“Bu cinayətləri hansısa yad planetdən gələnlər yox, sizin sevimli və himayəniz altında olan erməni xalqı törədib”. Bu barədə Prezident İlham Əliyev Qərbi Azərbaycandan olan bir qrup ziyalı ilə görüşündə bildirib.
Ölkə başçısının sözlərinə görə, ermənilərin Qarabağda törətdiyi vəhşiliklərin eynisi Qərbi Azərbaycanda törədilib, lakin dünya bunu görmək istəmir: “Ermənilər məscidləri dağıdıb, tarixi abidələri dağıdıb, qəbirləri dağıdıb, olmazın vəhşiliklər edib. Eynisini onlar Qərbi Azərbaycanda da ediblər. Sadəcə olaraq, dünya ictimaiyyəti bunu görmür, ya da ki, görmək istəmir. Necə ki, Qarabağda erməni vəhşilikləri faktiki olaraq heç kim tərəfindən təsdiqlənmirdi. Halbuki, iki dəfə ATƏT-in faktaraşdırıcı missiyası o vaxt işğal altında olan torpaqlara göndərilmişdi. Ancaq onların məruzəsinə baxdıqda, yenə də ikili standartlar görürük. Bir tərəfdən, o vəhşilikləri, dağıntıları, qanunsuz məskunlaşmanı etiraf etməyə məcbur oldular, digər tərəfdən yenə də balanslı yanaşaraq işğalçı ilə işğala məruz qalanı, necə deyərlər, bir müstəviyə qoydular”.
Bütün bunlar bir daha erməni vandalizminin əsil simasını ortaya qoyur.
“Beynəlxalq ədalət olsaydı, erməni işğalı bu qədər uzanmazdı, terrorçu Robert Köçəryan, Serj Sarkisyan...”
Sözügedən məsələni “Bakı-Xəbər”ə şərh edən politoloq Məhəmməd Əsədullazadə hesab edir ki, erməni vandalizmi öz vəhşiliyi ilə hər zaman seçilib: “O zaman Qərbi Azərbaycandan olan soydaşlarımızın öz yurdlarından qovulması əsrin faciəsi idi. Çünki o vaxta qədər dəfələrlə soydaşlarımız deportasiyaya məruz qalıblar. İllər boyu Rusiyanın apardığı imperiya siyasətinə uyğun olaraq soydaşlarımız sıxışdırıldı, tarixi Azərbaycan ərazilərində ermənilər məskunlaşdırıldı. Ən nəhayət, 1988-ci ildən başlayaraq bütün soydaşlarımız Qərbi Azərbaycandan qovuldular. Bütün bunlar o vaxt dünyanın gözü qarşısında baş versə də, əfsuslar olsun ki, aparıcı dünya dövlətləri bunu görməzdən gəldilər. Bu azmış kimi, Qarabağ və ətraf rayonların Ermənistan tərəfindən işğal olunmasına şərait yaratdılar. Artıq Azərbaycan 30 il əvvəl olduğu kimi zəif dövlət yox, qalib ölkədir. Soydaşlarımızın doğma vətənlərinə qayıtması və bunun dövlətin strateji siyasətində yer alması xüsusi əhəmiyyət kəsb edir. Prezident İlham Əliyevin bu xüsusda açıqlaması və icmanın tədbirində çıxışı bir yol xəritəsidir. Beynəlxalq təşkilatlar daima qərəzli mövqe tutacaqlar və ikili standartlardan çıxış etmək onların ana xəttidir. Həmin beynəlxalq təşkilatlar 30 il Ermənistanın işğalına göz yumdular. Məhv edilən yaşayış məntəqələrini görməzdən gəldilər. Nəticədə Azərbaycan özü prosesi həll etdi. Düşünürəm ki, bu məsələ də həll ediləcək və soydaşlarımız öz yurdlarına qayidacaq. Necə ki, işğal olunmuş əraziləri azad edərək ədaləti bərpa etdik. Eyni zamanda bu məsələ də öz həllini tapacaq. Prezident İlham Əliyev bu istiqamətdə fəal siyasət aparır və bu müsbət həll ediləcək. Ehtimal ki, Ermənistanla bağlanan sülh müqaviləsində bu məsələ yer ala bilər. Biz çalışmalıyıq ki, hər zaman öz gücümüzə arxalanaq. Beynəlxalq ədalət olsaydı, erməni işğalı bu qədər uzanmazdı, terrorçu Robert Köçəryan, Serj Sarkisyan beynəlxalq tribunalarda Ermənistanı təmsil etməzdilər”.
Vidadi ORDAHALLI
