Amid Əliyev: "Bilir ki, anklavlar məsələsində Azərbaycan heç bir güzəştə getməyəcək və xəritələr əsasən Azərbaycanın maraqlarına uyğun olaraq seçiləcək"
Paşinyan hakimiyyəti yekun sülh sazişindən danışdıqca, Ermənistan imzalanma prosesindən bir o qədər uzaqlaşmış kimi görünür. Baş nazir Nikol Paşinyanın son açıqlamaları isə ümumiyyətlə sülh prosesinin arxa plana keçirilməsinə hazırlığa başlanıldığından xəbər verir.
Çünki erməni baş nazir artıq yekun sülh sazişindən deyil, "hücum etməmək barədə pakt"ın imzalanma ehtimalından danışmağa başlayıb. Və bu o deməkdir ki, rəsmi İrəvan Azərbaycanla sülh sazişinin imzalanmasında maraqlı deyil.
Paşinyan eyni zamanda sülh sazişini imzalamadan sərhədlərin legetimləşməsindən danışıb: "Legitimlik, eyni zamanda, Ermənistanın xarici təhlükəsizliyinin təmin edilməsində ən mühüm amil olmalıdır. Nə demək istəyirəm? Ermənistan Respublikası özünü beynəlxalq ictimaiyyət tərəfindən tanındığı ərazi ilə eyniləşdirməlidir. Bunlar. Ermənistan Respublikasının suveren ərazisi ilə eyni olan Ermənistan SSR ərazisi. Biz açıq-aydın və mübahisəsiz şəkildə bildirməliyik ki, bizim heç bir başqa əraziyə qarşı heç bir iddiamız yoxdur və olmayacaq və bu, Ermənistan Respublikasının xarici təhlükəsizliyinin təmin edilməsi üçün strateji əsasa çevrilməlidir".
Göründüyü kimi, Paşinyan deyir ki, biz ərazilərimizi legitim etməliyik, yəni Ermənistan Respublikasının ərazisini Ermənistan SSR ərazisinə uyğunlaşdırmalıyıq. Burada nə problem var? Məgər Azərbaycan 1991-ci il Alma-Ata sazişini tanımır?
Siyasi şərhçi Amid Əliyev "Bakı-Xəbər"ə açıqlamasında bildirdi ki, Ermənistan tərəfinin davamlı olaraq ərazilərin, daha doğrusu ərazisinin Azərbaycan tərəfindən tanınmasını tələb etməsinin bir neçə səbəbi var: "Birincisi, Ermənistan çox gözəl anlayır ki, sərhədlərin müəyyən edilməsi zamanı və eləcə də anklavlar məsələsində Azərbaycan heç bir güzəştə getməyəcək və xəritələr əsasən Azərbaycanın maraqlarına uyğun olaraq seçiləcək.
İkincisi, bu, Ermənistana dəstək olan Qərb dövlətləri və Aİ mülki missiyası tərəfindən Azərbaycana verilən mesaj kimi də qiymətləndirilə bilər. Bilirik ki, hazırda Avropa və Qərb aktiv olaraq Azərbaycanı Ermənistanın ərazisini işğal etməkdə günahlandırır. Nəzərə alsaq ki, II Qarabağ müharibəsindən sonra Azərbaycan ordusu bir sıra strateji yüksəklikləri nəzarətdə saxlayır, ermənilərin və onların patronajlarının narahatlığını hardasa başa düşmək olar.
Lakin bütün bunlar yalnız və yalnız sərsəm erməni nəzəriyyəsi olaraq qalır. Azərbaycan öz müstəqilliyini və ərazi bütövlüyünü tam şəkildə bərpa edib, yeni bir müharibə istəyində də deyil. Yerdə qalan sərhədlərin müəyyən olunması, kommunikasiyaların açılması və anklavlar məsələsi zamanla həll olunacaq.
Hazırda əsas diqqəti sülh sazişinin imzalanmasına yönəldərək, yuxarıda qeyd olunan məsələlərin də həllini tezləşdirməyə çalışmaq lazımdır. Bu istiqamətdə Ermənistanın atacağı addımlar gələcək istiqamətlərin müəyyən olunmasında əsas ola bilər. Yəni ki, Ermənistanın hər bir addımı adekvat şəkildə cavablandırılacaq".
Məhəmmədəli QƏRİBLİ
