Məlum olduğu kimi, Rusiya Federasiya Şurasının Beynəlxalq Əlaqələr Komitəsinin sədri Qriqori Karasin bu günlərdə Ermənistan parlamentinin sədri Alen Simonyanın İspaniyanın Palma şəhərində Avropa İttifaqı parlamentlərinin sədrləri konfransında səsləndirdiyi bəyanatlarla bağlı Ermənistan parlamentinə məktub göndərib.
Avropa İttifaqı ölkələrinin parlament sədrlərinin konfransında çıxış edən Simonyan "konfransın əsas mövzusunun Rusiyanın Ukraynaya müdaxiləsi və Yaxın Şərq münaqişəsi olduğunu" nəzərə alaraq, Ermənistanın Ukraynanın, həmçinin Moldovanın, Gürcüstanın, Kiprin və bütün ölkələrin ərazi bütövlüyünü qətiyyətlə müdafiə etdiyini təsdiqləmək istədiyini bildirib. Ermənistan parlamentinin spikeri bununla kifayətlənməmiş və bəyan etmişdi ki, Rusiya Ermənistan üçün Azərbaycan qədər təhlükə təşkil edir: "Rusiya təhdid və dezinformasiya kampaniyaları təşkil edir. Narahatlıq doğuran budur ki, Rusiya hökumətinin bir çox vəzifəli rəsmiləri Ermənistana maraqlarını diqtə edir və erməni xalqının adından danışırlar. Bunun parlaq nümunəsi Brüsseldə Ermənistanın baş naziri, Avropa Komissiyasının rəhbəri və ABŞ dövlət katibinin üçtərəfli görüşü ilə bağlı Rusiyanın və Azərbaycanın Ermənistan üzərinə həyata keçirdiyi hibrid hücumudur".
Bunlar fonunda Karasinin məktubunda Ermənistan parlamenti sədrinin çıxışının Rusiya ictimaiyyətinin mənfi reaksiyasına səbəb olduğu qeyd edilir: "Vətəndaşlarımızdan Simonyanın açıq-aşkar anti-Rusiya bəyanatlarının Ermənistan Milli Assambleyasının rəsmi mövqeyini əks etdirib-etdirmədiyini aydınlaşdırmaq üçün çoxsaylı müraciətlər almışıq. Bununla əlaqədar olaraq, Ermənistan parlamentinin sədrinin sözügedən tədbirdə kimin adından çıxış etdiyinə aydınlıq gətirməyinizi, həmçinin onun söylədiklərinin Rusiya ilə Ermənistanın müttəfiqlik münasibətlərinə nə dərəcədə uyğun olduğunu bildirməyinizi xahiş etmək istərdim". Rusiya Federasiya Şurasının sədri Valentina Matviyenko isə senatorlara Ermənistan parlamentinin sədri Alen Simonyanın Rusiya əleyhinə bəyanatları ilə bağlı sorğu hazırlayıb Ermənistan parlamentinə göndərməyi tapşırıb. Matviyenko Simonyanın artıq bütün "qırmızı xətləri" keçdiyini bildirib: "Mən həmkarıma, Ermənistan parlamentinin sədrinə sual vermək istərdim: o kimin adından bu cür süjetlər səsləndirib? Təbii ki, Rusiyanın çoxəsrlik dostluğu olan erməni xalqı adından deyil. Biz bu cür rusofob çıxışı nəzərdən qaçıra bilmərik. Mən Ermənistan parlamentinə yazılı sorğu göndərərdim ki, o kimin adından danışıb və Ermənistan parlamenti bu "sxodka"da səslənən qiymətləri bölüşürmü? Biz bu cür rusofob, anti-Rusiya çıxışı diqqətsiz qoymayacağıq. Sadəcə, həmkarımız üçün ayıbdır ki, o artıq bütün "qırmızı xətləri" keçib". Simonyanın Matviyenkoya cavabı gecikməyib: "Konfransın mövzusu "Rusiyanın Ukraynanı qanunsuz işğalı" idi, təsadüfən onları incitməmək üçün "qanunsuz" sözünü işlətmədim, lakin mənim çıxışımda beynəlxalq hüquqa, onların bəyanatlarına, imzaladıqları sənədlərə zidd heç nə yoxdur. Belarus və Türkiyə də yeni ərazilərin Rusiyaya daxil olmasını tanımır. Eyni zamanda, Türkiyə Prezidenti Krımı da tanımadığını xüsusilə vurğulayır. Mən başa düşmək istəyirəm: gücləri yalnız bizə çatır? Problem ondadır ki, onlar Ermənistanın müstəqil dövlət kimi fəaliyyət göstərməli olduğunu dərk etmirlər. Onların fikrincə, biz hələ də əyalət olaraq qalırıq. Təəssüf edirəm ki, erməni və rus xalqları arasında dostluqdan danışarkən "erməni soyqırımı"nın adı bircə dəfə də çəkilmir. Dostluqdan dəm vuran həmkarlar "ermənilərin soyqırımı"ndan heç nə yazmırlar. Bəs çoxəsrlik dostluq nə oldu?".
Xatırladaq ki, bundan əvvəl də Ermənistanın baş naziri Nikol Paşinyan Almaniyada erməni diasporasının nümayəndələri ilə görüşdə demişdi ki, İrəvan Ukrayna məsələsində Moskvanın müttəfiqi deyil: "Mən çoxdan demişəm ki, bu məsələdə Ermənistan Rusiyanın müttəfiqi deyil. Bu bizim səmimi mövqeyimizdir. Bizim üçün çox ağrılıdır ki, bu situasiyaya təsir edə bilmirik. Ukrayna xalqı bizə dost xalqdır". Ermənistanın baş naziri vurğulamışdı ki, 1991-ci il tarixli Almatı Bəyannaməsi təkcə Ermənistana yox, həm də onu imzalamış bütün keçmiş Sovet İttifaqı respublikalarına, o cümlədən Rusiya və Ukraynaya da aiddir. O demişdi ki, bu sənədi imzalayan respublikalar o vaxt üçün mövcud sərhədləri qarşılıqlı və hamılıqla tanıyıblar. Rusiya Dövlət Dumasının MDB işləri üzrə komitəsi sədrinin birinci müavini, ermənipərəst deputat Konstantin Zatulin isə qeyd edir ki, bu yanaşma fonunda Alen Simonyan Ermənistanın Ukrayna, Gürcüstan və Moldovanın ərazi bütövlüyünü hərarətlə dəstəklədiyi ilə başladı: "Çıxışında o, Rusiyaya hücum edib. Onun sözlərinə görə, Rusiya erməni cəmiyyətini terrora məruz qoyur, daxili işlərə qarışır və indi onlar öz ərazilərində Rusiya kanallarının yayımını qadağan etməyə məcburdurlar. Bu, hakimiyyətin Rusiyaya qarşı formalaşdırdığı münasibətdir". Bunlar fonunda Ermənistanın "Qraparak" nəşri yazır ki, indi radikal erməni müxalifəti Rusiyanın köməyi ilə Paşinyan iqtidarını devirməyə daha çox ümid edir: "Sərhədlərin delimitasiyasından sonra başlanan etiraz aksiyaları müxalifətin ümidlərini daha da artırırb. Əsas təşkilatçısı "Hayastan" bloku olan etiraz aksiyaları davam etsə də, müxalifətin ortaq planı olmadığından, o qədər də geniş vüsət almır. Ermənistanın parlament müxalifətinin 2 qanadı hələ də birləşməyib. Bizə deyiblər ki, dəqiqləşdirilməli olan bəzi məsələlər var. Məlum olur ki, müxalifətçilər hakimiyyətin Qarabağı keçmiş hakimiyyət nümayəndələrinin təhvil verdiyi və hakimiyyət dəyişikliyi olacağı təqdirdə Rusiya ilə Azərbaycanın Ermənistanı boşaldacağı ilə bağlı təbliğatına ciddi yanaşırlar, buna görə də hakimiyyət dəyişikliyi üçün müraciət təqdim etməzdən əvvəl diplomatik kanallar vasitəsilə Rusiyadan aydınlaşdırmaq və Qarabağda baş verənlərin Ermənistanda baş verməyəcəyi ilə bağlı zəmanətlər almaq, sonra radikal mübarizəyə başlamaq qərarına gəliblər".
Tahir TAĞIYEV
