İrəvan Bakı ilə təbii qaz alışı məsələsini müzakirə etməyə hazırdır. Bunu Ermənistan parlamentinin spikeri Alen Simonyan deyib:
"Fikrimcə, Ermənistan Azərbaycandan təbii qaz alarsa, bu, müsbət hal olar. Bu məsələni müzakirə etməliyik. İndi də Rusiya Federasiyasından aldığımız təbii qazın bir hissəsi Azərbaycan qazıdır".
Erməni rəsminin dediyindən belə nəticə çıxır ki, Ermənistan Azərbaycan qazından istifadə edir. Maraqlıdır, bu hansı razılaşmadır və hansı üsulla həyata keçirilir?
Vüqar Bayramov: "Bu kontekstdə Ermənistana verilən qazı Azərbaycanın İrəvana qaz satması kimi təqdim etmək olmaz"
Millət vəkili, iqtisadçı Vüqar Bayramov "Bakı-Xəbər"ə açıqlamasında bildirdi ki, Ermənistanla Azərbaycan arasında mavi qaz satışı ilə bağlı hər hansı bir anlaşma yoxdur: "Bizim Rusiya ilə mavi qazla bağlı əməkdaşlığımız var. Bu, əvvəlki dönəmlərdə də olub. Bu kontekstdə Ermənistana verilən qazı Azərbaycanın İrəvana qaz satması kimi təqdim etmək olmaz. Bu əməkdaşlıq Azərbaycala Rusiya arasında gedir. Bununla belə, Ermənistan bizim mavi qazımızı almaq niyyəti olduğunu deyib. Əslində sülh müqaviləsi bağlandıqdan sonra müxtəlif istiqamətlər üzrə əməkdaşlıqların olacağı istisna deyil. Ermənistanın istədiyi əməkdaşlığın olması üçün sülh müqaviləsinin imzalanması lazımdır. Bundan sonra nələrsə mümkün ola bilər".
Elçin Qurbanov: "Belə barter əməliyyatları bütün dünyada həyata keçirilir"
İqtisadçı Elçin Qurbanov "Bakı-Xəbər"ə açıqlamasında bildirdi ki, Ermənistan rəsmiləri ilk dəfə deyil belə fikir səsləndirirlər: "Bu plan bir neçə ay öncə Paşinyan və erməni nazir tərəfindən Tiflisdə keçirilən "İpəkyolu" Beynəlxalq Forumunda səsləndirilmişdi. O, sovet dönəmində Ermənistanın qaz təchizatının əsasən Azərbaycan vasitəsilə təmin olunduğunu, həmin xətlərin yenidən bərpa edilməsinin Ermənistan üçün çox əhəmiyyətli enerji projesi olduğunu dilə gətirmişdi. Ölkə Prezidenti cənab İlham Əliyev də Naxçıvanın mavi yanacaqla təchizatının Ermənistan ərazisindən keçməklə yeni qaz xətti çəkilməklə təmin olunmasını iqtisadi cəhətdən daha əlverişli olduğunu öz çıxışlarından birində səsləndirmişdi. Çünki Naxçıvanın İranla mübadilə olunan qaz təchizatı iqtisadi cəhətdən sağ əllə sol qulağı tutmaq kimidir. Cənab prezident bununla yanaşı Ermənistanın da Azərbaycanın potensial qaz alıcısı olmasına etiraz etmir. Amma ilk növbədə siyasi sabitlik üçün sülh müqaviləsi bağlanmalıdır. Bu da sərhədlərin delimitasiyası, demarkasiyası və konstitusiyaya dəyşiklikdən keçir. O ki qaldı Ermənistan parlamentinin spikeri Alen Simonyanın söylədiyinə, onu deyə bilərəm ki, belə barter əməliyyatları bütün dünyada həyata keçirilir. Adına SVOP deyirlər. Biz Rusiyaya satırıq, Rusiya isə bizim üzərimizdən Ermənistana sata bilir. Burada heç bir problem yoxdur. Bu gün İrəvan və Kremlin siyasi münasibətləri hər kəs üçün aydındır. Ermənistan Rus ordusunun tamamilə ərazidən çıxarılmasını və Rusiyadan zəruri asılılıqları aradan qaldırmaq üçün mavi enerji problemini də Azərbaycan vasitəsilə həll etmək istəyir. Bu həm də sülhün davamlılığı üçün çox böyük əhəmiyyət daşıyır. Hesab edirəm ki, doğru yanaşmadır. Azərbaycan 2019-cu ildə "Şahdəniz" yatağının ikinci mərhələsinin işə salınmasından sonra Rusiya yanacağının idxalını dayandırmışdı. 2022-ci ilin noyabrından "Qazprom" SOCAR ilə yeni sazişə əsasən Azərbaycana qaz tədarükünü (ixracını) bərpa edib".
Məhəmmədəli QƏRİBLİ
