Şəmsəddin Əliyev: "Ermənistanın bizə qarşı olan iddiası təmin olunmayacaq"
İrqi ayrıseçkiliyin bütün formalarının ləğv edilməsi haqqında Beynəlxalq Konvensiyanın (Ermənistan Azərbaycana qarşı) tətbiqi ilə bağlı iş üzrə Azərbaycanın Beynəlxalq Ədalət Məhkəməsində qaldırdığı ilkin etirazlara dair ictimai dinləmələr aprelin 19-da başa çatıb.
Məhkəmənin saytında bu barədə qeyd edilir ki, aprelin 15-də başlayan dinləmələrdə Azərbaycan nümayəndə heyətinə xarici işlər nazirinin müavini Elnur Məmmədov, Ermənistan nümayəndə heyətinə isə Ermənistanın beynəlxalq hüquqi məsələlər üzrə nümayəndəsi Yeğiş Kirakosyan rəhbərlik edib.
O da qeyd edilib ki, məhkəmə indi öz müşavirəsinə başlayacaq. İlkin etirazlarla bağlı məhkəmənin qərarının tarixi daha sonra bəyan ediləcək açıq iclasda elan ediləcəyi qeyd olunub.
Ümumən, məhkəmə hansı nəticə ilə başa çatdı? Bütövlükdə bunu necə dəyərləndirirsiniz?
"Ona görə də biz beynəlxalq hüquqa dayanaraq davamlı olaraq bu məsələnin üzərinə getməliyik"
Sözügedən məsələni "Bakı-Xəbər"ə şərh edən hüquqşünas Şəmsəddin Əliyev buna bir neçə aspektdən yanaşdı: "Əslində insan hüquq və azadlıqları ilə bağlı, ayrıseçkiliyi qadağan edən bərabərlik hüququna üstünlük verən beynəlxalq konvensiyanın 14-cü maddəsində bununla bağlı müddəalar var. Azərbaycan da bu konvensiyaya tərəfdar çıxıb və ona qoşulub. Azərbaycan Konstitusiyası insanlara dininə, dilinə, rənginə və siyasi baxışlarına görə fərq qoyulmasını imperativ qaydada qadağan edir. Azərbaycan tərəfinin mövqeyi Beynəlxalq Ədalət Məhkəməsində çox aydın şəkildə əsaslandırılıb. Ermənistanın isə Azərbaycana qarşı bu şəkildə iddiası gülüş doğurur. Ən azından, bu konvensiyanın tələbləri ilə uzlaşmır. Həm də hamılıqla tanınan beynəlxalq normalarla ziddiyət təşkil edir. Məsələ ondadır ki, erməni tərəfinin iddialarının hüquqi əsası yoxdur. Ona görə ki, işğala Azərbaycan tərəfi məruz qalıb. Azərbaycanın kənd və şəhərləri dağıdılaraq yer üzündən silinib. Məhkəmənin nəticəsinin necə olacağı ilə bağlı ehtimalım belədir ki, Ermənistanın bizə qarşı olan iddiası təmin olunmayacaq. Burada diqqət çəkən məqamlar ondan ibarətdir ki, sözügedən konvensiyadan sonra 1995-ci ildə milli azlıqların müdafiəsi haqqında cərçivə konvensiyası qəbil edilib. Bu, əlavə təşəbbüslər kimi ehtiva olunurdu. Azərbaycanın iddia qaldırmağa haqqı var. Çünki 30 il ərzində azərbaycanlılara qarşı ayrıseçkilik edilib. İşğal dövründə bir nəfər olsun Qarabağda azərbaycanlı yaşamayıb. Ancaq Azərbaycanda 30 minə qədər erməni vətəndaş yaşayıb. Ermənistanda isə bir nəfər belə azərbaycanlı yaşamır. O üzdən, erməni tərəfinin bizə qarşı iddiası tamamilə çılpaqdır və heç bir hüquqi dayanağı yoxdur. Bu baxımdan hesab edirəm ki, Ermənistan tərəfinin iddiasının nəticəsi olmayacaq. Bu, sadəcə Beynəlxalq Ədalət Məhkəməsinin vaxtını almaqdan başqa bir şey deyil. Ona görə də qarşı tərəfin iddialarının perspektivi yoxdur. Ermənistan isə işğala görə Azərbaycana təzminat ödəməlidir. Ona görə də biz beynəlxalq hüquqa dayanaraq davamlı olaraq bu məsələnin üzərinə getməliyik. Çünki bizim onlara qarşı nə qədər desən faktımız var. O mənada ki, faktlarımız daha çoxdur".
Vidadi ORDAHALLI
