Şakir Ağayev: "Bütün region dövlətləri, o cümlədən də dünya birliyi Ermənistanda çiçəklənən faşizm ideologiyasının qarşısının alınması üçün səsini qaldırmalıdır"
Son illər Ermənistanda çox qabarıq şəkildə faşizm meyllərinin dirçəlişini izləyirik. Erməni cəmiyyəti artıq faşzim, revanşizm təmayülündə özünü göstərir.
Məlum olduğu kimi, bir neçə gün əvvəl İrəvanda ermənilər Rusiya Xarici İşlər Nazirliyinin rəsmi nümayəndəsi Mariya Zaxarovanın Qarabağda etnik təmizləmə faktlarının olmaması ilə bağlı dediyi sözlərə görə "intiqam almaq" yolunu Rusiya bayrağını tapdamaqda və Leninqrad uşaqlarının xatirəsinə ucaldılmış abidəni təhqir etməkdə görüblər. Bu barədə sosial şəbəkələrdə videolar yayıblar. Onlar İrəvanda mühasirədə olan Leninqrad uşaqlarının xatirəsinə ucaldılmış abidəni təhqir edib, abidənin önünə qoyulmuş gül çələnglərini yıxıb, Rusiya bayrağını tapdalayıblar. Bu da Ermənistandakı "Rus evi"nin qəzəbinə səbəb olub. "Rus evi" Leninqradın İkinci Dünya müharibəsi zamanı blokadası dövründə yaşamış uşaqların xatirəsinə ucaldılmış abidənin təhqir edilməsi ilə əlaqədar Baş Prokurorluğa müraciət edib.
Rusiya mediası xəbər verir ki, İrəvandakı "Rus evi"nin rəhbəri Vadim Fetilov abidənin təhqir olunması barədə Ermənistan Baş Prokurorluğuna məktub ünvanlayıb.
Xatırladaq ki, yanvarın 30-da "Tik-Tok" sosial şəbəkəsində video paylaşan Samvel Şirinyan adlı şəxs Rusiya bayrağının rəmzi olan lentləri nümayişkaranə şəkildə qıraraq, abidənin qarşısındakı əklilləri kənara atıb, təhqiredici sözlər səsləndirib.
Digər bir məlumata görə, Rusiya Federasiyasının İstintaq Komitəsi İrəvanda mühasirədə olan Leninqrad uşaqlarının xatirəsinə ucaldılmış abidənin təhqir olunmasına görə cinayət işi açacaq.
Rusiya İstintaq Komitəsinin sədri Aleksandr Bastrıkin artıq olayla bağlı cinayət işinin başlanmasına göstəriş verib. Bu barədə erməni mediası TASS-a istinadən məlumat verib. Qeyd olunur ki, sosial şəbəkələrdə bir nəfərin abidəyə yaxınlaşaraq çələngləri yıxaraq Rusiya bayrağının rənglərində olan lenti tapdaladığını əks etdirən kadrlar yayılıb. Hücum edən şəxs bütün hərəkətlərini birinci şəxslə lentə alıb. "Rusiya İstintaq Komitəsinin sədri A.İ.Bastrıkin idarənin mərkəzi aparatına bu faktla bağlı cinayət işinin başlanmasını və Rusiya Federasiyası Xarici İşlər Nazirliyi ilə birlikdə baş verənlərin bütün hallarının müəyyən edilməsini tapşırıb. ", - İstintaq Komitəsi vurğulayıb.
Departamentin mətbuat xidmətindən TASS-a verilən məlumata görə, Ermənistan Baş Prokurorluğuna Ermənistandakı Rus Evinin (Rossotrudniçestvo) rəhbəri Vadim Fetilovdan İrəvanda mühasirədə olan Leninqrad uşaqlarının xatirəsinə ucaldılmış abidəni ləkələyən şəxsin cəzalandırılmasını tələb edən məktub daxil olub. "Baş Prokurorluğa Rusiya Evinin rəhbəri tərəfindən Ermənistanın Baş Prokurorluğuna ünvanlanmış məktub daxil olub", - mətbuat xidməti qeyd edib.
"Ermənistanın faşist düşüncəli, faşist ideologiyalı bir dövlət olması çoxdan hamıya məlumdur"
"Novoye vremya" qəzetinin baş redaktoru Şakir Ağayev "Bakı-Xəbər"ə şərhində qeyd etdi ki, İrəvanda baş verənlər Ermənistanda faşizmin yüksək həddə çatdığını göstərir. "İravanda mühasirədə olan Leninqrad uşaqlarının xatirəsinə ucaldılmış abidənin təhqir olunması ilə bağlı Rusiya Xarici İşlər Nazirliyi, İstintaq Komitəsi məsələ qaldırıb, Ermənistanın baş prokurorluğuna rəsmi məktub göndərilib. Təbii ki, bu yolverilməz və qəbuledilməzdir. Amma rəsmi İravan və ermənilər üçün bu az əhəmiyyət kəsb edir. Ermənistanın faşist düşüncəli, faşist ideologiyalı bir dövlət olması çoxdan hamıya məlumdur. Bu ilk növbədə özünü Ermənistanın faşist Njdeyə abidə qoymasında və nasist əlaltılarının xatirəsini əbədiləşdirməsində göstərdi. Faşist Njdenin abidəsi dövlət xadimləri səviyyəsində ziyarət edilirsə, bu, ölkə hakimiyyətinin faşist düşüncəsində olduğunu, hələ bu düşüncədən azad olmadığını bir daha sübut edir. Hesab edirəm ki, Njdenin heykəli qoyulanda Ermənistana bu ittihamlar irəli sürülməli idi. Yadınızdadırsa, bu məsələni haqlı olaraq Azərbaycan Prezidenti İlham Əliyev Orta Asiyada MDB ölkələrinin tədbirlərindən birində qaldırmışdı, Njdenin heykəlinin faşist ideologiyasına xidmət etdiyini deyib, onun yığışdırılmasını tələb etmişdi. Vaxtında bu barədə tədbir görüləməməsi indi mühasirədə olan Leninqrad uşaqlarının xatirəsinə ucaldılmış abidənin təhqir olunması ilə nəticələnib. Biz ermənilərin faşist ideologiyasına xidmət etdiyini, faşist düşüncəsi ilə yaşadığını 30 il torpaqlarımızın işğalda olduğu dövrdə də görmüşük. Torpaqlarımızı işğaldan azad edəndən sonra onların orada faşistlərdən də daha betər əməllər törətdiyinin şahidi olmuşuq"-deyə Ş.Ağayev bildirdi.
Ş.Ağayev hesab edir ki, ermənilərin faşist ruhunun bu gün özünü İrəvanda büruzə verməsi bizim üçün yenilik deyil, biz bunu yaxşı bilirik. "Bu gün Ermənistanda faşist ideologiyası yaşayır və o çox təhlükəli bir ideologiyadır. Ilk növbədə region, qonşular üçün, ikinci növbədə isə dünya üçün təhlükəli bir tendensiyadır. Hesab edirəm ki, Ermənistanda mövcud olan faşist ideologiyasının qarşısı alınmalıdır. Bu təkcə Rusiyanın Xarici İşlər Nazirliyi və İstintaq Komitəsinin işi olmalı deyil. Bütün region dövlətləri, o cümlədən də dünya birliyi Ermənistanda çiçəklənən faşizm ideologiyasının qarşısının alınması üçün səsini qaldırmalıdır. Buna qarşı tədbir görülməsə, gələcəkdə çox acı nəticələrə səbəb olacaq"-deyə Ş.Ağayev əlavə etdi.
İradə SARIYEVA
