaq. İyulun 26-da isə XXXIII Yay Olimpiya Oyunları açılır, bu oyunda Rusiyadan da idmançı olmayacaq. Bəli, Rusiya yaramaz ölkəyə çevrilib. İndi Kremlin gündəmini təbliğ edənlər isə Nikol Paşinyana qarşı deyil, Ermənistanın demokratik, hüquqi, sivil, avropalı gələcəyinə qarşıdırlar. Təxribatçıların çağırışlarını eşidəndə bu haqda düşünün".
Tahir TAĞIYEV
