Bu günlərdə İrəvan Ağsaqqallar Şurasının üzvü, "Ana Ermənistan" müxalifət fraksiyasının üzvü Narine Ayrapetyan Rusiyadan siyasi sığınacaq istəyib. Qeyd edək ki, Ağsaqqallar Şurası Ermənistanda Bələdiyyə Şurasının funksiyalarını həyata keçirir. Amma sadəcə, adı fərqlidir.
Narine Ayrapetyan iddia edir ki, Ermənistanda siyasi rəqiblərə və hakim partiyanın nümayəndələrinə qarşı siyasi təqiblər davam edir. Onun sözlərinə görə, Ermənistanın keçmiş prezidenti Robert Köçəryanın oğlu Levon Köçəryana və "Hayastan" blokunun üzvü Andranik Tevanyana qarşı yalan ifadə verməyə məcbur edilir. Hakimiyyət bunu təkzib edir. Lakin Paşinyana müxalif olanlar indi diqqəti olna yönəldir ki, baş verənlərə beynəlxalq reaksiya lazımdır. Amma belə reaksiya yoxdur. Azərbaycanı demokratiya məsələlərində ittiham etməyə çalışan Avropa Şurası, onun Parlament Assambleyası bu məsələdə susur. Elə bu da ikili standartların daha bir təzahürüdür. Özü də Ermənistanda siyasi təqiblər son vaxtlarda daha geniş miqyas alıb. Qeyd edilən xüsusda "armenianreport" portalı yazır: "İstənilən Avropa ölkəsində bu cür xəbərlər, hətta söhbət Şərqi Avropa dövlətlərindən getsə belə, hökumətin mümkün istefası ilə çox ciddi daxili siyasi böhrana səbəb olardı. Ermənistanda biz belə bir şey görmürük. Baxmayaraq ki, İrəvan Ağsaqqallar Şurasının "Ana Ermənistan" fraksiyasının üzvü Narine Ayrapetyan Rusiyadan siyasi sığınacaq istədiyini bildirib. O əlavə edib ki, Ermənistanda ona və hakim partiyanın nümayəndələrinə qarşı siyasi təqiblər davam edir. Bu sadəcə səs-küylü ittiham deyil. Bu qalmaqaldır! Bu, daha geniş əhatə dairəsinə toxunur, çünki deyilənlərin hamısı doğrudur. İndiki hakimiyyət faktiki olaraq opponentlərə qarşı ən sərt repressiyalara keçib. Əgər əvvəllər yalnız Ermənistanın ikinci və üçüncü prezidentlərinin yaxın ətrafı təqib olunurdusa, indi onlara qarşı yalan ifadə verməyə məcbur edilənlərə keçiblər. Belə ki, Narine Ayrapetyanın sözlərinə görə, o, Ermənistan Respublikasının ikinci prezidenti Robert Köçəryanın oğlu Levon Köçəryana və "Ermənistan" blokunun rəhbəri Andranik Tevanyana qarşı yalan ifadə verməyə məcbur olub. Təbii ki, mövcud hakimiyyət bütün bunları təkzib edir. Onun hansı arqumentlər gətirəcəyini indidən təsəvvür etmək olar. Deyirlər ki, bütün bunlar əvvəlcədən hazırlanmış şoudur, respublikanın keçmiş rəhbərləri köhnə günlərə qayıtmaq arzusundadır, bu səbəbdən də şou yaradırlar. Üstəlik, Ermənistanda hakimiyyət dəyişikliyi arzusunda olan Rusiyanın bütün bunlarda əli olması ilə bağlı iddialardan da istifadə olunacağı istisna edilmir. Və burada etiraf etməliyik ki, Rusiya Federasiyasının imici indi elədir ki, oradan siyasi sığınacaq istəyən hər kəs komik görünür. Axı Rusiyada bütün müxalifət çoxdan "tualetdə isladılıb", seçkilər yoxdur, lakin prezident Vladimir Putinin yeni müddətə yenidən seçilməsi prosesi gedir.
Bundan əlavə, Narine Ayrapetyan bəyan edib ki, "Nikol Paşinyan ölkəni qoruyub saxlamaq istəyən, Rusiyaya düşmən münasibət bəsləmək, Sorosun və Qərbin Ermənistanı idarə etməsini istəməyən bütün şəxs və qüvvələrin təqibinə başlayıb". Bunlar Rusiyanın federal kanallarında tez-tez səslənən "arqumentlər"dir. Bu barədə Marqarita Simonyan və əri Tiqran Keosayan bir neçə dəfə danışıblar. Ümumiyyətlə, başqa şəraitdə bütün bu əməliyyatın Rusiya və onun ölkəmizdəki "beşinci kolon"u tərəfindən işlənib hazırlanması versiyasını qəbul etmək tamamilə mümkün olardı. Amma fakt odur ki, biz respublikaçı Armen Aşotyanın açıq təqibini görürük. Bundan başqa, danılmaz həqiqət budur ki, Paşinyan və onun təhlükəsizlik qüvvələri Ermənistanı da satırlar. Bəli, o bizə açıq deyir ki, Konstitusiyaya dəhşətli dəyişikliklər hazırlayır. Azərbaycanın təkid etdiyi budur. Bu da xalqımızın tabutuna mismar olacaq. Onu keçmişindən, indisindən və gələcəyindən məhrum etməyi planlaşdırırlar. Paşinyan isə planlarının xalq tərəfindən puça çıxa biləcəyindən çox qorxur. Özü də xalqın əvvəlki hakimiyyətdən narazılığı ilə oynayaraq hakimiyyətə gəldi. İndi o, iqtidardır və xalqın ondan narazılığı sadəcə olaraq planlardan kənardır. Beləliklə, Paşinyan Ermənistana, erməni xalqına edilən bütün xəyanətlərdən sonra siyasi cəhətdən sağ qalmağa çalışır. Onun nəzərində əsas məqsədə çatmaq üçün istənilən vasitə yaxşıdır. Hər hansı bir məlumatı qiymətləndirərkən bunu anlamaq bizim üçün vacibdir. Üstəlik, bəzi məlumatlara görə (hüquqşünaslar təkzib etsə də), "Exoil Group" holdinqinin əsas sahibi, Ermənistanda rəsmi səlahiyyətlərdən istifadə edərək çirkli pulların yuyulması faktı ilə bağlı axtarışa verilmiş Karen Vanetsyan Moskva mərkəzində saxlanılıb. Bildiyiniz kimi, bizdə Vanetsyan barəsində həbs qətimkan tədbiri seçilib. Bu isə Ermənistan Respublikası Milli Təhlükəsizlik Xidmətinin keçmiş rəhbəri, hazırda siyasi xadim olan əmisi oğlu Artur Vanetsyana qeyd-şərtsiz təzyiq üsulu idi. Nəticədə ortaya çıxan konfiqurasiya qəribədir. Artur Vanetsyan Rusiya xüsusi xidmət orqanlarının ölkəmizdəki oyuncağıdır. İndi də onun Ermənistanda axtarışda olan əmisi oğlu Moskvada təqib olunur. Bütün bunlar Narine Ayrapetyandan indiki hakimiyyətə təzyiq vasitəsi kimi istifadə olunması versiyasına nədənsə uyğun gəlmir. Ona görə də od olmayan yerdən tüstü çıxmaz. Və çox yaxın gələcəkdə bu "od" mütləq alovlanacaq. Xalqı aldadaraq, ölkəni uçurumun kənarına çıxararaq hakimiyyətə gələnlər isə onun odunda yanmalı olacaq". Bütün bunlara Avropa Şurası Parlament Assambleyası nədənsə seyrçi qalır. Ölkəmizə qarşı bu cür qərəzli yanaşma Avropanın diplomatik nüfuzuna xələl gətirir.
Samirə SƏFƏROVA
