Azərbaycanın müstəqillik tarixində ilk dəfədir ki, bütün ərazilərimizdə seçki keçiriləcək. Şübhəsiz ki, 7 fevral növbədənkənar prezident seçkiləri ərazi bütövlüyümüzün və suverenliyimizin təsbitidir.
Azərbaycanda ilk suveren seçkinin keçirilməsi hüquqi dövlət quruculuğu prosesinin yüksək səviyyədə həyata keçirildiyini deməyə əsas verir.
Belə deyək, 7 fevral seçkiləri hüquqi dövlət quruculuğu sahəsində mühüm rol oynayır.
Maraqlıdır ki, Azərbaycanda keçiriləcək prezident seçkiləri beynəlxalq aləmdə ciddi müzakirə olunur, dünya mediası, dünyanın tanınmış ekspertləri bu seçki ilə bağlı əhəmiyyətli fikirlər səsləndirirlər.
Ekspertlərin fikrincə, prezident seçkilərinin ilk dəfədir ki, Azərbaycanın bütün ərazisində suverenliyinin qorunması şəraitində keçirilməsi beynəlxalq aləmdə də diqqət çəkir, dünya mediası da buna diqqət yetirir, müraciət edir. Bu prosesin hüququ çərçivəsinin daha yetərli və daha geniş olacağını göstərir.
Əksər ekspertlər qeyd edirlər ki, seçkilərin nəticələri Azərbaycanın siyasi təhlükəsizliyi üçün xüsusi rola malik olmaqla, yanaşı həm də Cənubi Qafqazın həyatında da mühüm hadisədir.
Qeyd edək ki, Gürcüstan, Özbəkistan, Bolqarıstan, Avropa mediasında Azərbaycanda keçiriləcək seçkilər barədə geniş təhlili məqalələr çap olunub. Bundan başqa xaricdəki Azərbaycan icmalarının nümayəndələri, eləcə də xarici ölkə ekspertləri ilk dəfə Azərbaycanın bütün ərazisində keçiriləcək seçkilər barədə çox müsbət fikirlər açıqlayıblar. Bu da şübhəsiz ki, Azərbaycanın ərazi bütövlüyünün, suverenliyinin beynəlxalq aləmdə qəbul edilməsi, təsdiqlənməsi deməkdir.
Bu seçkinin ölkəmizdə yeni bir dövrün başlanğıcı olacağını qeyd edən ekspertlər bildirir ki, bu dəstək dövlətimizə qarşı qara piar kampaniyası aparanların iflasa uğradığını göstərir.
Bəli, müstəqillik dövrü tariximizdə ilk dəfə olaraq bu seçkilər ərazi bütövlüyü və suveren hüquqları bərpa olunmuş Azərbaycan ərazisində keçiriləcək və bu seçkilərin nəticəsi bundan sonrakı tarixi mərhələdə Azərbaycanın yeni inkişafını təyin edəcək.
Azərbaycanın dövlət suverenliyi və konstitusiya quruluşu tam bərpa edildi.
44 günlük Vətən müharibəsi və antiterror tədbirləri nəticəsində əldə olunan Qələbə sayəsində dövlətimizin Əsas Qanunu olan Azərbaycan Respublikası Konstitusiyasının hüquqi qüvvəsi işğaldan azad edilmiş bütün torpaqlarımızda şərtsiz bərpa olundu və bununla da Konstitusiyada təsbit edilmiş insanların hüquq və azadlıqlarının tam şəkildə həyata keçirilməsi üçün real hüquqi zəmin yarandı.
Bolqarıstan mediası seçki haqda nə yazıb...
Bolqarıstan mediasında bu il fevralın 7-ə təyin edilmiş Azərbaycan Prezidenti seçkilərinin mahiyyətinə və səbəblərinə dair materiallar dərc olunub. Secki-2024.az saytı xəbər verir ki, yerli mətbu orqanlarında yayılan məlumatlarda prezident seçkilərinin keçirilməsinin əsas səbəbi kimi onun Azərbaycanın bütün ərazisini əhatə edəcək ilk seçkilər olacağı göstərilir. Diqqətə çatdırılır ki, Vətən müharibəsində qazanılmış Qələbənin, Azərbaycanın iqtisadi yüksəlişinin və beynəlxalq uğurlarının xalqın yürüdülən siyasi xəttin davam etdirilməsinə səs verəcəyini göstərir.
Yazılarda bu seçkilərin Azərbaycanın ərazi bütövlüyünün və bütün torpaqları üzərində suverenliyinin bərpası ilə əlamətdar olan yeni bir mərhələnin əsasını qoyacağı vurğulanır, son 20 il ərzində Azərbaycanın dinamik inkişaf edən dövlətə çevrildiyi, müxtəlif sahələrdə böyük uğurlar qazandığı bildirilir.
"Azərbaycan qalib bir ölkə olaraq bütün dünyaya sübut etdi ki..."
"Novoye vremya" qəzetinin baş redaktoru Şakir Ağayev "Bakı-Xəbər"ə şərhində "Təbii ki, 7 fevralda müstəqil Azərbaycan dövlətinin tarixində ilk dəfə olaraq 86,6 kvadrat kilometr ərazisində, yəni bütün ərazimizdə seçki keçiriləcək. Bu prezident seçkiləridir. Azərbaycan qalib ölkə olaraq ilk dəfə olaraq belə bir seçki keçirilir. Diqqət çəkən əsas məqamlardan biri odur ki, seçki vaxtilə ermənilərin işğalında olan, lakin sonradan azad edilən ərazimizi də əhatə edir. Artıq orada seçki məntəqələri də yaradılıb. Artıq rəsmi olaraq elan edilib ki, azad ərazilərdə seçkiyə hazırlıq prosesi başa çatıb. Orada yaşayan insanlar artıq öz torpaqlarında, vətənlərində səs verəcəklər. Bu seçkinin ilk növbədə əhəmiyyəti ondan ibarətdir, Azərbaycan qalib bir ölkə olaraq bütün dünyaya sübut etdi ki, öz gücü hesabına ərazilərini işğaldan azad edib, öz bütün suveren ərazilərində, bütün torpaqlarında azad seçki keçirəcək" - deyə bildirdi.
Ş.Ağayevin sözlərinə görə, Azərbaycan həm də onu sübüt edir ki, BMT tərəfindən tanınan bütün ərazilərində ilk dəfə azad şəraitdə seçki prosesi baş tutacaq.
"Bu seçki eyni zamanda xalqımıza böyük stimul verəcək"
O hesab edir ki, Azərbaycan dövlətinin bütün ərazilərində prezident seçkilərinin keçirilməsi çox vacib idi, bu həm daxili, həm regional həm də beynəlxalq müstəvidə zəruri bir tələb kimi qarşıda dururdu. Azərbaycanın öz suverenliyini təmin və ərazi bütövlüyünü bərpa etməsi, o cümlədən də bütün ərazilərində seçkilər keçirməsi onun beynəlxalq hüquqla təsbit edilmiş haqqıdır. Azərbaycanın müstəqil, suveren, hüquqi dövlət olduğunu vurğulayan Ş.Ağayev bildirdi ki, seçki Azərbaycanın daxili işi olsa da, amma beynəlxalq müstəvidə diqqət çəkməsi təbii qarşılanmalıdır. "Azad ərazilərdə, suverenliyini tam bərpa etdiyi torpaqlarında ilk dəfədir ki, seçki keçirməklə hüquqi dövlət olduğunu bir daha ifadə edəcək. Azərbaycan xalqı öz iradəsini ifadə edib öz prezidentinə səs verəcək. Bu seçki eyni zamanda xalqımıza böyük stimul verəcək. Bunun siyasi, hüquqi baxımdan əlavə çox mühüm mənəvi, psixoloji tərəfləri var. Siyasi tərəfi hamıya məlumdur. Mənəvi və psixoloji üstünlüyü odur ki, biz "məğlub xalq" libasında çıxıb qalib xalq kimi seçkilər keçiririk, bütün ərazilərinə sahib olan bir xalq olaraq seçkilərdə iştirak edirik. Biz xalq olaraq dünyaya sübut edirik ki, bəzi beynəlxalq təşkilatların bizim torpaqlarımızın ərazi bütövlüyünə qarşı çağırışları bizim bütövlüyümüzü, seçkiyə getmək iradəmizi sındıra bilməz.
Baxmayaraq ki, Avropa, birləşmiş qərb, AŞPA və başqa təşkilatlar, onların əlində olan media resursları Azərbaycanın öz ərazi bütövlüyünü bərpa etməsinə qısqanclıqla yanaşırlar, Azərbaycanın qalibiyyətini, öz torpaqları üzərində suverenliyini təmin etməsini həzm edə bilmirlər. Əlbəttə, bunu həzm edə bilməyənlər, qəbul etməyənlər üçün də bu tutarlı bir cavabdır, aksiyadır. Dost ölkələr sevinir, Azərbaycanı istəyən dövlətlər bu bizim qalibiyyətimizə, keçirilən seçkilərə müsbət yanaşır, bizimlə həmrəy olduqlarını ifadə edirlər. Bizim uğrumuzu həzm edə bilməyən dövlətlər də təbii ki, öz münasibətlərini, əsl simalarını göstərirlər. Bu eyni zamanda onlara da tutarlı bir cavab olacaq ki Azərbaycan müstəqil, hüquqi, güclü bir dövlət olaraq qarşısına qoyduğu hədəflərə, məqsədlərə bu seçkini keçirməklə nail olur, bundan sonra da bu belə davam edəcək" - deyə Şakir Ağayev qeyd etdi.
İradə SARIYEVAYazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
