İsrail Təhlükəsizlik Akademiyasının Qafqaz üzrə Azərbaycan Respublikasındakı Regional Nümayəndəliyi Qərbi Azərbaycan məsələsində Azərbaycana dəstək açıqlaması yayıb.
Açıqlamada deyilir ki, ermənilər Qərbi Azərbaycanı özününküləşdirmək üçün buradakı Azərbaycan toplumuna qarşı ağır hərbi cinayətlər törədiblər: “Məhz ermənilərin etnik təmizləmə siyasəti nəticəsində Qərbi Azərbaycanlılar buradan deportasiya edilərək zorla çıxarılıb.
Qərbi Azərbaycan ərazisi‚ yəni Zəngəzur‚ Göyçə və İrəvan qədim Azərbaycandır. Tarixi mənbələr göstərir ki‚ məhz Çarizmin dövründə buraya ermənilər məqsədli və düşünülmüş şəkildə kütləvi halda köçürülərək Çar imperiyasına etnik dayaq yaradılmışdır. Bu siyasət rus çarı birinci Pyotrdan başlamış və Sovet-bolşevik hökuməti dövründə də daha ciddi şəkildə davam etmiş və Sovet hökumətinin ermənipərəst siyasəti nəticəsində isə Qərbi Azərbaycan torpaqları qeyri-qanuni şəkildə tamamilə ermənilərə verilərək burada‚ yəni bu Azərbaycan torpaqları üzərində Sovet hökuməti tərəfindən indiki Ermənistan dövləti yaradılmışdır. Amma və lakin heç bir tarixi mənbə burada qədim erməni varlığını və tarixdə hansısa bir erməni dövlətinin mövcudluğunu təsdiq etmir. Yəni bütün tarixi mənbələr Qərbi Azərbaycan torpaqlarının məhz Azərbaycana aid olmasını mötəbər dəlillərlə sübut edir. Ancaq və lakin ermənilərin şovinist və etnik təmizləmə siyasəti nəticəsində Qərbi Azərbaycandakı Azərbaycan izləri dağıdılmış və yerlə yeksan edilmişdir. 1988-ci ildən isə başlayaraq bu ərazilərdə yaşayan Qərbi Azərbaycanlılar zorla və hərbi güc tətbiqi ilə öz dədə-baba torpaqlarından qovularaq ermənilərin etnik təmizləmə siyasətinin qurbanı olmuşdur. Qərbi Azərbaycan indiki Azərbaycan Respublikasının tarixi ərazisidir”.
Göründüyü kimi, İsrail adından tarixi faktlara əsaslanaraq, həqiqətlər söylənilir. Maraqlıdır, belə ciddi bəyanatla çıxış edən İsrail Təhlükəsizlik Akademiyası nədir?
Apardığımız araşdırmalar nəticəsində məlum oldu ki, qurum NATO və BMT-nin səlahiyyətli xidmət təminatçısıdır və buna görə də, Avropa birliyi və dünya ictimaiyyəti tərəfindən tanınan diplom, sertifikat və Europass vermək üçün akkreditə olunur.
İsrail Təhlükəsizlik Akademiyası (ISA) Yaxın Şərqdə, İsraildə yerləşən xüsusi təhlükəsizlik‚ hərbi müdafiə‚ mühafizə‚ beynəlxalq terrorizmlə və beynəlxalq cinayətlarlıqla mübarizəyə dair xüsusi peşələr üzrə və xüsusən hərbi təyinatlı xüsusi operativ taktiki təlim-tədris mərkəzidir.
Bu, çətinliyindən asılı olmayaraq geniş spektrli xüsusi taktiki təlimlərin həyata keçirilməsində ixtisaslaşan təhsil qurumudur.
Qurum həm dövlət sifarişləri ilə (bu, ilk növbədə, xüsusi təyinatlı hərbi qulluqçuların hazırlanmasına aiddir), həm də fərdi şəxslərlə əməkdaşlıq edir.
İşçilər dünyanın aparıcı xüsusi təyinatlılarının (İsrail Müdafiə Qüvvələrinin Xüsusi Təyinatlı Qüvvələri, İsrail Hərbi Dəniz Qüvvələrinin Xüsusi Təyinatlı Qüvvələri, İsrail Polisinin Xüsusi Təyinatlı Qüvvələri) veteranlarıdır.
İsrail Təhlükəsizlik Akademiyasında peşəkar təhlükəsizlik və anti-terror mütəxəssisləri beynəlxalq cinayətkarlığa və beynəlxalq terrorizmə qarşı təhlükəsizlik‚ müdafiə və qorunma sahələrini əhatə edən bilik və bacarıqları və həmçinin xüsusən terrorla mübarizə
təlimlərini öyrədir.
Belə bir ciddi qurumun Göyçəni, Zəngəzuru və İrəvanı tarixi Azərbaycan əraziləri kimi tanıması hansı anlama gələ bilər?
Politoloq Yeganə Hacıyeva “Bakı-Xəbər”ə açıqlamasında bildirdi ki, Azərbaycan ilə İsrail arasında uzun illərə söykənən dost bağları var: “ Bu əlaqələrin İsrail ilə Türkiyə arasında da möhkəmlənməsində Azərbaycan böyük rol oynayır. Belə ki, ölkəmizlə strateji əlaqələri olan İsrail ilə Türkiyə arasında diplomatik münasibətlərin bərpa olunmasında, gələcək perspektivlərə hesablanmış mühüm əhəmiyyət kəsb edən üçtərəfli əsasda əməkdaşlığın qurulmasında Prezident İlham Əliyevin xüsusi rolu olub. İsrail ilə Azərbaycan arasında bir çox sahələrlə bərabər, həmçinin hərbi sahədə də geniş əməkdaşlıq əlaqələri mövcuddur. Bununla yanaşı, münaqişə dövründə Qarabağ həqiqətlərinin dünyaya çatdırılmasında İsrailin lobbi şəbəkəsi böyük rol oynayıb. Müsəlman ölkəsi olmasa da, hər zaman respublikamızın çətin günlərində yanında olan, onun haqq işini dəstəkləyən və dost köməyini əsirgəməyən İsrail mənfur qonşularımızın xalqımızın müqəddəs ibadət yerlərinə, tarixi abidələrinə qarşı etdikləri vandallığı qəbul etməmiş və bu məsələdə də Azərbaycanın mövqeyini bölüşüb. İkinci Qarabağ savaşında İsrailin Azərbaycana təkcə silah satması deyil, eyni zamanda Ermənistandan səfirini həmin dövrdə geri çəkməsi, regional və beynalxalq platformalarda da İkinci Qarabağ savaşı ərzində Azərbaycana lazımi dəstəyi verməsi, israillə Azərbayacnın münasibətlərinin üst səviyyədə olduğundan xəbər verir”.
Politoloqun fikrincə, Azərbaycan İsraildə də səfirlik açmaqla artıq bu əlaqələri daha da dərinləşdirmiş oldu. Azərbaycan İsrail əlaqələrinin daha yüksək səviyyəyə qalxması üçün qarşıda xeyli perspektivlər var. Bununla yanaşı, İsraildə fəaliyyət göstərən təşkilat heç bir tərəfkeşlik etmədən, tarixi faktlara əsaslanaraq ədalətli mövqe ortaya qoyur. Həmin ərazilərin Azərbaycana aid olmasını bütün mötəbər qaynaqlar təsdiqləyir. Bu yaxın tarixə aid olan məsələdir. Sadəcə, bir çox ölkələr və beynəlxalq təşkilatlar bunu dilə gətirmək istəmir. Belə bir təşkilata göstərdikləri obyektivliyə görə xüsusi təşəkkür düşür”.
Məhəmmədəli QƏRİBLİ
