İran xarici işlər naziri Hüseyn Əmir Abdullahian İranın Azərbaycandakı səfiri Seyid Abbas Musəviyə İranla Azərbaycan arasında münasibətlərin inkişaf etdirilməsi üçün tapşırıq verib. Bu barədə İranın Xarici İşlər Nazirliyi məlumat yayıb.
Sözügedən məlumata görə, İran xarici işlər naziri İran və Azərbaycanın müxtəlif siyasi, iqtisadi və mədəni sahələrdə münasibətlərinin inkişaf etdirilməsinin zəruriliyini qeyd edib: “Hüseyn Əmir Abdullahian yaxın gələcəkdə iki ölkənin birgə iqtisadi komissiyasının təşkil olunması üzrə lazımi tapşırıqlar verib. İranın Azərbaycandakı səfiri Seyid Abbas Musəvi də iki ölkənin münasibətləri və növbəti proqramlar haqda İran xarici işlər nazirinə hesabat təqdim edib”.
Məlum olduğu kimi, ötən ilin ortalarından başlayaraq, İranın günahı üzündən iki ölkə münasibətləri xeyli gərginləşib. İranın dövlət rəsmilərinin məsuliyyətsiz açıqlamaları tərəflər arasında münasibətlərin soyuqlaşmasına gətirib çıxardı.
Bütün bu deyilənlərin fonunda, bir səfir iki ölkə münasibətlərini düzəldə bilərmi? Bu nə dərəcədə realdır?
“İranın dövlət səviyyəsində Azərbaycana yanaşması dəyişmədikcə, iki ölkə münasibətlərinin düzəlməsi o qədər də asan görünmür”
Məsələyə münasibət bildirən politoloq Tural İsmayılov buna birmənalı prizmadan yanaşmadı: “Hesab edirəm ki, İran xarici işlər naziri Hüseyn Əmir Abdullahianın bu ölkənin Azərbaycandakı səfiri Seyid Abbas Musəvi ilə görüşünün heç bir əhəmiyyəti yoxdur. Çünki İran Azərbaycanla davranışlarında dürüstlük meyarlarına əməl etmir. Nəzərə almaq lazımdır ki, Azərbaycan cəmiyyətində, xüsusən də son dövrlərdə İrana qarşı antipatiyanın güclənməsinin ən böyük səbəblərindən biri bu ölkənin dövlətimizə qarşı kifayət qədər qeyri-səmimi, loyal olmayan siyasət xətti yeritməsi ilə bağlıdır. Məsələ ondadır ki, İrana bağlı olan rəsmi media platformalarında bugünə qədər Azərbaycan əleyhinə davam edən informasiya terroru dayanmır. Demək olar ki, hər gün İrana bağlı olan media resurslarında Azərbaycanın sekulyar dövlət modeli əleyhinə çağrışlar edilir. Həmçinin, Azərbaycanın inkişafı, onun gələcək potensialı təhrif edilir. Cəmiyyətin gözündən Azərbaycanı salmaq üçün müxtəlif uydurmalardan və böhtanlardan istifadə edilir. Eyni zamanda, İranın hərbi, dini rəhbərliyində təmsil olunan şəxslərin ritorikasında da Azərbaycan əleyhinə olan sərt xətt, təəssüflər olsun ki, dayanmayıb. Belə olan təqdirdə İran-Azərbaycan münasibətlərinin indiki gərgin vəziyyətə çatmağının ən böyük günahkarı birmənalı olaraq Tehran rejimidir. Molla rejimi vəziyyəti daha da düzəltmək və eyni zamanda iki ölkə arasında münasibətləri yaxşılaşdırmaq yerinə, İran Ermənistanın hamisi rolunda çıxış edib. O baxımdan inanmıram ki, Seyid Abbas Musəvi iki ölkə münasibətlərinin düzəlməsində hansısa xüsusi əhəmiyyətə malik olan bir fiqur olsun. O, əvvəlki İran səfirlərindən fərqli olaraq, bir qədər daha aktiv görünən diplomatdır. Laki bu, münasibətlərin tez bir zamanda yoluna düşəcəyi anlamına gəlmir. İranın dövlət səviyyəsində Azərbaycana yanaşması dəyişmədikcə, iki ölkə münasibətlərinin düzəlməsi o qədər də asan görünmür. İran münasibətlərin düzəlməsini istəyirsə, o zaman ölkəmizlə bağlı siyasətini dəyişməlidir. Yoxsa adi bir səfir bununla bağlı nə edə bilər ki?”.
Bir sözlə, politoloq hesab edir ki, Tehran Azərbaycanla bağlı siyasətində səmimi olmadıqca, praktiki olaraq nəsə dəyişməyəcək.
Vidadi ORDAHALLI
