Zaxarovanın İrəvana sətiraltı mesajı - “Buraxsaq, Azərbaycan sizi məhv edər”...
Elşən Manafov: "Rusiya hadisələrə müharibənin başlanğıcında da müdaxilə edə bilərdi"
"Rusiya Ermənistanı ağır məğlubiyyətdən xilas edib". Bunu Rusiya Xarici İşlər Nazirliyinin rəsmi nümayəndəsi Mariya Zaxarova keçirdiyi ənənəvi brifinqdə bildirib.
Daha sonra Zaxarova bunları qeyd edib: "Moskva Ermənistanın tərəfdaşı olaraq qalır. Rusiya 2020-ci ilin payızında baş vermiş döyüş əməliyyatlarının başa çatmasına həlledici töhfə verib. Ermənistanın ağır məğlubiyyətə uğramamasına həlledici töhfə verib. Bununla yanaşı, biz hər zaman Azərbaycan-Ermənistan nizamlanmasında humanitar məsələlərə çox diqqət yetirmişik. Rusiya hərbi əsirlərin, saxlanılan şəxslərin mübadiləsinə, itkin düşmüşlərin axtarışlarına, minalanmış ərazilərin xəritəsinin təhvil verilməsinə aktiv köməklik göstərib. Cənubi Qafqazda sülh və sabitliyə gətirib çıxaracaq bu səyləri davam etdirməyə hazırıq".
Maraqlıdır, Moskva Ermənistanın daha ağır məğlubiyyətə düçar olmasının qarşısını almaq üçün əlindən gələni eləyir deməklə Zaxarova nə demək istəyir?
"İki ölkə arasında münasibətlərdə tədricən dərinləşməkdə olan çat bizim dövlət maraqlarımızın xeyrinə olub"
Sözügedən məsələni "Bakı-Xəbər"ə şərh edən politoloq Elşən Manafov bununla bağlı bir sıra məqamlara toxundu: "Rusiya 2020-ci ilin noyabrında Azərbaycanla Ermənistan arasında danışıqlarda vasitəçilik missiyasını növbəti dəfə öz üzərinə göturməklə, bölgə ilə bağlı geosiyasi maraqlarını qorumaqla yanaşı, regionun yeni geosiyasi konfiqurasiyasının formalaşmasına öz töhfəsini verib. Məhz bu yeni geosiyasi konfiqurasiya Qərbi və onun regiondakı satellit rejimi olan Paşinyan iqtidarını qane etməyib. Nəticədə regionda yeni geosiyasi reallıqların formalaşması üçün Qərb özünün vasitəçilik səylərini gücləndirib. Rusiya hadisələrə müharibənin başlanğıcında da müdaxilə edə bilərdi. Lakin Rusiya iqtidarı seyrçi mövqeyində qalaraq, əvvəla Ermənistanı Qərbin təklif etdiyi geosiyasi konfiqurasiyaya yönəltmək istəyənlərə, regiona Qərblə müqayisədə daha ciddi təsir imkanlarına malik olduğunu nümayiş etdirdi. Digər tərəfdən, Rusiyanın bəlli mövqeyinə Azərbaycan prezidenti İlham Əliyevin böyuk diplomatik məharəti, Moskvanın regional maraqlarının nəzərə alınması, müharibədən əvvəl əldə edilmiş və daha çox gizli diplomtiyaya aid edilə biləcək razılıqlar ciddi təsir göstərdi. Nəticədə Rusiya hadisələrə o zaman müdaxilə etdi ki, artıq müharibənin müqəddəratı həll olunmuşdu. Şuşa daxil olmaqla Qarabağın keçmiş inzibati hüdudlarından kənarda olan bütun ərazilərimiz azad olunmuşdu. Ermənistan Rusiyanın vasitəçiliyi ilə faktiki olaraq kapitulyasiya aktına imza atmalı oldu. Əldə edilmiş razılıqlar bizim zəfər qələbəmizin hüquqi prinsiplərinin müəyyən edilməsində ciddi əhəmiyyət kəsb edib. Bu razılıqlar, xüsusilə bölgədə nəqliyyat, kommunikasiya xətlərinin açılmasını nəzərdə tutan müddəalar bizimlə yanaşı, Türkiyə və Rusiyanın da maraqlarına cavab verib. Rusiyanın münaqişənin yenidən alovlanmasına yol verməmək məqsədilə tərəflərin razılığı ilə öz sülhməramlı kontingentini yeritməsi onun geosiyasi maraqlarının təmin olunmasına yönəldilməklə yanaşı, bizim Qarabağda perspektivdə dövlət suverenliyimizin tam mənada bərpa olunmasına da öz töhfəsini vermiş oldu. Bunu Ermənistan iqtidarının sülhməramlıların öz missiyalarını obyektiv şəkildə icra etməmələri ilə bağlı sonrakı açıqlamaları da təsdiq edir. Rusiyanın Paşinyan iqtidarının Qərbyönümlü siyasətindən narazılığı bütün bu müddət ərzində özünü büruzə verib. Paşinyanın Qərb qarşısındakı öhdəliklərinə rəğmən, Rusiyanın Ermənistandan sıxışdırılıb çıxarılmasına hesablanmış siyasəti göz qabağında idi. Odur ki, Rusiya Paşinyan iqtidarını deyil, daha çox burada öz maraqlarının qorunub saxlanılmasına yönəlik siyasət yeridib. Etiraf etmək lazımdır ki, Qərbin səyləri nəticəsində Rusiya və Ermənistan arasında münasibətlərdə tədricən dərinləşməkdə olan çat, dolayısı yolla olsa da, bizim dövlət maraqlarımızın xeyrinə olub".
Vidadi ORDAHALLI
