“Biz 1990-cı illərin əvvəllərində Qarabağ münaqişəsi ilə bağlı təhrif edilmiş təsəvvürü tamamilə dəyişdirə bildik”. Bu barədə Prezident İlham Əliyev Qərbi Azərbaycandan olan bir qrup ziyalı ilə görüşündə bildirib.
Ölkə başçısı informasiya müharibəsi ilə bağlı çox önəmli məqamı xüsusi qeyd etdi: “İcmanın bundan az əhəmiyyət kəsb etməyən beynəlxalq müstəvidə fəaliyyəti olmalıdır. Çünki biz bu həqiqətləri dünya ictimaiyyətinin diqqətinə çatdırmalıyıq, necə ki, Qarabağ həqiqətlərini çatdırmışdıq. Faktiki olaraq biz 1990-cı illərin əvvəllərində Qarabağ münaqişəsi ilə bağlı təhrif edilmiş təsəvvürü tamamilə dəyişdirə bildik. İnformasiya müharibəsi və İkinci Qarabağ müharibəsi onu göstərdi ki, bu, az əhəmiyyət kəsb etmir. Ona görə burada da İcmanın xaricdəki fəaliyyəti xüsusi önəm daşımalıdır. Sərgilər, təqdimatlar, beynəlxalq konfranslar keçirilməlidir. Xarici ölkələrin siyasi dairələri, mətbuat və qanunvericilik orqanları ilə təmaslar qurulmalıdır. Yəni biz haqlı olaraq öz hüququmuzu tələb etməliyik. Bu, bütün beynəlxalq konvensiyalarda təsbit edilmiş hüquqdur”.
“Bütün bunları xarici ölkələrdə təbliğ etmək lazımdır”
Məsələyə münasibət bildirən media eksperti Yadigar Məmmədlinin fikrincə, Prezident Qərbi Azərbaycandan olan ziyalılarla görüşdə çox önəmli məsələləri gündəmə gətirdi: “Bəli, həqiqətən də 90-cı illərin əvvəllərində erməni tərəfi yaranmış vəziyyətdən sui-istifadə edərək Qarabağla bağlı yanlış ictimai rəy formalaşdırmışdı. Nəticədə Azərbaycan haqlı olduğu halda, haqsız duruma düşmüşdü. Ancaq nə qədər çətin olsa da, zamanla biz informasiya müharibəsində vəziyyəti öz xeyrimizə dəyişə bildik. Qarabağla bağlı erməni yalanlarını ifşa edə bildik. İlk öncə biz beynəlxalq hüquqa dayanaraq BMT-nin və digər beynəlxalq təşkilatların qəbul etdiyi qərarları gündəmə gətirdik. Müxtəlif beynəlxalq konfranslarda bunu müzakirə predmetinə çevidik. Nəticədə əlverişli məqam yarandı və ərazilərimizi işğaldan azad etdik. O üzdən, bənzər formada Qərbi Azərbaycan həqiqətlərini də dünya gündəminə gətirməliyik. İlk baxışdan Qərbi Azərbaycana qayıdış kimlərəsə fantastik görünə bilər, amma bunu reallaşdırmaq mümkündür. Bəli, bu asan olmayacaq, amma mümkündür. İlk növbədə Qərbi Azərbaycanla bağlı arxiv materiallarını ortaya çıxarmaq lazımdır. Daha sonra onları mükəmməl şəkildə sistemləşdirmək, beynəlxalq dillərə tərcümə etmək lazımdır. Eyni zamanda, bunu xarici ölkələrdə təbliğ etmək lazımdır. Artıq bu istiqamətdə iş gedir. Belə ki, 1988-ci ildə Qərbi Azərbaycandan deportasiya olunanların siyahısı yenidən aparılır. Onlara dəyən maddi ziyan hesablanır. Çünki məlum hadisələr zamanı onların əmlakı əllərindən alınıb. Əminəm ki, bütün bu məsələlərlə bağlı sistemli iş aparılandan sonra dünya birliyi bizimlə hesablaşacaq və Qərbi Azərbaycandan qovulmuş soydaşlarımızın geri dönüşü ilə bağlı Ermənistana təzyiqlər artacaq. Düzdür, ikili standartlar, xristian amili və digər faktorlar üzündən bu, o qədər də asan olmayacaq. Ancaq sözügedən işlər görüləndən sonra biz dünyanı fakt qarşısında qoyacağıq”.
Vidadi ORDAHALLI
