“Nəinki donor təşkilatları, heç kim bizə kömək etmir”. Bunu Prezident İlham Əliyev Dünya Azərbaycanlılarının Həmrəyliyi Günü və Yeni il münasibətilə xalqa müraciətində deyib.
Ölkə başçısının sözlərinə görə, ümid var ki, donor təşkilatları bu ədalətsizliyə son qoyacaq: “Əlbəttə, biz ümid edirik ki, beynəlxalq donor təşkilatları öz diqqətini bizə də istiqamətləndirəcəklər. Çünki bu dərəcədə böyük dağıntılar tarixdə olmayıb. Yəni, Azərbaycan böyük ekoloji fəlakətlə, urbisidlə üzləşib. Ancaq əfsuslar olsun ki, beynəlxalq donor təşkilatları bizə bir manat, ya bir dollar kömək etməyiblər. Nəinki donor təşkilatları, heç kim bizə kömək etmir, bütün bərpa işlərini öz hesabımıza aparırıq və aparacağıq”.
Maraqlıdır, beynəlxalq təşkilatlar niyə sözügedən məsələlərlə bağlı Azərbaycana yardım göstərmir?
“Böyük dövlətlər xristian təəssübkeşliyindən çıxış edərək, Azərbaycana yardım edilməsini əngəlləyirlər”
Məsələyə aydınlıq gətirən iqtisad üzrə fəlsəfə doktoru Firdovsi Şahbazovun fikrincə, bu, iqtisadi səbəblərdən çox siyasi məsələlərlə bağlı olan məsələdir: “Dünyadakı donor təşkilatları bununla bağlı təkbaşına qərar vermək iradəsində deyil. Bununla bağlı ilk növbədə siyasi istək və qərar olmalıdır. Əfsuslar olsun ki, dünyanın aparıcı dövlətləri xristian ölkələri olduğu üçün buna din aspektindən yanaşırlar. Yəni bu dövlətlər xristian təəssübkeşliyindən çıxış edərək Azərbaycana yardım edilməsini əngəlləyirlər. Bənzər dağıntılarla Ermənistan və yaxud da Gürcüstan üzləşsəydi, o zaman mənzərə tamamilə fərqli olardı. Bütün resursları səfərbər edərdilər ki, sözügedən ölkələr üzləşdikləri zərəri qarşılasınlar. Ancaq iki ildir müharibənin bitməsinə baxmayaraq, Azərbaycana hansısa yardımdan söhbət belə getmir. Halbuki, Azərbaycanda dağıntıların miqyası dəfələrlə böyükdür. İşğal dövründə təkcə yaşayış məntəqələri – kəndlər, şəhərlər yer üzündən silinməyib. Bu dövrdə həm də ölkənin flora və faunasına böyük ziyan dəyib. Meşələr məhv edilib, təbii resurslar vəhşicəsinə talanıb, nadir bitki və ağac növləri ya Ermənistana aparılıb, ya da yandırılıb. Qarabağ və Şərqi Zəngəzur iqtisadi rayonları geniş tikinti-quruculuq meydanına çevrilib. İşğaldan azad olunan torpaqlarımızda yol, enerji infrastrukturu yenidən qurulur, elektrik və su xətləri çəkilir, müasir yaşayış kompleksləri tikilir. Ancaq bütün bu işləri Azərbaycan heç kimdən yardım almadan, yalnız öz gücünə həyata keçirir. Heç bir beynəlxalq təşkilat və fond bu işdə Azərbaycana yardım etmir. Başqa bir tərəfdən bəzi beynəlxalq dairələr hesab edir ki, enerji resurslarının satışından Azərbaycan böyük gəlirlər əldə edir. Bu baxımdan yardım olmasa belə, Azərbaycan bunun öhtəsindən gələ biləcək. Bəli, bu ədalətsiz yanaşmadır, amma nə edəsən ki, belə bir dünyada yaşayırıq. Bərpa prosesi təkcə Azərbaycanın ümidinə qalsa, bu çox vaxt aparacaq. Yox, əgər beynəlxalq donor təşkilatlar, böyük dövlətlər yardım etsələr, o zaman proses daha sürətlə gedəcək. Arzu edərdik ki, böyük dövlətlər bu ədalətsizliyə son qoysunlar”.
Vidadi ORDAHALLI
