Məhərrəm Zülfüqarlı: "Hesab ediblər ki, Azərbaycanın tərəfində olsalar, bu, Brüsselin xoşuna gəlməyəcək"
Məlum olduğu kimi, Avropa Şurasının Parlament Assambleyasında (AŞPA) Azərbaycanın nümayəndə heyətinin səlahiyyətlərinin ratifikasiyaya edilməməsi ölkəmizdə ciddi etiraza səbəb olub. Xüsusən də Ukrayna, Gürcüstan, Moldova və Macarıstanın nümayəndə heyətlərinin səsvermədə iştirakdan boyun qaçırmaları təəssüf hissi doğurur.
Bu arada, Gürcüstan və Ukrayna tərəfi AŞPA-da Azərbaycanla bağlı müzakirələrdə iştirak etməmələrini onunla əlaqələndirirlər ki, bəs, qurumda bu ölkələrlə bağlı müzakirələrdə Azərbaycan deputatları iştirak etməyib. Ona görə onlar bu addımı atıb. Söhbət Rusiyanın bu ölkələrin ərazisinə müdaxiləsi ilə bağlı AŞPA-da gedən müzakirələrdən gedir.
Maraqlıdır, belə müqayisə nə dərəcədə doğru və məntiqlidir? Axı bunların arasında böyük fərq var.
"Gürcü deputatların Rusiya amilinə görə bizi dəstəkləməməsi bəhanədir"
Sözügedən məsələ ilə bağlı "Bakı-Xəbər"ə açıqlama verən AVCİYA-nın vitse-prezidenti, professor Məhərrəm Zülfüqarlı qeyd etdi ki, Azərbaycan hər zaman birmənalı olaraq bu ölkələrin ərazi bütövlüyünü dəstəkləyib: "Azərbaycan hər zaman bu ölkələrin ərazi bütövlüyünü dəstəkləyib və bununla bağlı mövqeyi birmənalı olub. Ola bilər ki, Rusiya amili səbəbindən Azərbaycan hansısa tədbirə qatılmayıb. Ancaq bu o demək deyil ki, Azərbaycan Gürcüstan və Ukraynanın ərazi bütövlüyünü dəstəkləmir. Digər tərəfdən, nə Gürcüstanda, nə də Ukraynada ictimai-siyasi vəziyyət biz fikirləşdiyimiz kimidir. Məsələn, Ukrayna prezidenti yəhudi, müdafiə naziri Krım türküdür, digər vəzifələrdə də fərqli millətlərin nümayəndələri var. Yəni bu, həmin ölkədə ictimai-siyasi vəziyyətin fərqliliyini göstərir. O cümlədən, siyasi partiyalar da o cür bölünüb. Ukraynanı AŞPA-da təmsil edən qüvvələr də bu şəkildədir. Yəni bu məsələlərdə yüzdəyüz nəticə gözləmək çətindir. Fikrimcə, bu amilin də Gürcüstan-Ukrayna nümayəndə heyətinin mövqeyinə təsiri olub. Gürcü deputatların Rusiya amilinə görə bizi dəstəkləməməsi bəhanədir. Ona görə ki, Gürcüstanda hakimiyyətdə olan qüvvələr Rusiyaya yaxındır. Baxmayaraq ki, Rusiya Gürcüstan ərazilərini işğal edib, Abxaziya və Cənubi Osetiyada separatçı qüvvələri dəstəkləyir. Məsələ ondadır ki, Avropa İttifaqının üzvlüklə bağlı Tbilisiyə şirnikləndirici vədlər verməsi Gürcüstandan olan deputatların mövqeyinə təsir edib. Hesab ediblər ki, Azərbaycanın tərəfində olsalar, bu, Brüsselin xoşuna gəlməyəcək. Avropada belə yanlış rəy formalaşıb ki, guya Gürcüstan və Ukraynada insan hüquqlarının müdafiəsi yaxşıdır, Azərbaycanda isə pisdir. Ona görə də Avropanın diqtəsi ilə hərəkət edən qüvvələr ölkəmizə yönəlik belə namərd mövqe sərgiləyiblər. Ancaq istənilən halda, kimsə Azərbaycanı öz mövqeyindən döndərə bilməz".
Vidadi ORDAHALLI
