Ermənistan Ədliyyə Nazirliyi hərbi vəziyyət yaranacağı təqdirdə internet resurslarına girişin məhdudlaşdırılmasını təklif edib. Erməni mediası yazır ki, yerli ombudsman Kristine Qriqoryan bu ideyanı tənqid edib. Onun sözlərinə görə, təklif olunan yenilik insan hüquqlarını məhdudlaşdırır, üstəlik, təklif ekspertlərlə müzakirə olunmayıb.
Lakin artıq Ədliyyə nazirliyi hərbi vəziyyətin tətbiqi zamanı bəzi internet saytlarına, sosial şəbəkələrə və internet proqramlarına çıxışı, ümumilikdə internetin mövcudluğunu məhdudlaşdıracaq qanun layihəsini baxılmaq üçün hökumətə təqdim edib.
Sanki Ermənistanın yeni müharibəyə hazırlaşdığı qənaəti yaranır. Bu barədə ekspertlər nə düşünür?
Hərbi-siyasi ekspert Ramil Məmmədli “Bakı-Xəbər”ə bildirdi ki, Ermənistanın son zamanlar atdığı addımlar bunu əminliklə deməyə əsas verir: “Ermənistanda sentyabrın 24-dən başlayan və ölkədə qismən hərbi vəziyyətin elan olunması ilə davam edən hərbi təlimlər gedir. Dövlət orqanlarının və yerli idarəetmə stukturlarının da yaxından iştirak etdiyi təlimlərdə müharibə ehtimalına qarşı bütün ölkənin hazırlığı yoxlanılır.
Bu təlimlər işğal altındakı Qarabağdan da yan keçməyib. Belə ki, Qarabağda yaşayan və 18 yaşı tamam olan bütün çağırışçılar hərbi komissarlıqlarda qeydiyyata alınıb, onlar bir neçə günlük hərbi təlimlərə qatılıblar”.
Ekspertin sözlərinə görə, son günlər ermənilərə aid sosial şəbəkə hesablarında müxtəlif adlarla yardım kompaniyaları başladılıb:
“Sosial şəbəkələrdə geniş izləyici kütləsi olan erməni kanalları bank hesablarını paylaşaraq insanlardan yardım etmələrini xahiş edirlər. Onlar toplanan pulla tibbi lavazimat, avadanlıq və dərmanların alınacağını bildirirlər.
Alınacaq tibbi lavazimat, avadanlıq və dərmanların hamsının Azərbaycanla həmsərhəd olan bölgələr üçün göndəriləcəyi bildirilir.
Tibbi təchizatın gücləndirilməsi Ermənistanın yeni təxriibata hazırlaşdığının da anonsu kimi qəbul olunur. Əvvəlki dövrlərdə də Ermənistan oxşar aksiyalar başlatdıqdan sonra müxtəlif təxribatlara cəhdlər göstərmişdi”.
Erməni ekspertlər isə öz əməllərini ört-basdır etmək üçün, Azərbaycanın Ermənistana qarşı böyük müharibəyə hazırlaşdığını deyirlər. Onların qənaətincə, Azərbaycan son 2 ildə Kəlbəcər, Laçın və Daşkəsən rayonları istiqamətində hərbi strateji hesab edilən 334 km yeni yol çəkib.
Kəlbəcərdə bir çox yolların ya keçilməz olmasına, ya da qışda keçmək çox çətin olmasına baxmayaraq, Azərbaycan Ermənistana qarşı böyük müharibəyə hazırlaşır və bunun üçün səylərini əsirgəmədiyini qeyd edirlər.
Amerikanın “Foreign Policy” analitik nəşri 2023-cü ildə sülhlə bitmə ehtimalı olan 10 hərbi münaqişə haqda danışıb. Siyahıda Azərbaycan-Ermənistan münaqişəsinə xüsusi diqqət yetirilib. Lakin ekspertlərin fikrincə, Qarabağda yeni müharibə olacaq. Doğrudur, 2020-ci ildəki müharibə ilə müqayisədə nisbətən qısa, amma daha az dramatik olmayan bir döyüş baş verəcək. “Foreign Policy” hesab edir ki, güc balansı yenə də Azərbaycanın xeyrinədir. Onların proqnozlarına görə, Ermənistan ordusu nə qoşunlarını, nə də silahlarını artıra bilməyib, Azərbaycan isə əksinə, sürət yığır”.
Ramil Məmmədli deyir ki, Ermənistan özü bilə-bilə bu yolu seçir: “Müharibəni istəməyən ölkə, üzərinə götürdüyü öhdəlikləri yerinə yetirər və sülh içində yaşayar. Ermənistan bunun əksini edirsə, deməli, müharibəyə hazırlaşır”.
Məhəmmədəli QƏRİBLİ
