Prezident İlham Əliyevin dekabrın 24-də Qərbi Azərbaycandan olan ziyalılarla görüşü zamanı irəli sürdüyü Qayıdış Konsepsiyası ilə bağlı Qərbi Azərbaycan İcmasında dərhal işə başlanılıb.
Bunu Qərbi Azərbaycan İcmasından bildiriblər. Qayıdış Konsepsiyanın hazırlanması istiqamətində iş aparıldığını söyləyən mətbuat katibi deyib: “İcma olaraq, bu Konsepsiyanı vaxtında yekunlaşırmağa çalışacağıq. Konsepsiya hazır olandan sonra Qərbi Azərbaycan İcması fəaliyyətini bu sənədə əsasən davam etdirəcək”.
Bu Konsepsiyada əsasən nələr nəzərə alınmalıdır?
Əslən Qərbi Azərbaycandan olan politoloq Qabil Hüseynli “Bakı-Xəbər”ə açıqlamasında bildirdi ki, ölkə Prezidenti çox böyük cəsarət nümayiş etdirdi: “Bu cəsarət əzəli və tarixi torpaqlarımız olan Qərbi Azərbaycana qayıdış proqramının ideyasının irəli sürülməsidir. Artıq bir müddətdir ki, Qərbi Azərbaycan icması formalaşır. Bu icmanın fəaliyyəti üçün dövlət tərəfindən lazım olan hər cür şərait yaradılıb. İndi Qərbi Azərbaycana qayıdış konsepsiyası üzrə iş gedir. Ümid edirəm ki, bir çox şey Qayıdış Konsepsiyasında aydınlanacaq. Bu Konsepsiyada nələr nəzərə alınmalıdır? İlk olaraq bu ideya təkcə ölkə miqyasında deyil, bütün dünyada ictimai rəyə yeridilməlidir. Dünya bilməlidir ki, Ermənistanın dağltdığı ərazilər birbaşa Qərbi Azərbaycan torpağı olub və orada Azərbaycan türkləri məskunlaşıb. Yəqin ki, müxtəlif dillərdə kitablar nəşr ediləcək. Həmin ərazilərin tarixi toponomikası yenidən araşdırılacaq. Ermənilərin son dövrlərdə izlərini sildiyi nadir mədəniyyət nümunələrinin siyahısı da çıxarılacaq. Və bir sözlə, oraya olan iddiaların ciddi sürətdə əsaslandırılması və ərsəyə gətirilməsi lazımdır. Bundan başqa ermənilərin özlərinin də bununla bağlı müəyyən fikirləri olacaq. Yəni erməni ideologiyasını, ermənizmi məğlub etmək üçün geniş ideoloji , siyasi işə başlanılmalıdır. Bu işin əsas istiqamətləri müəyyənləşdirilməlidir və Konsepsiyaya uyğun olaraq həm Ermənistanda hakim ideologiya kimi fəaliyyət göstərən ermənizmə ciddi zərbələr olmalıdır, həm də bu torpaqlarda qədimdən yaşadığımızı ciddi və əsaslandırılmış faktlarla ortaya qoymalıyıq. Bu zəmində bizim bu torpaqlara qayıdışımızın əsaslandırılmış konsepsiyası irəli sürülməlidir”.
Politoloq hesab edir ki, buna görə də Qərbi Azərbaycan İcması, o cümlədən beynəlxalq müstəvidə fəaliyyətini intensivləşdirməlidir: “Xarici ölkələrin siyasi dairələri, mətbuat və qanunvericilik orqanları ilə təmaslar qurulmalıdır. Azərbaycan bütün imkanlarını səfərbər edib haqlı olaraq öz hüququnu tələb etməlidir. Qərbi azərbaycanlıların öz tarixi torpaqlarına qayıdışı xalqımızın bütün beynəlxalq konvensiyalarda təsbit edilmiş hüququdur və bu hüquq təmin edilməlidir. Bu məqsədlə Qərbi Azərbaycana Qayıdış Konsepsiyasının hazırlanması ideyası müdrik fikirdir və cənab Prezident İlham Əliyevin rəhbərliyi ilə tezliklə mükəmməl bir sənədin hazırlanacağı artıq heç kimdə şübhə doğurmur. Dövlət başçımızın dediyi kimi, qərbi azərbaycanlılar qanunsuz olaraq dəfələrlə deportasiyaya məruz qalmış toplumdur. Onların hüquqları bərpa edilməlidir və onlar öz doğma torpaqlarına qayıtmalıdırlar”.
Məhəmmədəli QƏRİBLİ
