Akif Nəsirli: "...Ermənistanda korrupsiya və rüşvətxorluğa qarşı mübarizə unudulub"
"Transparency İnternational" təşkilatının 2023-cü il üçün 180 ölkə və ərazinin dövlət sektorunda Korrupsiya Qavrama İndeksi (KQİ) haqqında hesabatı dərc edilib. Hesabatın nəticələri ekspert qiymətləndirmələrinə əsaslanır.
2023-cü il hesabatı dünyada korrupsiyanın təsirini təhlil edir və bu sahədə vəziyyətin hansı ölkələrdə yaxşılaşdığını, hansında isə pisləşdiyini göstərir.
Hesabatda əks olunan məlumata görə, Ermənistan ötənilki 46 xalla müqayisədə 47 bal toplayaraq xalını yaxşılaşdırıb. Ermənistan 62-ci yerdədir.
Hesabatda qeyd olunur ki, 2018-ci ildə "məxməri inqilab"dan sonrakı iki il ərzində Ermənistan "mühüm antikorrupsiya islahatları" həyata keçirsə də, bununla belə, korrupsiyaya qarşı mübarizədə irəliləyiş, ilk növbədə, yeni tədbirlərin məhdud şəkildə həyata keçirilməsi ilə əlaqədar olaraq dalana dirənib. Ermənistan, regionun bir çox digər ölkələri kimi, ciddi təhlükəsizlik təhdidləri ilə üz-üzədir...
Təşkilat Ermənistanda korrupsiya ilə mübarizədə durğunluq olduğunui bəyan edib.
Ekspertlər deyir ki, Ermənistanda korrupsiya ilə mübarizənin dalana dirənməsi halı özünü bütün istiqamətlərdə göstərir. Bu səbəbdən də o bu sahədə beynəlxalq səviyyədə pis qiymət alıb.
Ekspertlərə görə, Ermənistanda ordu və başqa sahələrdə ciddi korrupsiya faktlarının olduğu, hətta hökumət üzvlərinin özlərinin belə koorupsiyaya batdığı barədə məlumatlar var. Ekspertlərə görə, Nikol Paşinyanın ətrafında, ailəsinin içində belə korrupsiya halının olduğu aşkardır. Korrupsiyaya batmış bir hökumətin isə ölkə içində korrupsiya ilə mübarizə aparması çətindir.
Qeyd edək ki, bu günlərdə Ermənistan mətbuatının yaydığı məlumata görə, bu ölkənin baş naziri Nikol Paşinyan "ordu "ucuz tost obyekti" olmaqdan əl çəkməlidir" bəyanatını verib.
Paşinyanın sözlərinə görə, hərbi yaşına çatmış vətəndaşların yarıdan az hissəsi orduya çağırılır: "Bu o deməkdir ki, ya bizim nəslin səhhətində ciddi problemlər var, ya da korrupsiya "çiçəklənir" və tibb işçiləri, hərbçilər və ictimaiyyətin nümayəndələri bir-biri ilə "müttəfiqlik" edirlər".
Yadınıza salaq ki, N.Paşinyan hökumətin keçən il noyabrın 23-də keçirilən iclasında korrupsiyaya qarşı mübarizənin səviyyəsindən şikayət edərək, bunun lazımi səviyyədə olmadığını deyirdi: "Biz bunun üçün Korrupsiyaya Qarşı Mübarizə Komitəsini yaratdıq. Ən yüksək maaşları təyin etmişik və bütün qaydalara uyğun yaratmışıq ki, təcili işlərimizlə məşğul ola bilək".
Sözsüz, Paşinyan faktiki olaraq Korrupsiyaya Qarşı Mübarizə Komitəsinin işindən şikayət edirdi. Mətbuatda gedən məlumata görə, Nikol Paşinyan özü korrupsiyaya qarşı mübarizənin lazımi səviyyədə olmadığını bəyan edir.
"Bu ölkədə korrupsiya ilə bağlı mübarizə yerində sayır"
Liberal İqtisadçılar Mərkəzinin rəhbəri Akif Nəsirli "Bakı-Xəbər"ə şərhində bildirdi ki, 44 günlük müharibədən və 2023-cü il 19-20 sentyabr hadisələrindən sonra Ermənistanın daxilində Paşinyan hökumətinə qarşı güclü müxalifət var, onun arxasında isə Rusiya dayanır. "Paşinyanın başı müxalifətlə ciddi siyasi mübarizəyə qarışıb. Bu ölkədə vəziyyət elədir ki, orada korrupsiyaya qarşı mübarizə unudulub, arxa plana keçib. Orada köklü korrupsiya problemi var. Bilirsiz ki, 2018-ci ilə qədər Ermənistanda çox ciddi korrupsiya oyunları gedirdi. Hətta 44 günlük müharibədə bəlli oldu ki, Rusiyadan və digər ölkələrdən alınan silahlar üzərində çoxlu "otqat" olub, Ermənistana yararsız silahlar verilib. Yəni Ermənistanın müdafiə sistemini belə korrupsiya başına götürüb. İndi o prosesi dayandırmaq üçün Paşinyan hökuməti müəyyən işlər görüb. 2020-ci ilə qədər bu proses getdi. 2020-ci ildə Paşinyan hökumətinin müharibədə məğlubiyyəti məhz ölkədə korrupsiyaya qarşı mübarizəni arxa plana atdı. Üstəlik, Ermənistanın iqtisadiyyatının böyük hissəsi Rusiya iş adamlarının monopolyasındadır. Rusiya iş adamları da xaraktercə korrupsiyaya bulaşmış, rüşvətxor sahibkarlardır. Onlar rüşvətsiz iş görmürlər"-deyə ekspert qeyd etdi.
O hesab edir ki, daxildəki sahibkarların fəaliyyətində rüşvət və korrupsiya məsələsi var. Bu məsələ də Ermənistanda korrupsiyaya, rüşvətxorluğa qarşı mübarizəni arxa plana atıb. "Son üç ildə Ermənistanda korrupsiya və rüşvətxorluğa qarşı mübarizə unudulub. Ona görə də, təkcə 2023-cü ildə deyil, 2020-ci ildən bəri bu ölkədə korrupsiya ilə bağlı mübarizə yerində sayır"-deyən A.Nəsirli qeyd etdi ki, təşkilat da bu məsələni öz hesabatında dərc edib.
İradə SARIYEVA
