Rauf Zeyni:"Almaniyanın Azərbaycanla əməkdaşlıq etməyə maraq göstərməsi onu göstərir ki..."
Kollektiv Qərbin Azərbaycana qarşı birləşdiyi bir dövrdə bəzi Avropa ölkələrindən obyektiv fikirlər də eşidilməyə başlayıb.
Azərbaycanın nüfuzlu COP29-a ev sahibliyi etməsi Qərbdəki məlum dairələri, o cümlədən də Almaniyanın bəzi təmsilçilərini rahatsız etsə də, bu mühüm tədbirlə bağlı Azərbaycana dəstəyini ifadə edən alman məmurlar da var. Əlbəttə, vicdanı olan hər kəs qərəzdən uzaq qaçmağa çalışır, qərəzli adamları dəstəkləmirlər...
Məsələn, Almaniya Federal Xarici İşlər Nazirliyinin beynəlxalq iqlim siyasəti üzrə xüsusi nümayəndəsi Cennifer Morqan bildirib ki, Almaniya COP29 çərçivəsində Azərbaycanla işləməyə hazırdır.
"COP konfranslarının uğuru onların inklüzivliyidir. Bu tədbirlərdə qeyri-hökumət təşkilatları (QHT), vətəndaş cəmiyyəti fəal iştirak etməlidir. Bu konfrans çərçivəsində özəl sektorun iştirakı da böyük əhəmiyyət kəsb edir", - deyə Morqan vurğulayıb.
"Hər birimiz bu tədbirin uğurla keçirilməsinə töhfə verməliyik"
Milli QHT forumunun prezidenti Rauf Zeyni "Bakı-Xəbər"ə şərhində bildirdi ki, COP29-un ölkəmizdə keçirilməsi çox böyük əhəmiyyət daşıyır:"Bu, Azərbaycanın növbəti dəfə beynəlxalq nüfuzlu tədbirə uğurla ev sahibliyi edəcəyini deməyə əsas verir. Bu müasir tariximizdə çox böyük əhəmiyyət kəsb edən hadisədir. Bu ilin noyabr ayında iki həftə ərzində 70 mindən çox qonağın Azərbaycana gəlməsi çox böyük hadisədir. Azərbaycan dövləti bu tədbirin ən yüksək səviyyədə keçirilməsi üçün bütün lazımı tədbirləri görür".
R.Zeyni vurğuladı ki, İlk Avropa Oyunları, İslam Oyunları, "Avroviziya" və digər beynəlxalq tədbirlərdən çox böyük təcrübəmiz var. R.Zeyni dedi ki, əlbəttə, bu tədbir onların hamısından daha miqyaslı, daha böyükdür.
"Almaniya Federal Xarici İşlər Nazirliyinin beynəlxalq iqlim siyasəti üzrə xüsusi nümayəndəsi Cennifer Morqanın açıqlaması və dövlətinin bu sahədə bizimlə əməkdaşlıq etməkdə maraqlı olduğunu bəyan etməsi, bu istiqamətdə Azərbaycana dəstəyi tərəfimizdən müsbət qarşılanır. Almaniyanın Azərbaycanla əməkdaşlıq etməyə maraq göstərməsi onu göstərir ki, o ölkədə hələ də obyektiv düşünənlər yox deyil...
Əlbəttə, biz qeyri-hökumət təşkilatları, vətəndaş cəmiyyəti olaraq bütövlükdə belə tədbirlərin keçirilməsinə hər zaman öz töhfəmizi vermişik. İstər könüllülərlə, istər maarifləndirmə, istərsə də Azərbaycana qarşı təhdidlərə qarşı fikirlərimizlə, addımlarımızla, Azərbaycan həqiqətlərinin dünya ictimaiyyətinə çatdırılması işi ilə bu sahədə iştirak edirik.
Əlbəttə, çox böyük planlarımız, layihələrimiz, təkliflərimiz var. COP29 Azərbaycan üçün beynəlxalq universitetdə dövlət imtahanıdır. Biz də bu imtahandan alnı açıq üzü ağ çıxacağıq. Hər birimiz bu tədbirin uğurla keçirilməsinə töhfə verməliyik.
Burada vətəndaşların da əməyi olmalıdır. Buna görə beynəlxalq aləm bizə qiymət verəcək. İnanıram ki, Azərbaycan bütün sahələrdə zəfər əldə etdiyi kimi, bu məsələdən də üzü ağ çıxacaq"-deyə R.Zeyni vurğuladı.
R.Zeyni əlavə etdi ki, Azərbaycan 7 fevral prezident seçkilərində də böyük uğura imza atacaq və xalq öz Prezidentinə, Ali Baş Komandanına etimadını bir daha ifadə edəcək.
İradə SARIYEVA
