İlham Əliyevlə Nikol Paşinyanın Sankt-Peterbuqrda görüşü keçirilməyəcək, hərçənd, Peskov “tərəflər istəsə, görüş təşkil oluna bilər” demişdi. Belə nəticə çıxarmaq olar ki, tərəflərdən Ermənistan görüşdən yayınıb. Təbiidir ki, bunlar səbəbsiz deyil. Əslində İrəvan “Laçın yolu”nun açılmasını bu qədər istəyirsə, XİN rəhbərlərinin də, liderlərin də görüşündə maraqlı olmalı idi. O halda niyə təmaslardan imtina edir?
Bu, Ermənistanın öz seçimidir, yoxsa Qərbdəki dostlarının təkidi ilə belə addım atır?
Siyasi şərhçi Sahil Kərimli “Bakı-Xəbər”ə açıqlamasında bildirdi ki, Ermənistan baş naziri Nikol Paşinyan qeyri-konstruktiv mövqeyi ilə danışıqlar prosesini pozmağa davam edir və bu addım bölgədə sülh və təhlükəszilik üçün ciddi təhdiddir: “Paşinyanın bu məsuliyyətsiz hərəkətləri gec və ya tez bölgədə yeni müharibə ocağını alovlandıra bilər. Məlumdur ki, Azərbaycan dövləti Qarabağda fəaliyyət göstərən separatçı qalıqların ləğv edilməsini, terrorçu erməni sialahlı dəstələrinin ərazidən çıxarılmasını və digər qanunsuz əməllərə son qoyulmasını tələb edir. Ermənistan isə, təəssüf ki, üzərinə götürdüyü öhdəliklərə əməl etmir, separatçı meyllər ortaya qoyur. Bütün bunlar sülhə aparan yolda əngəllər törədir, Azərbaycanı güc tətbiq etmək məcburiyyətində buraxır. Sirr deyil ki, son aylarda danışıqlar prosesini pozan tərəf konkret olaraq Ermənistandır. Paşinyan bundan əvvəl də görüşdən imtina etmişdi. Bu günlərdə liderlərin Sankt Peterburqda ehtimal edilən görüşündən də, çox güman, Paşinyan boyun qaçırıb. Əlbəttə ki, Paşinyan bu siyasi gedişlərdə müstəqil deyil. Onu bəzi beynəlxalq qüvvələrin idarə etdiyi açıq məlumdur. Fransa, Rusiya və digər ölkələrdəki dairələr Paşinyanı oyuncaq kimi istifadə edir və bununla öz maraqlarına nail olmağa çalışırlar. Bu da, təbiidir ki, Azərbaycanın sürətlə güclənməsini, qüdrətlənməsini və dünya liderinə çevrilməsini istəməyən qüvvələrin ölkəmizə növbəti təzyiq metodudur. Ermənistan, təəssüf ki, bu reallıqları anlamaq istəmir. Paşinyan erməni xalqının taleyini düşünmür, onun tək istəyi havadarlarının tapşırıqlarını canla-başla yerinə yetirməkdir”.
Sahil Kərimli hesab edir ki, Bakı qəbul etməsə də, Paşinyan Fransanın vasitəçiliyinə, o cümlədən, üçtərəfli razılaşmalardan yayınmaq və Qarabağdakı separatçıları “qəbul edilməsi” məsələsində Parisin dəstəyinə ümid edir, eyni zamanda, BMT TŞ-də gözlənilən növbəti müzakirələrlə Bakının təkcə Laçın yolu məsələsində yox, sülh müqaviləsində də geri düşə biləcəyini ehtimal edir. Anlayır ki, Rusiya masasında sülh müqaviləsinin müzakirəsi Əliyevin üçtərəfli razılaşmaların icrası tələbinin kölgəsində keçəcək”.
Məsələ burasındadır ki, Ermənistan sülh müqaviləsi imzalanmadan yerdə qalan problemlərin, eləcə də Laçın dəhlizinin taleyini birmənalı həll etməyin mümkün olmayacağını başa düşməlidir. Ona görə də sülh müqaviləsi imzalamağa can atmalıdırlar. Azərbaycan da buna adekvat reaksiya göstərəcək.
Ermənistan həmişə kimsə tərəfindən qəyyumluğa götürülməyə, kimlərdənsə məsləhət və tövsiyə almağa adət edib. Ona görə də onun bu hərəkətində qeyri-adi heç nə yoxdur. Görünür, ağaları onu bu yola itələyir.
Məhəmmədəli QƏRİBLİ
