Sədrəddin Soltan: "Azərbaycan tərəfinə öz ərazində dini abidələrin qorunması ilə bağlı təklifin verilməsi, yaxud onunla bağlı Azərbayana irad tutulması yersiz və əsassızdır"
ABŞ-ın bəzi ermənipərəst təşkilatları yenə də uydurma məlumatlar əsasında hesabatlar hazırlayıb yaymaqda davam edirlər. Qarabağın Azərbaycanın suveren ərazisi olduğunu və 30 il əvvəl Ermənistanın işğalına məruz qaldığını, hazırda isə azad edilməsi faktını heç cür qəbul etmək istəmirlər.
Bir qayda olaraq, ermənilərin yaratdığı miflər, əsatirlər, "tarixi irs" dezinformasiyasının ardınca gedirlər, reallıqları görməzdən gəlirlər.
Belə qərəzli və obyektivlikdən uzaq təşkilatlardan biri də ABŞ Beynəlxalq Dini Azadlıq Komissiyasıdır (USCIRF). Bu komissiya illik hesabatında ABŞ hökumətini ABŞ Beynəlxalq İnkişaf Agentliyinə, ABŞ-ın Bakıdakı səfirliyinə çağırış edərək, Qarabağdakı ibadət yerlərinin və digər mədəniyyət abidələrinin bərpası, mühafizəsi üçün maliyyə ayırmağa çağırıb. Hesabatda ABŞ hakimiyyətinə tövsiyə olunub ki, Azərbaycanı "Beynəlxalq Dini Etiqad Azadlığı Aktında (IRFA) müəyyən edilmiş dini etiqad azadlığının sistematik, davamlı və kobud şəkildə pozulması ilə bağlı xüsusi narahatlıq doğuran ölkələr siyahısına daxil etsin".
Yalançı erməni irsi davası edən bu təşkilatın yaydığı hesabatda tamamilə absurd fikirlər yer alıb.
"Bu, Qarabağın işğaldan azad edilməsindən sonra Azərbaycana qarşı kin və nifrəti olan qüvvələrin qısqanclığının davamıdır"
Sözügedən təşkilatın yaydıdığı hesabata şərh verən Orta Doğu Araşdırmalar Mərkəzinin sədri Sədrəddin Soltan "Bakı-Xəbər"ə bildirdi ki, bu, ABŞ-dakı erməni lobbisinin, antiazərbaycan qüvvələrin növbəti addımlarıdır. "Bundan əvvəl də Azərbaycanda dini etiqad azadlığının pozulduğuna dair oxşar açıqlamalar verilib. Ancaq Azərbaycan tərəfinə öz ərazində dini abidələrin qorunması ilə bağlı təklifin verilməsi, yaxud onunla bağlı Azərbayana irad tutulması yersiz və əsassızdır. Çünki bu ərazilər 30 ilə yaxın ermənilərin işğalı altında olub, bütün dini, tarixi abidələrə onlar nəzarət ediblər və dağılanını da, sökülənini də onlar edib. Azərbaycan bu torpaqları iki ildən artıqdır ki, azad edib. Ötən bu müddət ərzində də neçə-neçə məscid, kilsə bərpa olunub. Bu, Azərbaycan Respublikasının, Azərbaycan dövlətinin tarixi, mədəni, dini və sair abidəsidir. Yəni buna Azərbaycanın qayğı göstərməsi onun qanunlarında təsbit olunub. Erməni lobbisinin, yaxud erməni tərəfdarlarının, Azərbaycana qarşı olan qüvvələrin bu fikirləri, yardım ayrılması və sair istiqamətində canfəşanlıqları yersizdir. Sadəcə olaraq, bu, Qarabağın işğaldan azad edilməsindən sonra Azərbaycana qarşı kin və nifrəti olan qüvvələrin qısqanclığının davamıdır. Bu tipli addımlar və davranışlar, əksinə, Azərbaycanla Ermənistan arasında başlanmış prosesə zərbə vurur və etimadı azaldır".
S.Soltan qeyd etdi ki, Ermənistan hakimiyyəti sərhədlərin müəyənləşməsinə başlaması və sair bu istiqamətdə addımlar atıldığını göstərməklə Azərbaycana xoşməramlı olduğunu göstərməyə, etibar, etimad qazanmağa çalışır. O hesab edir ki, digər yandan belə qüvvələr əsassız və qərəzli davranışlarla xoşməramlı işlərin üzərinə kölgə salır. S.Soltan vurğuladı ki, bu tipli qüvvələr ilk dəfə deyil Azərbaycana qarşı belə absurd, cəfəng fikirlər səsləndirirlər və belələri heç Azərbaycanın, Qarabağın, Ermənistanın harada yerləşdiyini bilmir, bəlkə də heç Ermənistanın Baş naziri Paşinyanı belə tanımır. "Sadəcə olaraq, bunu Azərbaycana təzyiq elementi kimi daim əllərində alət olaraq saxlayırlar. Bu alətlər də zaman-zaman, yerli-yersiz işə düşür. Ənənəvi, 30 il əvvəlki, yaxud ondan da öncəki tezislərlə, köhnəlmiş, boyat bayatılarla çıxış edirlər. Onların nə çıxışları, nə davranışları, nə də açıqlamaları Azərbaycanın gördüyü işlərə xələl gətirə bilər. Bu hesabat Bakıda VI Ümumdünya Mədəniyyətlərarası Dialoq Forumu keçirildiyi vaxt yayılıb. Azərbaycanın dinlərarası və mədəniyyətlərarası dialoqla bağlı tədbirə ev sahibliyi etdiyi dövrdə belə bir hesabatın açıqlanması bu humanitar tədbirin üzərinə kölgə salmaq niyyətindən başqa bir şey deyil"-deyə S.Soltan bildirdi.
İradə SARIYEVA
