Yadigar Məmmədli: "Ona görə ki, bununla Ermənistanın yanında olduqlarını göstərirlər"
NATO-nun Cənubi Qafqaz üzrə xüsusi nümayəndəsi Havyer Kolomina erməni mediasına müsahibəsində bildirib ki, onlar üçün Ermənistanla Azərbaycan arasında münasibətlərin normallaşması prosesinin təməlində dayanan ölkələrin ərazi bütövlüyü və suverenliyi prinsipinə riayət etmək çox vacibdir:
"Hesab edirik ki, prosesin əsasında duran prinsiplər – suverenliyə və ərazi bütövlüyünə hörmət prinsipial əhəmiyyət kəsb edir. Bu, bizim üçün çox vacib olan prinsiplərdən biridir. Təbii ki, bu prinsiplərlə yanaşı, sərhədlərin demarkasiyası, qarşılıqlı asılılıq prosesin tərkib hissəsi olmalıdır. Amma indiki mərhələdə artıq razılaşdırılmış prinsiplər dəyişdirilməməlidir".
Göründüyü kimi, Kolomina müsahibəsində bir neçə dəfə Azərbaycan-Ermənistan sülh prosesində ərazi bütövlüyü və süverenlik prinsipinə xüsusi stavka edir. Maraqlıdır ki, Azərbaycanın əraziləri işğal altında olanda, separatçılar Qarabağda xunta rejimi quranda bu iki prinsipə o qədər də maraq göstərməmişdilər. İndi bunlara nə olub? Məgər Azərbaycan kiminsə ərazisinə, ya suverenliyinə göz dikib?
"Gürcüstanın, Moldovanın, Ukraynanın ərazi bütövlüyü məsələsində NATO-nun mövqeyi birmənalı idi, Qarabağa gəldikdə isə..."
Məsələ ilə bağlı "Bakı-Xəbər"ə açıqlama verən media eksperti Yadigar Məmmədli hesab edir ki, mövzu Ermənistan olduğu üçün ərazi bütövlüyü məsələsinə belə həssas yanaşirlar: "Əvvəla, nədənsə, beynəlxalq təşkiatların region üzrə nümayəndələri daha çox erməni mediasına yer ayırırlar. Erməni mətbuatı da özlərinə sərf edən hissələri qabardır. Biz çox nadir hallarda həmin şəxslərin Azərbaycan mediasına müsahibə verdiyinin şahidi oluruq. Bu onu göstərir ki, onlar özlərini erməni mediasına daha yaxın hesab edirlər. Digər tərəfdən, bunlar heç nə olmadan aydın səmada ildırım çaxması effektini yaradırlar. Heç yeri olmadan bəyan edirlər ki, NATO üçün əsas suverenlik və ərazi bütövlüyüdür. Belə idisə, o zaman nəyə görə 2021-ci ilə qədər bunları görməzdən gəldiniz? Düz 30 il Azərbaycan bu məsələnin üzərində dayandı və hər beynəlxalq tədbirdə, digər müstəvilərdə bəyan olundu ki, ölkənin ərazi bütövlüyü və suverenliyi pozulub. Heç bir təşkilat bizi eşitmək istəmədi. Ancaq Gürcüstanın, Moldovanın, Ukraynanın ərazi bütövlüyü məsələsində NATO-nun mövqeyi birmənalı idi. Qarabağ məsələsinə yanaşmada isə münasibət fərqli və qeyri-müəyyən idi. Necə ki, Azərbaycan öz ərazilərini işğaldan azad etdi, suverenliyini tam təmin etdi, bu prinsiplər beynəlxalq qurumlar üçün xüsusi əhəmiyyət kəsb etməyə başladı. Niyə? Ona görə ki, bununla Ermənistanın yanında olduqlarını göstərirlər. Guya Azərbaycan qarşı tərəfə hücum etməyə hazırlaşır. Bunlar da öz aləmlərində bizə xəbərdarlıq edirlər. Bütün bunlar bir daha onu göstərir ki, beynəlxalq təşkilatların işinə gələndə ərazi bütövlüyü prioritet olur. İşinə gəlməyəndə istədikləri vaxt bu prinsiplərə tüpürürlər".
Vidadi ORDAHALLI
