Ermənistanın himni dəyişdirilməlidir. Bunu ölkə parlamentinin sədri Alen Simonyan bəyan edib. O bildirib ki, himn erməni musiqisinə, qaydalarına uyğun olmalıdır.
Simonyan Ermənistanın hazırkı himninin milli olmadığını diqqətə çatdırıb. Parlament sədri, həmçinin qeyd edib ki, ölkəsinin gerbinin dəyişdirilməsi məsələsi də müzakirə olunmalıdır: "Mənə aydındır ki, Ermənistan Respublikasının himni gec-tez dəyişməlidir, o, erməni mahiyyətli olmalıdır, dövlətimiz və erməni musiqisi ilə əlaqəsi olmalıdır və himnin ifa qaydalarına uyğun olmalıdır. Məncə, gerbin dəyişdirilməsi məsələsini də müzakirə etməliyik. Ən azından Ermənistan su altında qala bilməz, bu, bəşəriyyətin cəzası idi. "Facebook"dakı gülüş işarəsi olan şir də gerbdə ola bilməz. Ermənistanı qoruyan qılınc zəncirlənib". Erməni mediası isə artıq bu bəyanatdan fəal şəkildə narahatdır. Media yazır ki, Simonyan gerbdən Ağrı dağının təsvirinin çıxarılmasının zəruriliyinə işarə edir. Qeyd olunur k, Türkiyə və Azərbaycanın tələb etdiyi də məhz budur. Bu yerdə xatırladaq ki, Ermənistanın gerbi 1992-ci il aprelin 19-da bu ölkənin Ali Şurası tərəfindən qəbul edilib və 15 iyun 2006-cı il tarixli qanunla dəqiqləşdirilib. Bildirək ki, Ermənistanın gerbində qalxan təsvir olunub, onun mərkəzində "erməni millətinin simvolu" olan Ağrı dağı var. Təəccüblüdür ki, "erməni milləti"nin simvolu Türkiyədə yerləşən dağdır. Türkiyə və Azərbaycanın gerbində Ermənistan ərazisində yerləşəcək heç bir şey yoxdur. Bəs niyə Ermənistan Respublikasının gerbində Türkiyədə yerləşən dağın təsviri ola bilir? Bu fonda Ermənistanın Türkiyəyə qarşı ərazi iddiaları olması sadəcə ağılsızlıqdır. Bütün bunlar olarkən İrəvanla Ankara arasında münasibətlərin bərpa olunmasını necə iddia etmək olar? Cavab göz qabağındadır - heç bir şəkildə. Ermənistan Konstitusiyasında və Milli Təhlükəsizlik Doktrinasında nəzərdə tutulmuş Azərbaycan və Türkiyəyə qarşı ərazi iddiaları şəraitində Bakı ilə İrəvan arasında münasibətlərin qurulması mümkün olmadığı kimi. Bunlar fonunda Ermənistanın "Past" nəşri yazır: "Hələ 2019-cu ildə Nikol Paşinyan deyib: "Ölkədə konstitusiyanın tez-tez dəyişdirilməsini düzgün hesab etmirəm". Paşinyan bundan sonra, hətta bundan əvvəl də zaman-zaman yalnız konstitusiya dəyişikliklərindən danışır, idarəçilik sisteminin dəyişdirilməsinə ehtiyac olmadığını vurğulayırdı. Bu yaxınlarda o, yeni konstitusiyanın qəbul edilməsinin zəruriliyindən danışıb. Çoxları hesab edir ki, bununla o, Azərbaycan və Türkiyənin, xüsusilə müstəqillik bəyannaməsinə istinadın aradan qaldırılması ilə bağlı tələbini yerinə yetirir. Erməni Apostol Kilsəsinin xüsusi statusu ilə bağlı müddəanın konstitusiyadan çıxarılacağı ehtimal edilir. Məlumata görə, bütün bunlarla yanaşı, Paşinyan növbədənkənar seçkilərdən yayınmaq üçün konstitusiya referendumu keçirməyə çalışacaq. Məsələ ondadır ki, diplomatik mənbələrimizə görə, Qərb Paşinyanın seçkilərə getməsini və sülh müqaviləsini imzalamaq üçün tam legitimlik əldə etməsini istəyir. Üstəlik, növbədənkənar seçkilərin mayda, fors-major hallarda isə sentyabrda keçirilməsi məqsədəuyğun hesab edilir. Lakin Nikol Paşinyan əmindir ki, hətta inzibati rıçaqlarla belə səs çoxluğu əldə etmək mümkün deyil. Buna görə də o, bir növ etimad testi kimi referendum keçirmək istəyir".
Erməni hərbi ekspert Hayk Nahapetyan isə bildirir ki, konstitusiyanın dəyişdirilməsi təkcə Azərbaycan və Türkiyənin istəyi ilə bağlı deyil: "Başımıza gələn fəlakətin səbəbkarı Paşinyan və komandasının diletant idarəçiliyi, səriştəsizliyi və satqınlığıdır". Onun sözlərinə görə, Paşinyanın biabırçı şəkildə yanlış, xain siyasəti Ermənistan üçün fəlakət gətirib və fəlakət gətirməkdə davam edir: "İndi o, məğlubiyyətə görə təhlükəsizlik sistemini günahkar hesab edir? Paşinyanın çıxışının bu epizodu həm də onunla diqqət çəkir ki, o, Ermənistanın təhlükəsizlik siyasi vektorunun dəyişdirilməsi və Qərbə üz tutması barədə yüksək səslə danışır". Nahapetyan bildirib ki, KTMT-dən çıxmaq, 102-ci hərbi bazanı çıxarmaq üçün konstitusiyaya dəyişiklik edirlər. Konstitusiya məsələləri üzrə erməni ekspert Qohar Meloyan isə bildirir: "Diqqətəlayiqdir ki, trayektoriya dəyişdi və bu siyasi qüvvənin hakimiyyətə gəldiyi, gündəmində konstitusiya dəyişiklikləri olduğu hər kəsə məlumdur". Onun sözlərinə görə, bunu keçmişdə ləğv edilmiş komissiya və hazırda fəaliyyət göstərən konstitusiya islahatları komissiyası sübut edir: "Lakin yeni konstitusiyanın qəbulu heç vaxt müzakirə olunmayıb və gündəmdə olmayıb. Baş verən iki əsas konstitusiya dəyişikliyi əslində zamanın çağırışlarının nəticəsi idi və iki dəyişiklik arasında 10 illik fasilə yarandı". Meloyan bildirib ki, yeni konstitusiyanın qəbulu məsələsini gündəmə gətirən hakim qüvvə əsas qanunun dəyişməz müddəalarında və preambulasında dəyişikliklər etməyə meyllidir. Digər ekspert Vardan Poğosyan isə bildirir ki, Nikol Paşinyan sülh müqaviləsinin imzalanması ilə bağlı bəzi çətinliklərin qarşısını almaq üçün öz kapitulyasiyasını yeni konstitusiyada təsbit etməyə çalışır. Onun sözlərinə görə, Paşinyan yeni konstitusiya vasitəsilə elə bir vəziyyət yaratmağa çalışır ki, artıq üçüncü Ermənistan Respublikası müstəqillik bəyannaməsinə əsaslanan Ermənistan Respublikası olmasın: "Ermənistanın yeni konstitusiya və ya konstitusiyaya dəyişikliklə bağlı problemi yoxdur. Ermənistanın təhlükəsizlik problemi var və bu gün Ermənistanın təhlükəsizliyi Nikol Paşinyanın səyləri ilə pozulur. Sadəcə olaraq, Paşinyan yeni konstitusiyanın qəbuluna nail olsa, artıq müstəqil Ermənistan olmayacaq, yarımmüstəmləkə vəziyyətində olan, real hakimiyyətin erməni xalqı tərəfindən həyata keçirilməyəcəyi ərazi olacaq".
Nahid SALAYEV
