Beynəlxalq Böhran Qrupu Azərbaycanla Ermənistan arasındakı gərginliyə dair hesabat yayıb. Hesabat bir sıra məsələləri əhatə edib və təhlillərə əsasən də proqnozlar hazırlanıb.
Hesabatda bu illə bağlı proqnozda diqqət çəkən məqam odur ki, bütün şərtlər Azərbaycanın xeyrinədir. Hesabatda bütün bunlar belə əsaslandırılıb: “Birincisi, yeni müharibə daha qısa, lakin 2020-ci ildəki altı həftəlik münaqişədən az dramatik olmayacaq. O vaxtdan balans daha da Azərbaycanın xeyrinə dəyişdi. İkincisi, ənənəvi silah alverçisi olan Rusiyanın təchizat çatışmazlığı səbəbindən Ermənistan ordusu qoşunlarını və silah-sursatını artırmayıb. Azərbaycan isə əksinə, güclənir. Onun ordusu Ermənistan ordusundan bir neçə dəfə böyükdür, daha yaxşı təchiz olunub və Türkiyənin dəstəyini alır. Üçüncüsü, Avropanın Azərbaycan qazına artan tələbatı da Bakını ruhlandırır. Bu isə o deməkdir ki, Avropa Azərbaycana yeni hədəflərinə çatmaqda mane olmayacaq”.
“Burada təkcə hərbi üstünlüklərdən söhbət getmir”
Sözügedən məsələ ilə bağlı fikirlərini “Bakı-Xəbər”lə bölüşən hərbi ekspert Ramil Məmmədlinin fikrincə, hesabatda əksini tapan məqamlar reallığı əks etdirir: “Hətta deyərdim ki, Azərbaycanın üstünlüyünü şərtləndirən bir sıra faktorlar orada öz əksini tapmayıb. Ötən ilin avqustunda Qarabağda həyata keçirilən “Qisas” əməliyyatı, sentyabrda Ermənistan sərhədində baş verən toqquşmalar göstərdi ki, hər an lokal müharibə risqi var. Nəzərə almalıyıq ki, hər iki əməliyyat bizim xeyrimizə yekunlaşdı. İstər Qarabağ, istərsə də Ermənistan istiqamətində əlverişli strateji yüksəkliklər nəzarətə götürüldü. Özü də bu əməliyyatlarda yeni yaradılan komando birlikləri dağlıq relyefə uyğun olaraq özünü çox peşəkarcasına göstərdi. Nəticə göz qabağındadır. Sentyabr döyüşlərində 224 erməni əsgəri məhv edildi, əlverişli strateji yüksəkliklər nəzarətə götürüldü. Ondan əvvəl keçirilən “Qisas” əməliyyatı qarşı tərəfi məcbur etdi ki, Laçın şəhərini vaxtından əvvəl bizə təhvil versin. Bütün bu və digər məsələləri beynəlxalq təşkilatlar görür, təhlil edir. O baxımdan əminəm ki, Ermənistan öhdəliklərinə əməl etməsə, nəticə onlar üçün daha ağır olacaq. Ordumuzda aparılan islahatlar çərçivəsində yeni qoşun növləri yaradılır. Struktur müasir tələblərə uyğun formalaşdırılır. İkinci Qarabağ müharibəsində özünü doğrultmayan hərbi texnika və silahlar digərləri ilə əvəzlənir. Məhz bu təhlillərin nəticəsi idi ki, komando birlikləri yaradıldı. Başqa bir tərəfdən, burada təkcə hərbi üstünlüklərdən söhbət getmir. Söhbət həm də beynəlxalq şərtlərin Azərbaycanın xeyrinə olmasından gedir. Rusiyanın başı Ukraynaya qarışıb. Fransanın BMT Təhlükəsizlik Şurası müstəvisində Azərbaycana qarşı qərar qəbul etmək cəhdləri fiaskoya uğradı. Azərbaycanın BMT-dəki tərəfdaşları buna imkan vermədilər. Ən nəhayət, Azərbaycanın Avropanın qaz təchizatında getdikcə artan rolu yeni-yeni imkanlar açır. Bu o deməkdir ki, Fransa nə qədər canfəşanlıq etsə də, Avropa İttifaqını Azərbaycana qarşı qaldıra bilməyəcək. Bütün bunlar Avroittifaqı beynəlxalq hüquqa dayanaraq Azərbaycanın yanında olmağa sövq edəcək”.
Bu baxımdan hərbi ekspert hesab edir ki, proseslər Azərbaycanın xeyrinə inkişaf edir.
Vidadi ORDAHALLI
