Bildiyimiz kimi, Qərbi Azərbaycan İcması artıq ciddi şəkildə fəaliyyətə başlayıb və öz proqramını açıqlayıb. Prezident İlham Əliyev Qərbi Azərbaycandan olan bir qrup ziyalı ilə görüşdə Qərbi Azərbaycan İcmasının qarşısında duran vəzifələr barədə danışdı və soydaşlarımızın öz ata-baba yurdlarına dinc şəkildə qayıdışının təmin ediləcəyi barədə fikirlər bildirdi.
Əlbəttə, ölkə başçısının hər bir bəyanatı tamamilə reallığa söykənir və gerçəkləşməsi heç bir şübhə doğurmur. Bu baxımdan, qərbi azərbaycanlıların da geri dönüşünün yüksək səviyyədə təşkil ediləcəyi şübhəsizdir.
“Hazırda Qərbi Azərbaycandan olan soydaşlarımızın bir xeyli hissəsi dünyanın müxtəlif ölkələrində yaşayıb fəaliyyət göstərir”
Qərbi Azərbaycan İcmasının İdarə Heyətinin sədri, Milli Məclisin deputatı Əziz Ələkbərli “Bakı-Xəbər”ə ötən müsahibəsində çox maraqlı açıqlama verib. Ə.Ələkbərli bizimlə söhbətində qeyd edib ki, Qərbi Azərbaycan İcmasının fəaliyyəti ölkə içi ilə məhdudlaşmayacaq. O vurğulayıb ki, İcmanın görəcəyi işlər sırasında xarici ölkələrin hamısında Qərbi Azərbaycan İcmasının ofisini formalaşdırmaq da dayanır. Bunun artıq planlaşdırıldığını deyən Ə.Ələkbərlinin sözlərinə görə, xaricdəki Azərbaycan diasporunun bütün üzvlərinin bu məsələyə səfərbər olunmasını təmin etməyə çalışacaqlar ki, dünya bütün bu həqiqətlərdən, Qərbi Azərbaycan həqiqətlərindən xəbərdar olsun. “Bundan əlavə, xarici ölkələrin, demək olar ki, hamısında Qərbi Azərbaycan İcmasının ofislərini yaratmağı planlaşdırmışıq. Xaricdə olan Azərbaycan diasporunun bütün üzvlərinin bu məsələyə səfərbər olunmasını təmin etməyə çalışacağıq ki, dünya bütün Qərbi Azərbaycan həqiqətlərindən halı olsun”-deyə Ə.Ələkbərli qeyd edib.
“Türk Dünyası İnfo” İctimai Birliyinin rəhbəri, Atatürk Mərkəzinin baş redaktoru Dəyanət Osmanlı bizimlə söhbətində bildirdi ki, Qərbi Azərbaycan həqiqətlərinin dünyaya çatdırılması baxımından icmanın fəaliyyətinin beynəlxalq aləmi əhatə etməsi çox vacibdir. O hesab edir ki, Ermənistanın soydaşlarımızı deportasiya etməsi faktının bütün dünyaya çatdırılması üçün xarici ölkələrdə Qərbi Azərbaycan İcmasının ofislərinin açılması çox vacibdir və bu yöndə görüləcək işlər təqdirəlayiqdir. “Qərbi Azərbaycan icmasının İnzibati binasının açılması hadisəsini yüksək qiymətləndirirəm. Dəfələrlə azərbaycanlılar tarixi yurdlarından deportasiya ediliblər. Millətimizə qarşı bu planları vaxtilə sovet hakimiyyətinin başında duran erməni və ermənipərəst qüvvələr düşünüb həyata keçiriblər. Ermənilərin torpaqlarımızda yerləşməsi, ya da qədim yaşayış məskənlərimizin onlara və İrana güzəştə gedilməsi bağışlanmaz səhvlərdir.
Cənubi Qafqazda ermənilərin yerləşdirilməsi üçün məhz Azərbaycanın seçilməsi nə təsadüfi, nə də anlaşılması çətin məsələdir. Ortada aşkar türk düşmənçiliyi var ki, bu da millətlərin yaranış dövrünə kimi gedib çıxır. Hər zaman Azərbaycanın regionda güclənib söz, nüfuz sahibi olmasından xoflanıblar. Çünki Azərbaycan türk birliyinin açarı olan dövlətdir. Bunu bugünkü proseslər də sübut edir. Ölkəmizin Qarabağda Ermənistan üzərində qələbəsi tarixi torpaqlarımıza sahiblik hissinin gerçək ifadəsidir. İndi düşmən qüvvələrin qorxusu budur ki, Azərbaycanın güclənməsi, Türk dünyasına sürətli inteqrasiyası gələcəkdə bugünkü Ermənistanın yerləşdiyi və başqa ölkələrin əsarətində olan tarixi torpaqlarının taleyi barədə ciddi düşünməsinə gətirəcək. Bu baxımdan, Qərbi Azərbaycan icmasının yaradılmasının hədəfləri torpaqlarımızın bütövlüyünə hesablanıb.
Cənab Prezident İlham Əliyev açılış mərasimində xalqımızın tapdanmış haqlarından, işğal olunmuş torpaqlarından danışaraq, eyni zamanda tarixi ədalətin bərpasının prioritet istiqamətlərini bəlirlədi. Həm də icmanın, diaspora təşkilatlarımızın bu məsələdə həqiqətlərin dünyaya çatdırılmasıda fəallığının artırılmasını gündəmə gətirdi: “Qərbi Azərbaycan tarixi Azərbaycan diyarıdır, şəhərlərin, kəndlərin adları Azərbaycan mənşəlidir və biz yaxşı bilirik ki, indiki Ermənistan ərazisində tarix boyu Azərbaycan xalqı yaşayıb. İndi əsas vəzifə ondan ibarətdir ki, dünya ictimaiyyəti də bunu bilsin. Artıq bu istiqamətdə işlər başlamışdır.”
Hazırda Qərbi Azərbaycandan olan soydaşlarımızın bir xeyli hissəsi dünyanın müxtəlif ölkələrində yaşayıb fəaliyyət göstərir. Əlbəttə ki, onların da vətəndaş amalı Azərbaycanın bütölüyüdür. Ona görə də Azərbaycan və Türkiyənin, eləcə də digər Türk dünyası ölkələrinin diaspor təşkilatları arasında əlaqələr daha da möhkəmləndirilməli, milli-mədəni, ideoloji məsələlərdə həlledici platforma ortaya qoyulmalıdır. Xaricdə Qərbi Azərbaycan icmasının nümayəndəliklərinin yaradılması işi də gerçək tələblərdən irəli gəlir”.
D.Osmanlı hesab edir ki, ancaq bu nümayəndəliklər türk dövlətlərinin ictimai qurum və birlikləri ilə sıx əməkdaşlıq etməlidir. D.Osmanlının fikrincə, məhz dövlətlərimizin və xalqlarımızın həmrəyliyinə yönəlik fəaliyyətlərdə bulunan təşkilatlar vasitəsi ilə və dövlətimizin ideoloji-ictimai prinsipləri əsasında biz dünya ictimai rəyinə təsir göstərmək imkanlarımızı reallaşdıra bilərik: “Və inanıram ki, gec-tez Azərbaycan öz haqlı hədəflərinə nail olacaq”.
İradə SARIYEVA
