Abutalıb Səmədov: "25 ştatın qarşısında Baydenin uduzmaq şansı çoxdur və Tramp xeyli irəlidədir"
ABŞ-ın Texas ştatında Ağ Evə qarşı üsyan başlayıb. Texas adminstrasiyasının başlatdığı üsyana ABŞ-ın daha 25 ştatı qoşulub. Üsyana ilkin səbəb Ali Məhkəmənin ştatın qubernatoru Qreq Abbottun Meksika ilə sərhəddə inşa etməyə başladığı tikanlı məftilli divarı sökməyə icazə verən qərarı olub.
Lakin Texas hakimiyyəti Ali Məhkəmənin qərarı ilə razılaşmayıb və Meksika ilə sərhədə Texas Milli Qvardiyasının əlavə qoşunları yerləşdirilib. Qubernator Abbottun Vaşinqtonun tələblərini boykot etmək qərarı fonunda Florida və Oklahoma ştatlarının səlahiyyətliləri Meksika ilə sərhədi qorumaq üçün Texasa öz ordularını göndərməyə hazır olduqlarını bildiriblər.
Beynəlxalq ekspertlərin ümumi fikri bu yöndədir ki, Texasdakı üsyana səbəb kimi Ali Məhkəmənin qərarı göstərilsə də, bu əslində nəticədir. Əsl səbəb Co Bayden hökümətinin, dolayısı ilə Demokratların yarıtmaz fəaliyyətidir.
Faktiki olaraq 25 ştatın etiraza qalxması onu deməyə əsas verirmi ki, Baydeni seçkiyə qədər "aşıra" bilərlər?
Müstəqil siyasətçi Abutalıb Səmədov "Bakı-Xəbər"ə açıqlamasında bildirdi ki,
Meksika ilə sərhədlərin möhkəmləndirilməsi ABŞ-da seçki qabağı kampaniyanın əsas məsələlərindən birinə çevrilib: "Çox təəssüf ki, bu məsələ Ukraynaya göstəriləcək yardımla əlaqələndirilir. Əslinə qalsa, Ukraynaya yardımın azaldılmasına, yaxud heç göstərilməməsinə nail olmaq üçün respublikaçılar miqrasiya, Meksika ilə sərhəd məsələsini ortaya atdılar və geri çəkilmək fikirləri də yoxdur. Çünki bu məsələ Baydeni seçkilərdə udmaq üçün respublikaçılara kifayət qədər üstünlük verir. Bir tərəfdən respublikaçılar ABŞ seçicilərinin qanunsuz miqrasiya problemlərinə münasibətini bilir, bundan seçkiqabağı maksimum yararlanmağa çalışırlar. Digər tərəfdən isə Baydenin əsas kozırlarından biri olan Ukrayna məsələsində ona mane olmağa çalışırlar. Yəni Ukrayna 2024 - cü il əks hücum kampaniyasında istədiyinə nail ola bilməsə, bu, Baydenin əleyhinə işləyəcək. Respublikaçılar ikinci Əfqanıstan vaqeəsi adı altında Baydeni bir az da nüfuzdan salacaqlar. Seçkini udmaq şansı lap aşağı düşəcək. Ona görə də, seçkilərə qədər bu problemlər uzanacaq. Əllərindən gələni edəcəklər ki, məsələ həll olunmasın. Həll olunması üçün Bayden maksimum güzəştə getməlidir. 25 ştata qarşı kəskin addımlar atmaq Baydenə yalnız ziyan gətirəcək. O dövrə qədər Baydeni yıxa bilməzlər, buna ehtiyac da yoxdur. Onsuz da seçkilərdə onu məğlubiyyət gözləyir. Amerikada belə etirazların olması təbiidir. Prezident zəif olanda bu kimi hallar daha çox olur. Bayden də ABŞ - ın ən zəif prezidentlərindən biridir. Burada bizi narahat edən daha çox Ukraynaya yardımın göstərilib-göstərilyəcəyi məsələsidir. Bayden 61 milyard dollar yardım üçün müraciət etmişdi və bu, Nümayəndələr Palatasından keçmədi. Keçmək şansı da yoxdur. Yardım azaldılmalı, Meksika ilə sərhədlə bağlı məsələdə də də razılaşma əldə olunmalıdır. Vaxt keçir və hələ ki, bu istiqamətdə ciddi addım atılmır. Nəzərə alsaq ki, ayrılan yardımların təqribən yarısı hərbi məqsədlər üçün ayrılır, yaxşı halda ABŞ bu il Ukraynaya 30 milyard yardım göstərəcək. Digər Avropa dövlətlərinin yardımlarının cəmi ABŞ - dan az olacaq. Ukraynaya veriləcək hərbi yardım yaxşı halda 50 milyard səviyyəsində ola bilər. Rusiyanın dövlət büdcəsinə ayrılan rəsmi hərbi xərcləri təqribən 20 milyard dollara yaxındır. Nəzərə alsaq ki, Rusiyanın hərbi - sənaye kompleksi çox yüksək səviyyədə işləyir, ona görə də silahlarının da istehsalı çox ucuz başa gəlir. Bu səbəbdən də Ukraynanı 2024 - cü ildə çox ciddi sınaqlar gözləyir. Ötən ilin noyabrında NATO - nun baş katibinin Ukraynada vəziyyətin kritik olmasına aid bəyanatı bu vəziyyəti əvvəlcədən görməsi ilə əlaqəlidir. Mən güman edirəm ki, bizi daha çox Ukrayna cəbhəsindəki vəziyyət narahat etməlidir. Ukrayna işğal altında olan 120 min kv km ərazinin hamısını azad edə bilməsə də, ciddi uğurlara nail olamlıdır ki, Rusiya sülh danışıqlarını aparmaq məcburiyyətində qalsın və bundan sonra bir daha qonşu dövlətlərin ərazilərini ələ keçirmək fikri düşməsin. Buna nail olmaq çox çətindir, ancaq ümidimizi üzməməliyik. Bir daha qeyd etmək istəyirəm ki, 25 ştatın qarşısında Baydenin uduzmaq şansı çoxdur və Tramp xeyli irəlidədir. Seçkilər yaxınlaşdıqca onların arasında olan bu fərqin bir az da açılacağı ehtimal olunur".
Məhəmmədəli QƏRİBLİ
