Yadigar Məmmədli: "Bu məsələdə rüşvət amili ilə yanaşı, erməni lobbisi xristian amilindən də sui-istifadə edir"
Çili parlamentinin aşağı palatası - Nümayəndələr Palatası 1915-ci ildə Osmanlı imperiyasında baş verən hadisələri "soyqırım" kimi tanıyıb.
Buna cavab olaraq Türkiyə XİN-i yaydığı bəyanatda Çili parlamentinin Nümayəndələr Palatasının Osmanlı imperiyasının 1915-ci il hadisələri ilə bağlı qərarı rədd edilir və qətiyyətlə pislənilir. Bəyanatda qanunvericilik strukturlarının tarixi proseslər və hadisələr üzrə hər hansı hökm çıxarmaq və ya dəyərləndirmək səlahiyyətinə malik olmadığı bildirilir: "Çili parlamentində qəbul olunan sənəd soyqırımı cinayəti və ona görə cəza barədə xəbərdarlıq haqqında 1948-ci il Konvensiyasının tələblərinə ziddir. Buna bənzər qərarlar yalnız səlahiyyətli məhkəmə strukturları tərəfindən verilə bilər".
Burada diqqəti çəkən məqam odur ki, 44 günlük Vətən müharibəsindən sonra ermənilərin, demək olar, ciddi məğlubiyyətə uğradıqları sahələrdən biri bu idi. Yəni heç bir ölkənin parlamentində qondarma "erməni soyqırımı"nın tanınmasına nail ola bilməyiblər. O baxımdan Cili parlamentinin məlum qərarı 2020-ci ildən sonra ilk hadisədir. Ola bilməz ki, ermənilər bu qərarı elə-belə əldə etsinlər. Çox böyük ehtimalla, Cili parlamentində əməlli-başlı korrupsiya yolları ilə deputatları ələ alıblar. Çünki dünya parlamentlərinin yavaş-yavaş qondarma "genosid" mövqeyindən geri çəkildiyi bir vaxtda Çili parlamenti bunu tanıyıb. Ona görə də bu, sırf rüşvətlə bağlı olan məsələdir. Erməni libbisi parlament üzvlərini pulla ələ alıb. Nəzərə almaq lazımdır ki, Çilidə də erməni lobbisi güclüdür və istənilən qərarı qəbul etməkdən ötrü istənilən qədər pul xərcləməyə hazırdılar.
"Dünyadakı erməni diasporu Azərbaycanla sülhə, Türkiyə-Ermənistan münasibətlərinin normallaşmasına qarşıdır"
Sözügedən məsələyə aydınlıq gətirən media eksperti Yadigar Məmmədli də "Bakı-Xəbər"ə açıqlamasında bunun arxasında rüşvət amilinin olduğunu istisna etmədi: "Çili parlamentinin Nümayəndələr Palatasının Osmanlı imperiyasında baş verənlərlə bağlı qəbul etdiyi qərarın siyasi və hüquqi əsası yoxdur. İndiyə qədər bəzi dövlətlər qondarma "soyqırımı" tanıyıblar, amma bunun heç bir əhəmiyyəti yoxdur. Ən azından ona görə ki, bununla bağlı sübutlar yoxdur. Çünki bu, uydurmadır. Sadəcə, ermənilərdən alət kimi istifadə edən dairələr bundan Türkiyəyə qarşı bir siyasi təzyiq vasitəsi kimi istifadə edirlər. Bəli, Vətən müharibəsindən sonra erməniərin bu sayaq fəaliyyəti səngimişdi. Onlar sarsılmışdılar. Çünki qondarma "soyqırımı" əllərində alət edib Qarabağda işğalı davam etdirmək istəyirdilər. Hesab edirdilər ki, qondarma "soyqırım" amili bu yöndə onlara kömək edəcək. Ancaq Vətən müharibəsində qələbəmiz onların bütün bu gözləntilərini darmadağın etdi. Bəlli fasilədən sonra yenidən "soyqırım" oyunlarını aktivləşdirirlər. Çili ilə bağlı məsələ də bundan irəli gəlir. İstisna deyil ki, bu məsələdə rüşvət amili ilə yanaşı, erməni lobbisi xristian amilindən də sui-istifadə edir. Çünki bu, ermənilərə xas hiyləgərlikdir. Uzaq Çilidə olanlar 1915-ci ildə Osmanlıda hansı hadisələrin baş verməsindən xəbərsizdilər. Erməni lobbisi uydurduğu yalanları bu ölkənin ictimai rəyinə sırımaq istəyir. Hazırkı dövrdə Çili parlamentinin Nümayəndələr Palatasının belə bir qərar qəbul etməsi təsadüfü deyil. Bu onu göstərir ki, dünyadakı erməni diasporu Azərbaycanla sülhə qarşıdır. Türkiyə-Ermənistan münasibətlərinin normallaşmasını, iki ölkə arasında sərhədlərin açılmasını istəmir. Ona görə də parlament üzvlərini pulla ələ alıblar. Məqsəd regionda sabitləşmə meyllərini tormozlamaqdır. Ancaq hesab edirəm ki, belə mənfur siyasi kampaniyanın perspektivi yoxdur. Erməni lobbisinin və revanşistlərin planları fiaskoya uğrayacaq".
Vidadi ORDAHALLI
