Azər Həsrət: "Dünyanın bütün mütərəqqi kəsimi Fransanın müstəmləkəçilik siyasətinə qarşı çıxmalıdır"
Korsikanın yeni müstəqillik hərəkatı "Nazione"nin yüzə yaxın üzvü və tərəfdarı yanvarın 30-da Korsikanın Bastia kommunasında polis idarəsi qarşısında etiraz aksiyası keçirərək, onun iki fəalının polis tərəfindən həbs edilməsinə qarşı çıxıb. Bu barədə "Corse Matin" nəşri yazıb.
Etirazlara Bastia bələdiyyəsinin üzvləri, o cümlədən bələdiyyə sədri Pyer Savelli, onun müavini Pol Tyeri və gender bərabərliyinə cavabdeh olan bələdiyyə müşaviri Lauda Guidiçelli də qatılıb.
Bundan əvvəl yanvarın 28-də yaradılan "Nazione" hərəkatı "Corse Matin"ə göndərdiyi press-relizdə həbs edilmiş iki üzvünə dəstək verdiyini açıqlayıb və Bastia polis idarəsi qarşısında aksiyaya çağırıb.
"Biz liderlərimizin həbs edilməsini ən sərt şəkildə qınayırıq: qapılar sındırılıb, evlər dağıdılıb, atalar uşaqlarının gözü qarşısında yerə yıxılaraq saxlanılıblar", - press-relizdə deyiir.
"Patriotti"nin Facebook səhifəsində polisin fəallardan birinin evinə vəhşicəsinə daxil olaraq qapıları sındırdığını nümayiş etdirən fotolar yerləşdirilib.
"Bu səhər "Nazione" hərəkatımızın Baş Assambleyasının təsis edilməsinə Fransa dövləti təxribatla cavab verdi. Bu həbslər Fransanın öz xalqı uğrunda mübarizə aparan korsikalılara qarşı 254 illik repressiyasının bir hissəsidir. "Nazione" təxribatlara cavab verəcək!", – nəşr yazır.
Qeyd edək ki, Bastia kommunasındakı etiraz aksiyası zamanı nümayişçilər yeni hərəkata qarşı aqressiv həbs və repressiya üsullarını pisləyiblər.
Aksiyada iştirak edən "Nazione" hərəkatının ərazi şurasının üzvü Jozefa Cakometti Piredda fəalların həbsini qınayıb.
"Təhdid və təxribatlar qəbuledilməzdir. Lakin onlar öz məqsədlərinə nail ola bilmədilər. Biz sakit və qərarlıyıq", - Piredda bildirib.
Öz növbəsində, Korsika İşçiləri İttifaqı (Sindicatu di i Travagliadori Corsi - STC) da "Nazione" hərəkatını dəstəklədiyini bəyan edib: "Paris repressiyaların səviyyəsini artırmaqla Korsikadakı ab-havanı zəiflətmək istəyir. Ölkəmizdə davamlı sülhün bərqərar olması üçün bu çirkin manipulyasiyalara dərhal son qoyulmalıdır".
"Fransanın dinc şəkildə azadlıq tələb edən insanları həbs etməsi..."
Hadisəyə münasibət bildirən siyasi şərhçi Azər Həsrət "Bakı-Xəbər"ə açıqlamasında qeyd etdi ki, ümumiyyətlə, Fransa kimi bir dövlətin XXI yüzildə belə müstəmləkəçilik siyasətindən imtina etməməsi ona başucalığı gətirmir: "Yəni insanlıq, bəşəriyyət elə bir mərhələyə gəlib çatıb ki, bu mərhələdə insan insanın üzərində ağalıq etməməlidir, heç bir dövlət başqa bir ərazi üzərində haqqı olmadan ağalıq etməməlidir, heç bir xalq başqa xalqı ikinci dərəcəli hesab edib onun başı üzərində ağalıq etməməlidir. Amma bunlara baxmayaraq, təəssüflər olsun ki, Fransa dövləti hələ də müstəmləkəçilik siyasətindən əl çəkmək istəmir. Bu isə fransız mədəniyyəti deyilən bir məsələ ilə daban-dabana ziddir. Yəni dünyada fransız mədəniyyəti kimi təbliğatlar aparılır, bunun üstün mədəniyyət olduğu fikri bütün dünyaya aşılanır. Belə mədəni bir xalq, dövlət nə üçün hələ də müstəmləkəçilik siyasətindən imtina edə bilmir? Burada nəsə yerində deyil. Ya onların iddia etdikləri kimi mədəni olmadıqlarını deyə bilərik, ya da mədənidirlər, amma bunu tam olaraq dərk edə bilmirlər. Ona görə də dünyanın bütün mütərəqqi kəsimi Fransanın müstəmləkəçilik siyasətinə qarşı çıxmalıdır. Fransız zülmündən xilas olmaq istəyən xalqlara hər kəs dəstək olmalıdır".
A.Həsrət qeyd etdi ki, Fransa zülmündən xilas olmaq istəyən xalqlara bütün dünya arxa-dayaq olmalıdır. Hər kəsin onların doğrudan da azad dünyanın insanları kimi yaşamasına öz töhfəsini verməli olduğunu deyən A.Həsrət hesab edir ki, fransız polisinin Korsikanın yeni müstəqillik hərəkatı olan "Nazione"nin üzvlərini həbs etməsi bu dövlətin həyata keçirdiyi müstəmləkəçilik siyasəti ilə bağlıdır. "Fransanın dinc şəkildə azadlıq tələb edən insanları həbs etməsi onun özünün bəyan etdiyi demokratiya və azadlıq prinsiplərinə daban-dabana ziddir. Bilirsiz ki, Fransa dövləti qardaşlıq, bərabərlik, azadlıq şüarlarına söykənir. Əgər qardaşlıqdan, bərabərlikdən söhbət gedirsə, azadlıq tələb edən insanları həbs etmək artıq özünün siyasi mövqeyinə xəyanət etmək deməkdir. O baxımdan, fikrimcə, Fransa bu fəalları həbs etməklə bir daha göstərmiş olur ki, bəyan etdiyi prinsiplər sadəcə olaraq gözə kül üfürmək üçündür. Yəni onlar Fransanın söykəndiyi dəyərlər deyil. Sadəcə olaraq, Fransa dövləti bu dəyərlərin arxasında gizlənib, hətta öz nəzarəti altında olan insalara zülm etməklə məşğuldur. Əlbəttə, bu da diqqətə alınmalıdır, digər tərəfdən də Fransanın bu cür davranışlarını nəzərə alaraq BMT Təhlükəsizlik Şurasının daimi üzvlüyündəki yeri sorğulanmalıdır. Artıq elə bir məqam yetişib ki, Fransa BMT Təhlükəsizlik Şurasının daimi üzvlüyündən çıxarılmalıdır. Belə bir dövlət BMT Təhlükəsizlik Şurasında daimi üzv ola və dünyanın taleyinə hökm verə bilməz" - deyə A.Həsrət bildirdi.
İradə SARIYEVA
