Məhərrəm Zülfüqarlı: "Vəziyyətin bu şəkil alması Makron hökumətinin yürütdüyü düşmənçilik siyasətinin nəticəsidir"
Azərbaycana qeyri-dost münasibəti sərgiləyən və davranışları ilə bütün sahələrdəki əlaqələrimizə zərbə vuran, indiyə qədər görülən xoşməramlı işlərin üsütndən xətt çəkməyi hədəfləyən Fransa hökuməti təhsil sahəsindəki birgə işlərə də kölgə salmaqdadır.
Bilirik ki, Azərbaycanda Fransaya bağlı təhsil müəssisələri var. Bu təhsil müəssisələrinin ziyanla işləməsinə baxmayaraq, Azərbaycan dövləti humanistlik edərək bu müəssisələrin fəaliyyətinin irəliləməsinə dəstək olub. Fransa isə bunun tamamilə əksini edib.
Yayılan məlumata görə, Bakı Fransız Liseyi fəaliyyətini dayandırır.
Bakı Fransız Liseyinin fəaliyyətinin dayandırılması qərarının qəbul edilməsinə əsas səbəblər 10 illik fəaliyyəti ərzində Bakı Fransız Liseyi Təhsil Kompleksinin (BFL) şagird sayının fəaliyyət planında nəzərdə tutulan saydan əsaslı şəkildə aşağı olması, saxlanma xərcləri ilə bağlı çətinliklər, habelə fəaliyyətin iqtisadi cəhətdən səmərəli olmamasıdır. Bu barədə Bakı Fransız Liseyindən KİV-ə məlumat verilib.
Bildirilib ki, Azərbaycan Beynəlxalq Təhsil Mərkəzi İctimai Birliyi (ABTM) təsisçisi olduğu liseyin ləğv olunması haqqında qərar qəbul edib.
Məlumata görə, 320 şagird üçün nəzərdə tutulan məktəb, bu illər ərzində təsisçi tərəfindən təyin edilən hədəfə çatmayıb, 200 nəfərlik baryeri (60 faiz) keçə bilməyib, bu isə öz növbəsində məktəbin rentabelliyinə ciddi şəkildə təsir göstərib və təsisçi öz büdcəsindən hər il BFL-in fəaliyyətinin davam etdirilməsi üçün əlavə xərcləri qarşılamaq məcburiyyətində qalıb. "Qeyd olunanları nəzərə alaraq cari vəziyyətdə BFL-in bundan sonrakı fəaliyyətini davam etdirməsi təsisçi tərəfindən mümkünsüz hesab edilib. BFL-də tədris ilinin iyulun 1-də başa çatacağını nəzərə alaraq şagirdlər təhsil proqramının sonuna qədər təhsillərini davam etdirəcək və ləğv olunma haqqında qərar yalnız iyulun 1-dən qüvvəyə minəcək", - deyə məlumatda bildirilib.
"Azərbaycan Fransanın qərəzli siyasətinə daha sərt formalarda reaksiya verə bilər"
Məsələyə şərh verən AVCİYA-nın vitse-prezidenti, professor Məhərrəm Zülfüqarlı "Bakı-Xəbər"ə bildirdi ki, Azərbaycan dövlət müstəqilliyini bərpa etdikdən sonra əsas istiqamət Qərbə inteqrasiya yolu idi. O qeyd etdi ki, Azərbaycan Respublikası Azərbaycan Xalq Cumhuriyyətinin varisi kimi məhz demokratik yolu tutmalı idi, bu yolu da tutdu, ona görə də biz Avropa Şurasına da, ATƏT-ə də daxil olduq. M.Zülfüqarlı vurğuladı ki, ATƏT-in Minsk qrupu 27 il Qarabağ problemini dinc yolla həll edəcəyinə söz versə də, heç bir nəticə əldə olunmadı. "Qaldı Azərbaycan-Fransa münasibətlərinə, əvvəlki hakimiyyət illərində, Sarkozi hakimiyyəti dövründə müsbət irəliləyişlər vardı, bu barədə də çoxlu faktlar var. Azərbaycanla Fransa arasında münasibətlərin pisləşməsi Makron rejiminin qatı ermənipərəst mövqe tutmasından sonra başladı. Erməni amilindən həmişə Avropa ölkələri qardaş Türkiyəyə, Osmanlı imperiyasına, Azərbaycana qarşı bir vasitə kimi istifadə edir. Müasir zamanda da Makron həmin prosesi çox ifrat dərəcədə həyata keçirməyə başladı. Buna qədər isə Azərbaycan-Fransa münasibətləri normal olub. O dövrdə isə Bakıda Fransız Liseyi açıldı, hətta Azərbaycan Fransa Universiteti yaradıldı. Bu onun göstəricisi idi ki, Azərbaycan başqa Qərb ölkələri ilə yanaşı Fransa ilə də münasibətləri normal qurmaq niyyətində olub. Azərbaycanda indiki dövrdə Avropa Azərbaycan məktəbi də var. Bu özəl məktəblərin fəaliyyəti digər Qərb ölkələri ilə münasibətdə özünü göstərir. Amma Fransanın indiki rəhbərliyinin yeritdiyi düşmənçilik siyasəti məhz ona gətirib çıxardı ki, artıq Fransa bu münasibətini gizlətmədi, öz səfirini Azərbaycandan geri çağırdı. Azərbaycan da buna uyğun addımlar atmağa başladı. Demək istəyirəm ki, münasibətlərin bu cür gərginləşməsinin günahkarı Fransanın indiki hökumətidir"-deyə M.Zülfüqarlı bildirdi.
M.Zülfüqarlı qeyd etdi ki, Bakı Fransız Liseyinin bağlanmasının da məsuliyyətini Makron hökuməti daşıyır. "Bir müəllim kimi, əlbəttə, hansısa bir məktəbin bağlanmasını istəməzdim, orada Azərbaycan uşaqları təhsil alır. Bizə münasibəti yaxşı olmayan ölkənin tarixini, mədəniyyətini, dilini daha yaxşı öyrənməyimiz lazımdır ki, bizim gələcəkdə onlara cavab verəcək kadrlarımız olsun.
Məsələ burasındadır ki, vəziyyətin bu şəkil alması Makron hökumətinin yürütdüyü düşmənçilik siyasətinin nəticəsidir. Azərbaycan hər zaman öz humanist addımları ilə problemin həllinə çalışıb, amma Fransa hökuməti tamamilə başqa mövqe tutub".
M.Zülfüqarlı hesab edir ki, bu gün Makron hökumətinin qərəzli, düşmən siyasətinə cavab olaraq bu lisey fəaliyyətini dayandırır, amma sabah ola bilsin, Fransada hakimiyyətə Azərbaycanla normal münasibət qurmaq istəyən hökumət gəlsin, onda bu liseyin fəaliyyətinin bərpa edilməsi yenidən nəzərdən keçiriləcək. "Bu hadisənin günahı Makrondadır. Bu liseyin şagirdləri də, onların valideynləri də bilməlidirlər ki, bizə düşmən mövqeyi tutan bir hakimiyyətin təmsil etdiyi ölkənin məktəbinin, təhsil müəssisəsinin olması bizdə müsbət əhval yaratmır. Bu müsbət ab-havanın olmamasının da təqsirkarı yenə Makrondur. Əlbəttə, Azərbaycan Fransanın qərəzli siyasətinə daha sərt formalarda reksiya verə bilər".
M.Zülfüqarlı ümid edir ki, Fransada hakimiyyət dəyişdikdən, normal şəxslər hakimiyyətə gəldikdən sonra təhsil sahəsinə də yenidən baxılacaq, amma Makronun hakimiyyətdə olduğu dövrlərdə münasibətlərdə müsbət heç nə gözlənilmir.
İradə SARIYEVA
