Sahil Kərimli: "Ermənistan yenə də istədiyinə nail ola bilmədi, bundan sonra da ola bilməyəcək"
Qazaxın 4 kəndinin geri qaytarılmasından sonra sərhəddə delimitasiyanın 1991-ci il Almatı bəyannaməsi əsasında aparılması təsdiqləndi. Ancaq Paşinyan hər zaman deyirdi ki, delimitasiya 1974 və 1991-ci ildə SSRİ Müdafiə Nazirliyi Baş Qərərgahının tərtib etdiyi xəritələr əsasında aparılmalıdır.
Belə qənaətə gəlmək olarmı ki, Paşinyan "Baş Qərərgah xəritələri" tələbindən tam imtina etmiş oldu?
Siyasi şərhçi Sahil Kərimli "Bakı-Xəbər"-ə açıqlamasında bildirdi ki, Qazaxın 4 kəndinin qaytarılması ilə bağlı ermənilərlə azərbaycanlılar arasında əldə edilən və gələcəkdə əldə ediləcək razılaşmalardan bəzi nəticələr çıxarmaq olar: "Azərbaycan masada yenə də öz üstünlüyünü qoruyub saxlayır, istədiyinə nail olmaq istiqamətində bütün mümkün variantlardan istifadə edir. Eyni zamanda xüsusi peşəkarlıqla olan diplomatik gedişlər, uzun illər davam edən milli, dövlətçilik maraqlarına əsaslanan qətiyyətli, ədalətli mövqeyimizi qoruyub saxlayırıq. Bu o deməkdir ki, Nikol Paşinyan son dövrlərdə sərsəm və qeyri-real açıqlamaları ilə gündəmə gəlirdi. Artıq Paşinyan da Azərbaycanın bu qətiyyəti qarşısında geri çəkilməli oldu. Yenə də Azərbaycan öz istəyinə nail oldu. Təbii ki, bundan sonra da Azərbaycan haqlı, ədalətli və qətiyyətli mövqeyində dayanacaq. Sülh müqaviləsinin imzalanmasına qədər gedən proseslərdə, həmçinin ondan sonrakı dövrlərdə də Azərbaycanın diqtəsi, irəli sürdüyü təkliflər real olacaq. Azərbaycan gələcəkdə də öz istəklərinə nail olacaq. Biz bu gün qarşımıza qoyduğumuz bütün hədəflərə uğurla nail oluruq. Azərbaycan öz suveren hüquqlarından istifadə edərək şərtlərini irəli sürür və qarşısına qoyduğu hədəflərə çatır. Paşinyan, onun təmsil etdiyi hakimiyyət, Ermənistanın hazırki hərbi-siyasi rəhbərliyi aranı qarışdırmağa, vəziyyəti gərginləşdirməyə, Avropadan, Qərbdən dividend əldə etməyə çalışırdı və Azərbaycanla danışıqlar masasında nəyəsə nail olmaq istəyirdi. Ancaq görünən odur ki, Qərb və Avropa Ermənistana dayaq durmağa, onun istədiyini həyata keçirməyə çalışsa da, buna nail ola bilmədi. Çünki ortada Azərbaycan Prezidenti İlham Əliyevin siyasi qətiyyəti, milli və dövlətçilik maraqlarına əsaslanan siyasətimiz var. Belə olduğu halda Ermənistan yenə də istədiyinə nail ola bilmədi, bundan sonra da ola bilməyəcək".
Hətta NATO Azərbaycanla Ermənistan arasında dövlət sərhədinin delimitasiyasına dair razılaşmaları alqışlayır.
Bunu NATO baş katibinin Cənubi Qafqaz və Mərkəzi Asiya üzrə xüsusi nümayəndəsi Havyer Kolomina deyib:
"Biz sərhədlərin delimitasiyası üçün əsas sənəd kimi 1991-ci il Almatı Bəyannaməsi üzrə Azərbaycan və Ermənistan arasında razılaşmanı alqışlayırıq. Hər iki tərəfin ərazi bütövlüyünün tanınması əsas prinsipdir. Baş katib Yens Stoltenberqin regiona səfəri zamanı qeyd etdiyi kimi, NATO normallaşma səylərini dəstəkləyir".
Belə olan təqdirdə Ermənistandan hansısa yeni tələb irəli sürəcəyini gözləməyə dəyməz.
Məhəmmədəli QƏRİBLİ
