G7 Ermənistan-Türkiyə sərhədini açmağa çağırdı - Zəngəzur dəhlizini unutdu...
Tofiq Abbasov: Onların istəyi ondan ibarətdir ki, Ermənistanın inkişafına nəfəs vermək üçün tezliklə Ermənistanla Türkiyəni barışdırsınlar"
"Böyük Yeddilik" (G7) ölkələrinin xarici işlər nazirləri Azərbaycan-Ermənistan münasibətlərinin normallaşması ilə bağlı bəyanatla çıxış ediblər. G7 ölkələri bəyanatda Ermənistan və Azərbaycanı sülh prosesinə sadiq qalmağa çağırıblar:
"Ermənistan və Azərbaycanı güc tətbiq etməmək, suverenlik, sərhədlərin toxunulmazlığı və ərazi bütövlüyünə hörmət prinsiplərinə əsaslanan layiqli və davamlı sülhə nail olmaq üçün sülh prosesinə tam sadiq qalmağa çağırırıq".
Həmçinin, G7 ölkələrinin Azərbaycan və Ermənistan arasında bütün səviyyələrdə, xüsusən müəyyən edilmiş danışıqlar mexanizmləri çərçivəsində gələcək konstruktiv təmasları dəstəkləməyə hazır olduğu bildirilib:
"Ermənistan və Azərbaycanın bir-birinin ərazi bütövlüyünü və suverenliyini tanıdığı 1991-ci il Almatı Bəyannaməsinə sadiqliyin vacibliyini bir daha təsdiqləyirik. Regional əməkdaşlığın genişləndirilməsi və bütün sərhədlərin, o cümlədən Ermənistan-Türkiyə sərhədinin açılmasına çağırırıq".
Göründüyü kimi, G7 ölkələri Ermənistan-Türkiyə sərhədlərinin açılmasına xüsusi önəm verir.
Qeyd edək ki, təşkilatın bu mövzuya həssaslığı regionda sülhün hökm sürməsi nöqteyi-nəzərindən təqdirəlayiqdir. Sual yaranır, bəs niyə G7 ölkələri Azərbaycan əraziləri 30 il müddətində Ermənistanın işğalı altında olarkən, bir dəfə də olsun, suverenliyə hörmət, sərhədlərin toxunulmazlığı və ərazi bütövlüyü prinsiplərini xatırlamır, bu barədə düşünmürdülər?
Siyasi şərhçi Tofiq Abbasov "Bakı-Xəbər"ə açıqlamasında bildirdi ki, biz əgər yeddilərin, fövqəl dövlətlərin güc mərkəzlərinin bəyanatlarına fikir versək, bu yanaşmalardan görərik ki, onların selektiv yanaşmalara, ikili standartlara böyük diqqətləri var və onu təbliğ edirlər: "Aydındır ki, 30 ildir bizim bölgədə gərginlik var və səbəbkarı da Ermənistandır. Bir dəfə də olsun, dövlətlər tərəfindən ona irad bildirən olmayıb. Ancaq Azərbaycanın istəklərini, sorğularını qəribçiliyə salmaqla, Ermənistanı haqlı çıxarmağa çalışırdılar. Nəhayət biz bu problemlərin hamısının yükünü öz üzərimizə götürüb öhdəsindən gəldikdən sonra indi bizi təhdid edirlər. Yaxın Şərqə diqqət edək. İsrail fələstinliləri atəşə tutub, 40 minə yaxın insan tələf olub. Onlardan 7 minə yaxını uşaqdır. Görün, dünyanın səsi çıxır? Yox. Bu o deməkdir ki, onlar islam dünyasını parçalamağa can atırlar. Digər tərəfdən də istənilən qüvvələri müsəlmanları qırmağa, sıxışdırmağa məcbur edirlər. Əlbəttə, mən burda ən böyük günahı Türkiyə toplumunun daxilindəki o ab-havada görürəm. Türkiyə milləti, hakim partiya başda Ərdoğan olmaqla Azərbaycan üçün çox böyük xidmətlər göstərib. Eyni zamanda Azərbaycana çox böyük xidmət göstərən Dövlət Bahçəlinin rəhbərlik etdiyi Milliyyətçi Hərəkat Partiyasıdır. Onların həqiqətən də Azərbaycanla münasibətlərində elə bir vəziyyət formalaşıb ki, bizim qardaşlığımız, etimadımızı möhkəmlədir. Amma Türkiyənin digər toplumu da var. Orada Azərbaycana qarşı bilərəkdən işləyən qüvvələr var. Cümhuriyyət Xalq Partiyası, digər liberal partiyalar, kosmopolot qüvvələr deyirlər ki, Azərbaycanla qardaşlığımız ermənilərlə barışmağa mane olur. Bunu görməmək mümkünsüzdür. Bəllidir ki, Türkiyənin kosmopolit qüvvələri ilk növbədə Qərbin istəklərini nəzərə alaraq, bütün məsələlərdə hərəkətə keçirlər. Azərbaycanla Ermənistanın qarşıdurmasında həmin partiyaların nümayəndələri bir dəfə də olsa Azərbaycana dəstək verməyiblər. Türkiyə cəmiyyətinin bir kəsimi var ki, onun ürəyində erməni sevdası var. Bu da böyük təhlükədir. Xaricdə fəaliyyət göstərən Türkiyə səfirliklərinin personalı ilə bizim nümayəndələr, ictimai xadimlər münasibət qururlar. Bəzi ölkələrdə, o cümlədən Ukraynada Türkiyənin guya "soyqırım" törətməsi ilə bağlı ermənilər hücuma keçmişdilər. Onlar Ukrayna parlamentinin bu məsələdə Türkiyəni məhkum etməsini, qınamasını istəyirdilər. Azərbaycanlıların müraciətindən sonra səfirlikdə Türkiyənin təmsilçiləri buna laqeyd bir münasibət göstərdilər. Bunu ona görə dilə gətirirəm ki, biz milli lider Heydər Əliyevin dövründə dedik ki, türklərlə azərbaycanlılar xaricdə, diaspor təşkilatları səviyyəsində birgə çalışsınlar. Çünki bizim düşmənimiz çox ciddidir. O həm Türkiyənin, həm də Azərbaycanın, eyni zamanda türk birliyi ilə islam birliyinin düşmənidir. Qərb birliyi də ermənilərdən bir alət kimi istifadə edir. Onlar bizim dirəklərimizi laxlatmağa, islam cameəsinin mövqələrini zəiflətməyə çalışırlar. İndi də görürsüz ki, yeni bir termin çıxıb - Qlobal Cənub. Qlobal Cənubun da əsasını təşkil edən islam birliyi, türk toplumudur. Bütün bunların hamısı aydın göstərir ki, Qərb, Avropa İttifaqı, Fransa, Amerika tərəfdən qərəzli bir yanaşma var. Onlar açıq-aşkar bizə düşmənçilik edirlər. Qafqaz bölgəsində, Qafqaz siyasətində onların istəyi ondan ibarətdir ki, Ermənistanın inkişafına nəfəs vermək üçün tezliklə Ermənistanla Türkiyəni barışdırsınlar. Burada Azərbaycanın gözləntiləri ilə sorğuları qəti nəzərə alınmır. Əksinə, onlar bu haqda məlumatlı ola - ola proseslərdə Azərbaycanın mövqeyini sıfırlamağa çalışırlar. Bu isə alınan iş deyil. Biz bilirik ki, Azərbaycan diplomatiyası prezident İlham Əliyevin sayəsində hansı potensialı əldə edib, hansı gücə malikdir. Bizim əldə etdiyimiz böyük uğurlarımız var. Ancaq bunlarla da kifayətlənməyəcəyik. Çünki bizim savaşımız, göründüyü kimi, əbədi bir savaşdır. Bu qonşu çox nataraz, anlaşılmayan, ruhən, mənən xəstə bir qonşudur. Radikalizm, millətçilik, barbarlıq, vandallıq onların qanlarına işləyib. Onlar türkləri, azərbaycanlıları görəndə coşurlar. İlk növbədə biz burada özümüzə bel bağlamalıyıq və bilməliyik ki, onların bizə olan nifrəti ömürlükdür. Belədirsə, biz də gərək güclü olaq, vaxtında və yerindəcə onların cavabını verək".
Məhəmmədəli QƏRİBLİ
