Məlum olduğu kimi, 2 ildir Vətən müharibəsi başa çatıb. Müharibədən sonra Azərbaycanın üzləşdiyi ən ciddi məsələ mina problemidir. Çünki ərazilərimiz kütləvi şəkildə minalanıb. Ermənistan real mina xəritələrini Azərbaycana vermir. Ən son məlumata görə, müharibədən sonra ötən müddət ərzində Azərbaycanda mina partlaması nəticəsində 45 nəfər həlak olub (35 nəfər mülki şəxs, 10-u hərbi qulluqçu), 231 nəfər müxtəlif dərəcəli xəsarətlər alıb (88 nəfər mülki şəxs, 143 nəfər hərbi qulluqçu).
Ən təəccüblüsü odur ki, hələ indi Avropa İttifaqı rəsmiləri bəyan ediblər ki, qurum Azərbaycana minatəmizləmə fəaliyyəti üçün ayrılan yardımı artıracaq. Aİ-nin Azərbaycandakı missiyasının rəhbəri, səfir Peter Mixalko bildirib ki, bununla bağlı məsələ gündəmdədir: “Azərbaycana minaların təmizlənməsində yardımı davam etdirəcəyik və inanırıq ki, bu dəstəyin həcmi artacaq”.
Halbuki, Ukraynada hələ müharibə bitməyib, Aİ-nin bu ölkəyə etdiyi milyardlarla yardımın 100 milyon avroya yaxını minaların təmizlənməsi ilə bağlıdır. Azərbaycana gəldikdə isə hələ vəd verirlər. İndiyəcən də verdikləri vəsait çox cüzidir.
“Qərbin sözügedən məsələdə Azərbaycana göstərdiyi biganəlik ikili standartların davamıdır”
Məsələyə münasibət bildirən hərbi ekspert İbrahim Rüstəmlinin fikrincə, belə ədalətsiz yanaşmaya geniş müstəvidən yanaşmaq lazımdır: “Bu, təkcə mina ilə bağlı olan məsələ deyil. Otuz il ərzində ərazilərimiz Ermənistanın işğalı altında qaldı. Ancaq bütün bunlara baxmayaraq nə BMT-nin 4 qətnaməsi, nə də digər qərarlar kiminsə yadına düşdü. O cümlədən, Avropa İttifaqı məlum qərarların icrasını gündəmə gətirmədi. Əksinə, bizi günahkar çıxartmağa çalışdılar. Azərbaycana qarşı 907-ci Düzəliş qəbul olundu və s. Minaların təmizlənməsi məsələsində də Qərbin Azərbaycana göstərdiyi biganəlik ikili standartların davamıdır. Ona görə də məsələnin kökü bununla bağlıdır. Məlum məsələdir ki, Ukraynaya bir sıra məsələlərdə, o cümlədən minaların təmizlənməsində böyük dəstək var. Bunun bir sıra səbəbləri var. Başlıcası odur ki, Ukrayna xristian dövlətidir. Avroittifaq da bir xristian klubudur. Belə olmasaydı, Türkiyəni Aİ-yə üzvlükdən kənarda saxlamazdılar. İkincisi, Ukrayna Avropada olduqca böyük strateji əhəmiyyətə malikdir. Belə bir coğrafi məkanda yerləşən ölkəni Rusiyaya güzəştə getmək istəmirlər. Avropa Rusiyadan qorunmaq üçün Ukraynadan bir bufer zonası kimi istifadə edir. Ona görə də Ukraynada Rusiya ilə vuruşan tərəf ABŞ başda olmaqla Qərbdir. Əks təqdirdə Ukraynanın Rusiya qarşısında duruş gətirməsi çətin olardı. Üçüncüsü, Avropa İttifaqı üçün Azərbaycan vətəndaşlarının həyatı önəm kəsb etmir. Onlar üçün bu əhəmiyyət kəsb etsəydi, o zaman mina xəritələri ilə bağlı Ermənistana təzyiq göstərərdilər. Minaların təmizlənməsinə texniki və maddi yardım göstərərdilər. Ona görə ki, minaların təmizlənməsi həm uzun müddət tələb edir, həm də böyük vəsait. Zatən Aİ rəsmiləri bunu yaxşı bilir. Ən azından ona görə ki, birinci və ikinci dünya müharibələrində basdırılan minalardan hələ də Avropa əziyyət çəkir. Baxmayaraq ki, aradan illər keçib. Azərbaycana gəldikdə hər dəfə bir bəhanə uydururlar. Əgər Ermənistanda minalar basdırlsaydı, o zaman Avroittifaq bu məqsədlə milyardlarla vəsait ayırardı”.
Bu baxımdan hərbi ekspert hesab edir ki, mina məsələsində Avropadan nəsə gözləməyə dəyməz.
Vidadi ORDAHALLI
