Aydın Hüseynov: "İrəvan hakimiyyəti sülh niyyətini bəyan etməklə, bu inkişaf proqramlarında yer ala bilər"
Prezident İlham Əliyev ADA Universitetində keçirilən "COP29 və Azərbaycan üçün Yaşıl Baxış" mövzusunda beynəlxalq forumda bildirib ki, biz Zəngəzur dəhlizi haqqında danışanda, onu təkcə dəmir yolu və ya avtomobil yolu kimi görmürük:
"O cümlədən, onu potensial qaydada əlaqə, kabel kimi də görürük. Çünki elektrik kabellərindən biri Ermənistandan keçərsə ixrac imkanlarımızı artıra bilər. Potensial qaydada o, hətta qaz boru kəməri də ola bilər, çünki bu gün Naxçıvana təbii qazı təchiz etmək üçün biz İranla razılaşmamıza arxalanırıq. Yəni qaz Naxçıvana İran vasitəsilə gedir. Hazırda biz digər boru kəmərini çəkirik. Türkiyədən Naxçıvana gedən kəməri maliyyələşdiririk və o yolla Azərbaycan qazı nəql olunacaq. Lakin bu, sol qulağınızı sağ əl ilə qaşımağa bənzəyir. Əgər o, Ermənistandan keçərsə, hamı üçün faydalı olar və əlbəttə ki, çox xərclərə qənaət etmiş olarıq. Bir çox digər məsələlər də bu cür çözülə bilər. Bilirəm ki, Ermənistan Qara dənizin dibi ilə çəkiləcək kabelə qoşulmaq istəyir, çünki o, əlavə enerji imkanları yaradacaq. Lakin onlar Azərbaycanla münasibətləri səliqə-sahmana salmadığına görə qoşula bilmirlər. Bu səbəbdən sülh sazişi başlanğıc nöqtəsidir".
"Bütün bunların sayəsində 30 illik iqtisadi dalandan xilas olar"
Sözügedən məsələni "Bakı-Xəbər"ə şərh edən millət vəkili Aydın Hüseynov hesab edir ki, Ermənistan sülh sazişi imzalamaqla Azərbaycanın müəllifi olduğu regional layihələrdə yer ala bilər: "Bu gün bölgədə yeni siyasi və iqtisadi reallıqlar yaradan Azərbaycanın liderliyi, təşəbbüskarlığı ilə yeni layihələrin icrasına start verilməkdədir, Yeni İpək Yolunun Orta dəhlizi və "yaşıl enerji" layihələri yaradılır ki, bütün bunların müəllifi ölkəmizdir. Azərbaycan regionun açar dövlətidir və enerji və nəqliyyat koridorlarının çəkilişi Bakı ilə razılaşdırılır. Hazırda regionda yeni mənzərə yaranıb və iqtisadi sabitlik, rifah və inteqrasiya layihələri üçün iradə ortaya qoyulub. Bu prosesdə bütün region ölkələri fəal iştirak etməyə çaılşır. Eləcə də uzun illərdir ki, regional iqtisadi layihələrdən və tranzitlərdən kənarda qalmış Ermənistan üçün də şans yaranıb. Azərbaycan Ermənistanı da regional əməkdaşlıq platformasında yer almağa dəvət edir. İrəvan hakimiyyəti bütün iddialarını kənara qoyaraq sülh içində yaşamaq niyyətini bəyan etməklə, iradə nümayiş etdirməklə bu inkişaf proqramlarında yer ala bilər. Azərbaycan onun üçün əsl şanslar yaradıb. Bunun üçün Azərbaycanla münasibətləri səliqə-sahmana salmaq əsas şərtdir. Bu baxımdan sülh sazişi Ermənistan üçün başlanğıc nöqtəsi ola bilər"
Millət vəkili onu da qeyd etdi ki, Prezident İlham Əliyev məlum fikirləri ilə İrəvana imkanlar açan yolu göstərdi: "Cənab Prezident bildirdi ki, biz Zəngəzur dəhlizi haqqında danışanda, onu təkcə dəmir yolu və ya avtomobil yolu kimi görmürük. O cümlədən, onu potensial qaydada əlaqə, kabel kimi də görürük. Ermənistan konstruktiv mövqe tutmaqla Qara dənizin dibi ilə çəkiləcək "yaşıl enerji" kabelinə də qoşulmaq fürsətini reallaşdıra bilər. Bu dəhliz ona əlavə enerji imkanları yaradacaq, həm də tranzit məkanının bir hissəsinə çevriləcək. Gürcüstan kimi, Azərbaycanın müəllifi olduğu proqramlara qoşulmaqla Cənubi Qafqazda irəliləyən nəqliyyat-enerji, kommunikasiya layihələrində birgə addımlaya bilər. İrəvan bununla da əməkdaşlıq və rifah platformasının üzvü kimi Azərbaycan, Türkiyə üzərindən Avropaya, Asiyaya bağlana bilər. Bütün bunların sayəsində 30 illik iqtisadi dalandan xilas olar".
Vidadi ORDAHALLI
