Qarabağda yaşayan ermənilər üçün “humanitar yardım” göndərən Ermənistan rəsmiləri dayanmadan təkrar edirlər ki, yüklərin çatdırılması üçün Rusiya sülhməramlı qüvvələri ilə danışıqlar aparılır. Məhz bu fonda Ermənistanda sülhməramlı kontingentə, ümumilikdə Rusiyaya qarşı daha sərt təbliğat aparılır.
Artıq bunu Ermənistanda etiraf edənlərin sayı da sürətlə artır. Onlardan biri olan erməni politoloq Benyamin Matevosyan vurğulayır ki, Qarabağa “humanitar yardım”ın göndərilməsi hakimiyyətin növbəti antirusiya şousu idi: “Ermənistanda akkreditə olunmuş diplomatların Kornidzoru ziyarət etməsi isə bu şouda “kütləvi səhnə” idi”.
Politoloq xatırladıb ki, Qarabağa "humanitar yük"ün göndərilməsinə Moskvada baş tutan üçtərəfli görüşdən sonra qərar verilib: “Gəlin birlikdə məntiqli düşünək: Ermənistanın Qarabağa humanitar yardım göndərilməsi ilə bağlı hansısa razılıq əldə olunsaydı, azərbaycanlılar buna mane olmamalı idi, ruslar isə onun çatdırılmasını təmin etməliydilər. Əminəm ki, bununla bağlı ya Sergey Lavrov, ya da Mariya Zaxarova brifinqində məlumat verərdi. Lakin biz gördük ki, Rusiya rəsmilərindən heç biri bu barədə danışmadı. Nəticədə "humanitar yük" yalnız Laçın dəhlizinin başlanğıcına qədər gedə bildi”. Matevosyanın sözlərinə görə, "humanitar" missiyanı Ermənistan hakimiyyəti üçün “səmərəsiz” adlandırmaq olmaz. Çünki o, bu qərarda başqa “qeyri-humanitar” motivlər də görür: “Biz “nəticə” anlayışının nə demək olduğunu başa düşməliyik. Bizim təqdimatımızla hakimiyyətin baxışı üst-üstə düşürmü? Bunun üçün hakimiyyətin nəzarətində olan mediaya və “Teleqram” kanallarına baxmaq kifayətdir. Onlar deyirlər: “Ruslar hətta humanitar yardımı Qarabağa apara bilmədi”. Həqiqətən də hazırda Ermənistanda ekspert dairələrində, mediada Rusiya əleyhinə təbliğatın daha da şiddətlənməsi müşahidə olunur. Məsələn, erməni politoloq Edvard Antinyan bildirir ki, Rusiya Azərbaycanın sifarişini yerinə yetirir. Antinyan Ermənistan-Rusiya münasibətlərinə toxunaraq qeyd edib ki , Ukraynadakı müharibənin bitməsindən asılı olmayaraq, artıq Rusiya yoxdur: “Ermənistanın KTMT-dən çıxmamasının bədəli olacaq. Biz öz suverenliyimizi şübhə altına alırıq. Ermənistan hökuməti Rusiyanın uğursuz olduğunu zənn edir”. “Ana Ermənistan” hərəkatının koordinatoru Andranik Tevanyan isə bildirir ki, Rusiyanın himayəsini rədd etmək istəyən Ermənistan ərazisindən rus bazalarını çıxarmağı düşünür: “Rusiyanın faktiki olaraq Ermənistan və Azərbaycanın müqaviməti ilə üzləşdiyi mənzərə ilə qarşılaşdıq. Qarabağın Azərbaycanın tərkib hissəsi kimi tanınması faktiki olaraq 10 noyabr sənədində olan bəndi aradan qaldırır - söhbət Laçın dəhlizindən gedir. Əgər Qarabağ Azərbaycana məxsusdursa, onda Laçın dəhlizi də Azərbaycana aiddir – Nikol Paşinyan və Azərbaycan belə hesab edir. Beynəlxalq ictimaiyyət bu qərara qarşı çıxmayacaq. Qərb üçün əsas olan Rusiyanı bu regiondan qovmaqdır: ilk addım rus sülhməramlıların çıxarılması olacaq, sonra Rusiya hərbi bazaları problemi qaldırılacaq”. Onun sözlərinə görə, bu gün Qarabağ danışıqlar mövzusu kimi mövcud deyil, Ermənistan hakimiyyəti bu mövzunu bağlayıb: “Bu gün Ermənistan məsələsi müzakirə edilir. Danışıqlar prosesi sırf Ermənistanla bağlıdır və hazırda Ermənistan masa arxasında deyil, masaya qoyulub”. Digər erməni ekspert Robert Ananyan isə daha açıq mətnlə bildirir ki, ermənilər getdikcə daha çox Rusiyadan üz döndərərək Avropa İttifaqı (Aİ), ABŞ və İrana üstünlük verir. O qeyd edib ki, uzun illər Rusiya təbliğatı və aparıcı siyasi qüvvələri erməniləri aldadaraq, Rusiyanın Ermənistanın yeganə müttəfiqi olduğunu iddia etməklə yanaşı, ABŞ, Fransa, NATO və Aİ-yə qarşı qarayaxma kampaniyası həyata keçiriblər: “Lakin İkinci Qarabağ müharibəsi göstərib ki, Rusiya Ermənistanın qeyd-şərtsiz dəstəkçisi deyil. Bu gün ermənilər Rusiyadan çox Qərbə arxalanmağa üstünlük verirlər”.
Erməni cəmiyyətində inkişaf edən hadisələr onu göstərir ki, Rusiya əleyhinə kampaniya Ermənistanın 2018-ci ildən Qərbə meyl etməsindən sonra başlayıb. Rus ekspert Andrey Petrov qeyd edir ki, Qərbin Rusiyaya qarşı ümumi geosiyasi mübarizənin bir hissəsi olaraq hakimiyyəti rusiyapərəstdən qərbyönümlüyə dəyişməyə çalışdığı postsovet respublikalarından birincisi Ermənistandır və bu proses 2014-cü ildən başlayıb: “Bütün bunlara isə son 20 ildə “Qarabağ klanı”ndan cəmiyyətin narazılığı səbəb olub. “Qarabağ klanı”nın ölkədə yaratdığı anarxiya hər an partlaya bilərdi. Bu vəziyyət isə Qərb qüvvələri üçün göydəndüşmə idi. Əslində Qərbin müxalifətçi deputat Paşinyanı seçməsi təsadüfi deyildi. İcevanda doğulub İrəvanda təhsil alan, Rusiya və “Qarabağ klanı” ilə əlaqəsi olmayan Paşinyanın hakimiyyətə gəlmək üçün göstəriciləri uyğun gəlirdi. Amma Paşinyanın siyasəti nəticəsində Ermənistan dalana dirəndi. Fransanın təhriki ilə Avropa Birliyinə və NATO-ya qoşulmaq həvəsi artmağa başlayanda Rusiyadan uzaqlaşmaq fikrinə düşdü. 2020-ci ilin payızında İrəvan “yeni müharibə-yeni ərazilər” tezisi ilə çıxış edəndən sonra, sentyabrın 27-də müharibə başladı və Ermənistan ordusu məğlubiyyətə uğradı. Nikol Paşinyan hər gün Vladimir Putinə zəng edərək hərbi əməliyyatların dayandırılmasını, Rusiyanı Ermənistan tərəfdən müharibəyə müdaxilə etməyə çağırıb. İrəvanın əsas istəyi KTMT qüvvələrini döyüşlərə cəlb etmək olsa da, həm Kreml, həm də Təşkilatın Katibliyi hərbi əməliyyatların Azərbaycan ərazisində getdiyini bildirirdi. Nəticədə Ermənistan Qarabağ müharibəsində biabırçı məğlubiyyətə uğradı. Azərbaycan öz torpaqlarını işğalçılardan təmizlədi və Ermənistan rəhbərliyini kapitulyasiya sənədini imzalamağa məcbur etdi. Rusiya Qarabağın Ermənistan tərəfindən işğalı üçün Azərbaycanla döyüşə başlamadı. Rusiya-Ermənistan münasibətlərində gərginlik də buradan qaynaqlanır. Rusiyaya qarşı əsassız iddiaların, erməni cəmiyyətində rusofob əhval-ruhiyyənin yayılmasının məqsədi birdir. Nikol Paşinyan rejimi Rusiyanın təsir dairəsini tərk edərək Avroatlantik Alyansın üzvü olmaq istəyir. Rusiya isə Ermənistanı tərk etmək fikrində deyil”. Hesab edilir ki, bu şəraitdə Rusiyanın Ermənistana cavabı çox sərt olacaq.
Nahid SALAYEV
