Məlum olduğu kimi, 9 dövlət - ABŞ, Britaniya, Almaniya, Hollandiya, İsveçrə, Avstraliya və digərləri BMT-nin Fələstin Qaçqınlarına Yardım üzrə Agentliyinə maliyyə donorluğunu dayandırır.
İtaliyanın xarici işlər naziri Antonio Tayani keçən həftənin şənbə günü bildirib ki, İtaliya Birləşmiş Millətlər Təşkilatının Fələstin qaçqınlarına (UNRWA) yardım üçün maliyyə ayırmasını dayandırmağa qərar verib.
"İtaliya hökuməti 7 oktyabrda İsrailə edilən dəhşətli hücumdan sonra UNRWA-nın maliyyələşdirilməsini dayandırdı", - deyə məlumatda qeyd olunub.
Qərar Fələstinin Həmas qruplaşmasının İsraildə 7 oktyabrda həyata keçirdiyi hücumlarda UNRWA-nın bəzi əməkdaşlarının əli olduğuna dair iddialardan sonra verilib.
Qərbin yaxın Şərq məsələsinə ayrıseçkilik göstərməsi, ikili standartlar çərçivəsində yanaşması müşahidə edilir. İsrail orda milləti qırır, İsrailə əməlli-başlı müqavimət yoxdur, bu yandan da Fələstin dövlətinin yaranmasına dəstək vermədikləri bir yana qalsın, bunlara humanitar yardımı da kəsirlər.
Aydın Quliyev: "... Ona heç nə demirlər, əvəzində müsəlmanların çörək pulunu kəsirlər..."
"Bakı-Xəbər" Media Qrupunun rəhbəri, politoloq Aydın Quliyev öz Facebook səhifəsində bu barədə belə yazıb:" Bu da Qərbin bəzi dövlətlərinin "ədaləti", daha doğrusu, ədalətin qıcqırması. Bir yandan 100 ilə yaxındır ki, bu müsəlman xalqına öz dövlətini qurmaq imkanı vermirlər, bir yandan İsrail onları əməlli-başlı genosid səviyyəsində qırıb tökür, bir yandan da AŞ-nin təşəbbüsü ilə 9 dövlət - ABŞ, Britaniya, Almaniya, Hollandiya, İsveçrə, Avstraliya və digərləri BMT-nin Fələstin Qaçqınlarına Yardım üzrə Agentliyinə maliyyə donorluğunu dayandırırlar".
A.Quliyev "Bir yandan BMT-nin Ədalət Məhkəməsi İsraili Qəzzada, yəni Fələstin müsəlmanlarına qarşı genosidin qarşısını almağa çağıran qərar çıxarır, o biri tərəfdən isə fələstinliləri ölümlə üz-üzə qoymağa bərabər olan yardımı dayandırırlar.
İsrailin baş naziri Netanyahu Fələstin dövlətinin yaradılması ideyasını açıq şəkildə inkar edir, Qəzzanın idarəçiliyini Fələstinə verməyəcəyini inadla deyir, ona heç nə demirlər, əvəzində müsəlmanların çörək pulunu kəsirlər..."-deyə yazıb.
Tural İrfan:"Qərb dövlətlərinin Fələstin qaçqınlarına humanitar yardımı dayandırması həm beynəlxalq hüquqa ziddir, həm də antihumanist bir addımdır"
Milli Cəbhə Partiyasının sədr müavini, tanımış ilahiyyatçı Tural İrfan" Bakı-Xəbər"ə şərhində "Qərb dövlətlərinin Fələstin qaçqınlarına humanitar yardımı dayandırması həm beynəlxalq hüquqa ziddir, həm də antihumanist bir addımdır. Bu da təbiidir. Çünki Fələstin probleminin yaranmasında birbaşa Qərbin özünün tarixi rolu var. Bir növ səlibçi təfəkküründə olan, xaç yürüşlərini davam etdirməyi öz ideologiyasına yazılmamış qanunlarla həkk etmiş Avropa və Amerika o dövrdə belə bir plan cızdı ki, xristian və müsəlman aləminin birbaşa üz-üzə gəlməsi yox, burada yəhudiləri istifadə etmək lazımdır.
Yəni İsrail dövlətinin qurulmasından bəri bu ideologiya həyata keçirilir və həqiqətən də 70 ilə yaxındır ki, İsrail-Fələstin məsələsi dünyada qlobal problemlə çevrilib. Məhz bu gün də artıq Fələstin dövlətinin yaranması söhbəti gedir, müəyyən mənada balans bərabərləşir. Odur ki, bu yardımı dayandırmaqla artıq Fələstin tərəfini daha da əzmək fikrindədirlər. Çünki uzun illərdir bu münaqişədə hərbi və digər yönlərdən üstünlük İsraildə olub. Hərçənd, siyasi yöndə və insani baxımdan dünya Fələstinin tərəfində olsa da, bir çox dövlətlər Fələstin dövlətinin qurulmasını dəstəkləsələr də belə, hərbi üstünlük, hərbi güc İsrail tərəfdə olub. Ancaq bu sonuncu savaşda çoxsaylı insan qətlə yetirilsə də, böyük faciələr baş vermiş olsa da, uzun illərdir HƏMAS-ın bu məsələyə hazırlaşması, başqa güclərin də müdaxilə etməsi hardasa İsrailin bu savaşı qısa müddətə yekunlaşdırmasına imkan vermədi. Bu da onu sübut edir ki, balanslar bərabər olmasa da, müəyyən mənada artıq Fələstin qüvvələri də İsrail və İsrailin həmfikirləri, müttəfiqləri kimi dövlətlərin qarşısında aylarla duruş gətirməyə gücü çatır"-deyə bildirdi.
Fələstinli qaçqınlara ayrılan humanitar yardımın kəsilməsini Qərbin səlibçilik təfəkkürü ilə əlaqələndirən ekspert hesab edir ki, bu ölkələr dünyaya "demokratiya", "insan azadlıqları", "humanizm" və başqa dərslər keçmək istəsə də, əslində özlərində bu göstəricilər kasaddır.
Qərbin bu gün də səlibçilik ideologiyasını davam etdirdiyi qənaətində olan T.İrfan qeyd etdi ki, orta əsrlərdə də İsrail və Fələstin ərazisi səlibçilərin əsas diqqətində olan ərazilərdən olub.
Əli TURABOV
