Ermənistan Türkiyə ilə sərhədlərin üçüncü ölkə vətəndaşları və diplomatik pasportu olan şəxslər üçün açılmasına hazırdır. Bu barədə Ermənistanın xarici işlər nazirinin müavini Vaan Kostanyan yerli KİV-ə müsahibəsində deyib.
O bildirib ki, bunun üçün Ermənistanda infrastruktur tam hazırdır: "Hazırda Türkiyənin cavabını gözləyirik".
Nazir müavininin sözlərinə görə, bu proses həm İrəvan-Ankara, həm də İrəvan-Bakı münasibətlərinin normallaşmasına müsbət təsir edəcək.
Ekspertlər hesab edir ki, sərhədlərin üçüncü ölkə vətəndaşları, yaxud diplomatik pasportu olan şəxslər üçün açılmasının Türkiyəyə heç bir xeyri yoxdur.
Təbii, nə olsun ki, Ermənistan sərhədlərin açılmasını istəyir?
Azərbaycanla Ermənistanın problemi tam həll olunmamış Türkiyə buna gedəcəkmi, getməyəcəkmi? Buna getməlidir, yoxsa getməməlidir?
Məsələyə şərh verən Beynəlxalq Münasibətlərin Təhlili Mərkəzinin aparıcı məsləhətçisi, siyasi elmlər üzrə fəlsəfə doktoru, dosent Mətin Məmmədli "Bakı-Xəbər"ə bildirdi ki, İkinci Qarabağ müharibəsindən sonra regionda yeni geosiyasi reallıqlar yaranıb: "Bu reallıqların nəticəsində də Türkiyə ilə Ermənistan arasında münasibətlərin normallaşması, sərhədlərin açılması ilə bağlı yeni danışıqlar prosesi başlayıb. Bu danışıqlar təxminən 2021-2022-ci illərdən gedir. Artıq danışıqlar prosesi çərçivəsində tərəflərin nümayəndələri bir neçə dəfə müxtəlif ölkələrdə görüşüblər. Prosesdə ölkələr arasında münasibətlərin normallaşması, sərhədlərin açılması məsələsində müəyyən müsbət dinamika var. Amma yekun nəticə yoxdur. Yekun nəticənin olmamasının səbəbi, təbii ki, Türkiyənin Azərbaycanla Ermənistan arasında davam edən sülh danışıqları prosesi ilə əlaqədar tutduğu mövqedir. Türkiyənin mövqeyi ondan ibarətdir ki, biz regionda əsas məsələləri, o cümlədən də Ermənistanla münasibətlər məsələsini məhz Azərbaycanla koordinasiya edirik. Yəni Azərbaycanla Ermənistan arasında sülhə nail olunmasa, sülh müqaviləsi imzalanmasa, münasibətlərin normalaşması istiqamətində əhəmiyyətli addımlar atılmasa Türkiyə ilə Ermənistan arasında münasibətlərin normallaşmasından danışmağa dəyməz. Bu dəfələrlə Türkiyə prezidenti, Türkiyənin Xarici İşlər Nazirliyi tərəfindən bəyan edilib. Yəni bu, Türkiyənin rəsmi mövqeyidir. Ona görə də əgər Ermənistan Türkiyə ilə münasibətlərin normallaşmasını istəyirsə, Azərbaycanla münasibətlərin normallaşması, sülh istiqamətində addımlar atmalıdır.
Hesab edirəm ki, Ermənistan Türkiyə ilə münasibətlərin normallaşmasını istəyir. Çünki Türkiyə ilə münasibətlərin olmaması, sərhədlərin bağlı olması bölgəni ikitərəfli təcrid vəziyyətində saxlayır".
M.Məmmədli qeyd etdi ki, görünür digər problemlər Ermənistan tərəfindən yoluna qoyulur. Söhbətin Ermənistanın Türkiyəyə qarşı əvvəllər irəli sürdüyü əsassız ərazi iddialarından getdiyini deyən M.Məmmədlinin sözlərinə görə, artıq bu məsələ Ermənistanın gündəliyindən çıxmaqdadır: "Bu məsələ də, qondarma "soyqırım" iddiası da Ermənistanın müstəqillik bəyannaməsində yer almışdı. Bu məsələlər artıq Ermənistan tərəfindən geri götürülüb. Amma indi əsas məsələ Ermənistanla Azərbaycan arasındakı münasibətlərdir, sülh prosesidir. Bu məsələ yoluna düşmədən Türkiyə ilə Ermənistan arasında da münasibətlərin normallaşmasını, sərhədləriun açılmasını gözləməyə dəyməz".
M.Məmmədlinin sözlərinə görə, Ermənistan Azərbaycanla müasibətlərini normallaşdırıb sülh müqaviləsi imzalamayana qədər sərhədlərin açılması real görsənmir.
İradə SARIYEVA
