Mehman İsmayılov: "Onun Zaxarovaya qaldırdığı səs əslində ermənilərdən yenidən pul qoparmağa, dəstək almağa hesablanıb"
Rusiya Xarici İşlər Nazirliyinin rəsmi nümayəndəsi Mariya Zaxarovanın keçirdiyi brifinqdə Qarabağın erməni sakinlərinə qarşı heç bir etnik təmizləmə aparılmadığını açıqlamasından sonra İrəvanda Leninqrad blokadası uşaqları abidəsinin təhqir olunması kimi vandalizm aktı baş verdi, revanşist qüvvələr həm abidəni təhqir etdilər, həm də Rusiya bayrağını tapdaladılar.
Belə görsənir ki, Zaxarovanın Qarabağda ermənilərin etnik təmizləməyə məruz qalmadığını bəyan etməsi ermənidən çox erməni olmağa can atan, erməni pulu ilə qidalanan Rusiya Dövlət Dumasının deputatı Konstantin Zatulinə yaman bərk yer edib.
Erməni mediası yazır ki, Zatulin Qarabağda etnik təmizləmə ilə bağlı Zaxarovaya cavab verib. Zatulun İrəvanda Leninqrad blokadası uşaqları abidəsinin təhqir edilməsini dəlilik adlandırsa da, Qarabağda ermənilərin etnik təmizləmə faktını sübut etməyi tələb edən M. Zaxarovanın fikirlərinə qarşı çıxaraq iddia edib ki, guya Qarabağda ermənilərə qarşı "etnik təmizləmə" baş verib(?).
Açıq görsənir ki, Zatulin üçün erməni pulu öz dövlətinin rəsmi mövqeyindən çox üstündür.
"Zatulin erməni puluna işləyən, ermənilərə satılan, öz dövlətinin maraqlarını hər zaman ayaqlar altına atmağa hazır olan vicdansız bir varlıqdır"
Məsələyə şərh verən politoloq Mehman İsmayılov "Bakı-Xəbər"ə "Bir müddət əvvəl Zaxarova ənənəvi brifinq zamanı erməni jurnalistin sualını cavablandırarkən "əgər Azərbaycanın Qarabağ bölgəsində ermənilərə qarşı etnik təmizləmə aparılıbsa, lütfən, bizə hər hansı bir fakt və ya hansısa bir tanınmış, ermənilər tərəfindən yüksək qiymətləndirilən beynəlxalq institutun burada etnik təmizləmə aparılması barədə bəyanatını, faktlara əsaslanan sənədləri təqdim edin, ünvanını göstərin ki, o ünvana müraciət edə bilək"-dedi. Əslində, Zaxarova ermənilərə çox kəskin cavab verdi ki, sizin Azərbaycanın Qarabağ bölgəsində ermənilərə qarşı etnik təmizləmə aparılması barədə bütün söylədikləriniz uydurmadır, heç bir sənədə, faktoloji tərkibə, arqumentə söykənmir, yalnız erməni demoqogiyasıdır. Ona görə də, Zaxarova konkret dedi ki, ya bizə sənəd göstərin, ya da bunu təsdiq edən beynəlxalq qurumun ünvanını göstərin, biz onlara müraciət edək. Ermənilər Zaxarovaya qarşı mətbuatda hücumlara başladılar. İrəvanda Leninqrad blokadası uşaqları abidəsi erməni Samvel Şirinyan tərəfindən təhqir edildi. "Leninqradda blokadanın olması barədə sənədlər varmı ki, Qarabağdakı hadisələr haqda da sənədlər olsun" deyən erməni vandalı, erməni vəhşisi Zaxarovaya etiraz yolunu bu cür seçdi. Abidəni təhqir etməsi əslində erməni vəhşiliyinin, vandallığının açıq təzahürləridir. Ermənilər təkcə Leninqradda həlak olmuş uşaqların abidəsini deyil, təkrar-təkrar Holokost qurbanlarının xatirəsini təhqir edirlər, yəhudilərin sinaqoqolarına hücum edib yandırmaq istəyiblər"-deyə bildirdi.
M.İsmayılov qeyd etdi ki, ermənilər, o cümlədən Qriboyedovun abidəsini təhqir ediblər, Qərbi Azərbaycan ərazisində Azərbaycan xalqının tarix boyu qurub yaratdığı bütün dini, tarixi, mədəni abidələri yerlə-yeksan ediblər, 400 məscidimizi, 744 məzarlığımızı dağıdıblar. Quzey Azərbaycanda, Qarabağda onların törətdiyi vəhşiliyin bariz nümunələri göz önündədir. "Bunlar necə məscidləri donuzxanaya çevirməyə cəhd ediblər, dini abidələrimizi necə təhqir ediblər və sair. Bunlar erməni vəhşiliyinin hər zaman ortaya çıxan təzahürləridir.
Zatulin Zaxarovanın məlum sözlərinə alternativ olaraq, guya "Qarabağda ermənilərə qarşı etnik təmizləmə törədilib" deyirsə, bu onun hər zaman söylədiyi vicdansız və ləyaqətsiz ifadələrdən biridir. Zatulin erməni puluna işləyən, ermənilərə satılan, öz dövlətinin maraqlarını hər zaman ayaqlar altına atmağa hazır olan vicdansız bir varlıqdır. O, Azərbaycana qarşı düşmən bir mövqedədir. Onun dilindən Azərbaycanın liderlərinə, klassik siyasətçilərinə qarşı səslənən fikirlər hər zaman bizim ona çox kəskin cavab verməyimizə səbəb olub. O, Azərbaycanın apardığı haqlı siyasətə qarşı hər zaman çirkli kampaniya aparıb. Onun bütün varlığı ermənilərdən pul alıb bütün insani dəyərləri, həqiqəti, ədaləti satmağa yönəlib. Zatulin ermənilərin ən çox alçaltdığı deputatlardan biridir. O hər zaman Azərbaycanın ərazi bütövlüyünə, dövlətçiliyinə qarşı çox açıq şəkildə qanunsuz fəaliyyət göstərib, indi də göstərməkdədir. Qarabağda etnik təmizləmənin olmadığını Putin də, Zaxarova da, Zatulin özü də, bütün dünya bilir. Hər kəs bilir ki, Azərbaycanın 19-20 sentyabrda həyata keçirdiyi lokal antiterror tədbirlərində bir sivilə qarşı belə güc tətbiq edilməyib. Ancaq Zatulin kimi vicdansızlar, satılmışlar, pula işləyən və puldan başqa heç bir dəyərə sahib olmayan bədbəxtlər, mənəviyyatsızlar Azərbaycana qarşı şər kampaniyası aparırlar. Onun Zaxarovaya qaldırdığı səs əslində ermənilərdən yenidən pul qoparmağa, dəstək almağa hesablanıb. O bilir ki, Zaxarova doğru deyir, ermənilərin bu iddiaları boş, cəfəngiyatdır. Bütün dünyanın, kameraların gözü qarşısında ermənilər günəşli havada özləri tərəfindən təşkil olunmuş formada Azərbaycan ərazisini xorla tərk edib. Heç bir etnik təmizləmədən söhbət gedə bilməz. Zatulin kimi vicdansızların antiazərbaycan bəyanatlarına biz artıq adət etmişik. Bilir ki, onun cavabını əsaslı şəkildə veririk və verəsiyik"-deyə M.İsmayılov qeyd etdi.
İradə SARIYEVA
