Paşinyan növbəti dəfə sərsəm bəyanat səsləndirib. Hökumətin iclasında Laçın yolu ilə bağlı yaranmış gərginliyə toxunan erməni baş nazir Azərbaycanda yaşayan erməniləri girov kimi təqdim edib.
O, dezinformasiya yayaraq, guya burada 120 min erməninin yaşadığını vurğulayıb: "Azərbaycanın Laçın dəhlizini bağlamasından sonra Qarabağın yüz mindən çox sakini "girov" statusunda qalıb".
Daha sonra o bir az da irəli gedərək qeyd edib ki, son günlər Qarabağda humanitar vəziyyət kəskin şəkildə pisləşib. Əvvəlcə Laçın dəhlizində nəqliyyatın hərəkəti, sonra isə qaz verilişi dayanıb. Nəticədə ermənilər sərbəst hərəkət edə bilmirlər, qış şəraitində mənzillərinin qızdırılması problemi ilə üzləşiblər və xeyli insan yollarda qalıb. Paşinyan inanılmaz dərəcədə şişirdilmiş rəqəmlər səsləndirərək deyib ki, təhsil müəssisələrində qazın kəsilməsi səbəbindən guya 22 minə yaxın uşaq təhsil almaq imkanından məhrum olub.
Separatçıların nəzarətində olan ərazilərimizdə heç 40 min erməni yaşamır. O zaman 22 min uşaq hardan çıxdı?
“Qarabağın separatçıların nəzarətində olan hissəsində yaşayan ermənilərin sayı hardasa 30 min nəfərin ətrafında dəyişir”
Məsələyə münasibət bildirən “İki sahil” qəzetinin baş redaktoru Vüqar Rəhimzadənin fikrincə, bütün bunlar Paşinyanın anormal dərəcədə populist olmasından xəbər verir: “Əslində, onun belə danışması prinsipcə, o qədər də təəccüblü deyil. Ona görə ki, bu adam hələ hakimiyyətə gəlməzdən əvvəl belə qeyri-ciddi fikirlər səsləndirirdi. Müxalifətdə olduğu dönəmlərdə reallıqla uzlaşmayan vədlər verirdi. Daha sonra erməni cəmiyyəti populist fikirlərinə aldanaraq onun dalınca getdi. Bir müddət sonra o, hakimiyyətə gəldi. Əslində həmin vaxt erməni cəmiyyətinin başqa seçim imkanı yox idi. Ona görə ki, 20 il hakimiyyətdə olan Köçəryan-Sarkistan cütlüyü Ermənistanda əhalini boğaza yığmışdı. O üzdən, naçarlıqdan 2018-ci ildə Paşinyana stavka etdilər. Lakin çox keçmədi ki, erməni cəmiyyəti aldandığını gördü. Çünki onun hakimiyyətə gəlməzdən əvvəl verdiyi şirnikləndirici sosial-iqtisadi vədlər havada qaldı. Bu, əhalinin sosial vəziyyətinin yaxşılaşmasına gətirib çıxarmadı. Eyni zamanda Paşinyanın Qarabağla bağlı vədləri də populizm xarakterli idi. Qeyri-obyektiv və sərsəm fikirlərdir. Bəlli olur ki, həmin fikirlər indi də səsləndirilir və bu qeyri-ciddilik Paşinyanda bir alışqanlıq səviyyəsindədir. Bu adam o dərəcədə anormal statistik rəqəmlər səsləndirir ki, təəccüblənməyə bilmirsən. Qarabağın separatçıların nəzarətində olan hissəsində yaşayan ermənilərin sayı hardasa 30 min nəfərin ətrafında dəyişir. O zaman necə olur ki, orada 120 min əhali yaşasın? Ərazilərimiz işğal altında olan dövrdə Ermənistan tərəfi iddia edirdi ki, Qarabağda 150 min erməni yaşayır. Ancaq hələ o zaman bu rəqəm ciddi qəbul edilmirdi. Çünki orada yaşayan ermənilərin sayı bundan az idi. Müharibədən sonra isə Qarabağdakı ermənilərin sayı kəskin şəkildə azaldı. Baxmayaraq ki, Rusiya sülhməramlıları onları geri qaytarmaq üçün bütün vasitələrə əl atdılar. Ancaq bu, nəyisə dəyişə bilmədi. Çünki Azərbaycan Vətən müüharibəsində nəinki ətraf 7 rayonu, keçmiş Dağlıq Qarabağ Muxtar Vilayətinin əhəmiyyətli hissəsini işğaldan azad edib. Minlərlə erməni Şuşada və digər azad olunmuş yaşayış məntəqələrində qanunsuz olaraq məskunlaşmışdı. O zaman 120 min erməni, 22 min şagird hardan çıxdı? Bu, Paşinyanın növbəti uydurmasından başqa bir şey deyil. Azərbaycan Qarabağ ermənilərinin qaz təchizatını kəsməyib. Bu, ölkəmizə yönəlik bir iftiradır”.
Bütün bunlardan çıxış edən baş redaktor hesab edir ki, Paşinyanın səsləndirdiyi fikirlərə ciddi yanaşmaq lazım deyil.
Vidadi ORDAHALLI
