Günay Hüseynova: "Ölkə başçısı çox doğru model təklif edir və bu məsələdə avanqard olmağa hazırlığımızı da bəyan edib"
Prezident İlham Əliyev ADA Universitetində keçirilən "COP29 və Azərbaycan üçün Yaşıl Baxış" mövzusunda beynəlxalq forumda çıxışı zamanı iqlim məsələləri ilə bağlı fikir ayrılığının bir səbəbinin də inkişaf etmiş, inkişaf etməkdə olan və zəif inkişaf etmiş ölkələrin məsuliyyəti məsələsi ilə bağlı olduğunu bildirib:
"Bu ortaq məsuliyyət ədalətli olmalı və əlbəttə ki, iqlim problemlərinə mənfi təsir açıq şəkildə müzakirə edilməlidir. Hesab edirik ki, bu əlaqələrə, həmçinin bir çox Avropa ölkələri ilə yaxşı əlaqələrə malik olmaqla biz koordinator və ya körpü rolunu oynaya bilərik. Eyni zamanda, neft və qazla zəngin olan ölkə kimi bu, bizə neft və qaz hasil edən ölkələrlə qarşılıqlı əlaqədə olmaq, neft və qazla zəngin olan ölkələr üçün məsuliyyət platforması yaratmaq imkanını verir. Çünki Azərbaycan da daxil olmaqla, bu ölkələr ciddi addımlar atmalıdır. Biz bunu OPEC+ adlanan platformada artıq nümayiş etdirmişik. Burada hasilatın əlaqələndirilmiş azaldılması neft qiymətlərinin sabitləşməsinə gətirib çıxarmışdır. Biz neft və qaz hasil edən ölkələrin maliyyə töhfəsi üzrə əlaqələndirilmiş səylər göstərməliyik və bu, tamamilə obyektiv olacaq. Biz də bunu etməyə hazırıq".
Göründüyü kimi, Prezident ekoloji tarazlığın bərbasında və digər məsələlərlə bağlı ortaq məsuliyyətin müəyyənləşməsinin zəruriliyini bildirib.
Ekspert Günay Həsənova "Bakı-Xəbər"ə açıqlamasında bildirdi ki, yeni minillikdə ekoloji tarazlığın qorunub saxlanması, təbii ehtiyatlardan rasional istifadə, su, torpaq və atmosfer havasının çirklənmədən mühafizə edilməsi ümumbəşəri problemə çevrilib: "Dünyada demoqrafik artımla yanaşı istehlakın kəskin artması, qlobal istiləşmə, ozon qatının zədələnməsi, təbii ehtiyatların tükənməsi kimi narahatlıq doğuran məsələlər ətraf mühitlə bağlı düşüncə və fəaliyyətlərə də öz təsirini göstərir.
Qlobal ekoloji böhran şəraitində iqtisadiyyat, cəmiyyət və ətraf mühit arasında zəruri balansın saxlanması yalnız inkişafın yeni ekoloji təhlükəsiz və iqtisadi baxımdan optimal modelinin-davamlı inkişafın formalaşdırılması hesabına ola bilər. Dövlətlərin bu məsələdə məsuliyyəti ədalət prinsipi əsasında müəyyənləşməlidir. Çox təəssüflər olsun ki, bir çox ölkələr ekologiyaya cavadehliyi ümumi əsaslarla müəyyənləşdirir. Bəzi beynəlxalq paktlara, müqavilələrə imza atmaqla öhdəliklərini bitmiş sayırlar. Həmin sənədlərə imzanı bütün dövlətlər atır. Bununla kifayətlənmək olmaz. Ölkə başçısı çox doğru model təklif edir və bu məsələdə avanqard olmağa hazırlığımızı da bəyan edib. Dünya ölkələri bu təklifə mütləq reaksiya verməlidir. Çünki bu, bəşəriyyət üçün böyük önəm daşıyan məsələdir. Cənab İlham Əliyevin bu təşəbbüsünü olduqca əhəmiyyətli sayıram".
Məhəmmədəli QƏRİBLİ
