“Hər bir aksiya iştirakçısının qayğısı diqqətlə izlənilir və qarşılanır”
Şuşa ərazisində Rusiya sülhməramlılarının nəzarətində olan yolun bir hissəsində azərbaycanlı aktivistlər və ekologiya üzrə qeyri-hökumət təşkilatlarının (QHT) üzvləri Qarabağ iqtisadi rayonunda ekoloji terrora son qoyulması tələbi ilə etiraz aksiyası keçirir.
Etirazçıların tələbi Qarabağ iqtisadi rayonunda müvəqqəti yerləşdirilmiş Rusiya sülhməramlı qüvvələrinin komandanı general-mayor Andrey Volkovun əraziyə gəlməsidir.
Son məlumatları almaq, ordakı vəziyyətin necə olduğunu öyrənmək üçün aksiya iştirakçısı, Azərbaycan Mətbuat Şurasının İdarə heyətinin üzvü Hacıbəy Heydərli ilə əlaqə saxladıq. Həmkarımızla müsahibəni təqdim edirik:
- Rusiya sülhməramlılarının müvəqqəti nəzarətində olan ərazilərdə faydalı qazıntı yataqlarına, xüsusilə Qızılbulaq qızıl və Dəmirli mis-molibden yataqlarının qanunsuz istismarına etiraz olaraq eko-fəallar, jurnalistlər və QHT təmsilçiləri Şuşa-Laçın yolunda aksiya keçirir. Siz də bu aksiyada iştirak edirsiz. Aksiyaya neçə gündür qoşulmusuz?
- Dekabrın 12-də aksiyaya start verilib. Aksiyanın 2-ci günündən etibarən mən iştirak edirəm. Aksiya yüksək əhval-ruhiyyə ilə davam edir. Hazırda aksiyada 200-dən çox etirazçı var. QHT nümayəndələri, ictimai xadimlər, könüllü gənclər, jurnalistlər Xankəndi yaxınlığında etirazlarda iştirak edirik. İlk gündən bugünə kimi aksiya iştirakçılarının şüarı eynidir. Biz öz əbədi və əzəli torpaqlarımızda erməni separatçıların ekoloji terroruna yox deyirik. Eyni zamanda, bizim digər tələbimiz sülhməramlıların rəhbəri general-mayor Andrey Volkovun əraziyə gəlməsidir. Azərbaycan nümayəndə heyətinin məlum ərazidə monitorinq keçirməsinə icazə versinlər.
- Sülhməramlıların davranışlarında azərbaycanlılara qarşı qəzəb, hər hansı bir xoşagəlməz münasibət hiss olunurmu?
- Aksiyanın ilk günlərində sülhməramlıların davranışında aqressiya, qəzəb var idi. Ancaq növbəti günlərdə aksiya iştirakçılarının fəallığı, dayanmadan, usanmadan tələblərini səsləndirməsi sülhməramlıların münasibətini dəyişdirdi. Artıq onlarda bizə qarşı kin-küdürət hiss edilmir. Bu günlər ərzində aksiya iştirakçıları ilə sülhməramlılar arasında hər hansı bir ziddiyət, xoşagəlməz hal baş verməyib. Dekabrın 14-də Dünya Çempionatının yarımfinalında Fransa ilə Mərakeşin oyunu canlı yayımlanırdı. Futbol oyununu izləmək üçün ərazidə nəhəng monitor quraşdırıldı. Sülhməramlılar da bizlə birlikdə həmin oyunu izlədilər.
- Xarici media mənsubları aksiyanı işıqlandırmaq üçün ora gəlibmi? Gəliblərsə, onlar Azərbaycanın tərəfindədirlər, ya Ermənistanın?
- Bəli, aksiyanı işıqlandıranlar arasında xarici media nümayəndələri var. Qardaş Türkiyənin media təmsilçiləri hər zaman olduğu kimi yanımızdadır. “Haber Global”, “Anadolu Ajansı”, “TRT” kanalının nümayəndələri durmadan canlı yayımlar edir, sujetlər hazırlayır. 44 günlük Vətən müharibəsində olduğu kimi, Türkiyə media nümayəndələri yenə də bizim yanımızdadır və öz dəstəklərini nümayiş etdirirlər. Ancaq başqa ölkələrin jurnalistləri burda yoxdur. Yol bağlı olduğu üçün gələ bilməyiblər. Aksiyanı işıqlandıranlar arasında rus media təmsilçiləri də yoxdur.
- Aksiya barəsində Ermənistan mətbuatında müxtəlif məlumatlar yayılır. Bu məlumatlar barədə nə deyə bilərsiz?
- Aksiyanın ilk günündən etibarən Ermənistan və Fransa mətbuatında məqalələr yayılır ki, guya bu yol Azərbaycan QHT nümayəndələri tərəfindən bağlanıb. Ancaq biz müşahidə etdik ki, yolu sülhməramlılar bağlayıb. Onu da deyim ki, Ermənistan mətbuatının bugünkü sayında aksiya ilə bağlı fake məlumat yayılıb. Qeyd edilib ki, guya Ruben Vardanyan tərəfindən sabah aksiya dayandırılacaq və aksiya iştirakçıları oranı tərk edəcək. Ermənistan mətbuatı əhalini sakitləşdirmək üçün belə məlumat yayıb. Ancaq bu düzgün məlumat deyil. Aksiya iştirakçıları piketi dayandırmaq haqqında düşünmür. Bizim aksiyamız davam edir. Hər bir aksiya iştirakçısı qeyd edir ki, tələblərimiz yerinə yetirilənə qədər buranı tərk etməyəcəyik. Mən deyərdim ki, erməni mətbuatı məlum xəbəri yayandan sonra aksiya iştirakçıları daha da fəallaşıb, çoxlu sayda gənc aramıza qatılmaq üçün Bakıdan bura gəlir.
- Xarici işlər naziri Ceyhun Bayramov mətbuata açıqlamasında bildirib ki, aksiyadakı fəallar orada yaşayan erməni əhalisinə öz kontaktlarını elan edərək humanitar məqsədlərlə yardım edə biləcəklərini qeyd ediblər. Ermənilər bu dəstəyi necə qarşıladı?
- Humanitar məqsədlə məlum yoldan rus sülhməramlılarına aid kontingentlər keçir. Onlara aksiya iştirakçıları heç bir meneə törətmədi. Həmin nəqliyyat vasitələri keçərkən bütün aksiya iştirakçıları kənara çəkilərək həmin avtomobillərin hərəkət etməsinə köməklik etdilər. Aksiya iştirakçıları ilk gündən bəri bildirir ki, Xankəndidə yaşayan ermənilər Azərbaycan vətəndaşlarıdır. Biz hətta onları bu aksiyaya qoşulmağa dəvət etdik. Hesab edirəm ki, ağlı başında olan erməni bu çağırışa biganə yanaşmaz və Azərbaycanın sülh çağırışlarına adekvat reaksiya verər. Məndə olan məlumata görə, bəzi ermənilər aksiya iştirakçılarından yardım istəyir, onlara köməklik edilməsini arzu edirlər. Biz onların məlum köməklik çağırışına yox demirik. Onlar da bizə qoşulsun, “Ekoterrora yox” desinlər. Nəzərə almaq lazımdır ki, ekoloji terror qlobal bir məsələdir. Bu humanist, sülhpərvər aksiyadır.
- Hazırda aksiya iştirakçılarının əhval-ruhiyyəsi necədir?
- Dekabrın 12-dən bu günə kimi aksiya iştirakçılarının əhvalı yüksək səviyyədədir. Hər bir aksiya iştirakçısı tək amal üçün burdadır.
- Aksiya iştirakçıları arasında gənclər də var. Onların bu aksiyaya münasibəti hansı səviyyədədir?
- Mən sizə deyim ki, gənclərimiz daha çox aktivlik nümayiş etdirir. Aksiyada vətənpərvər gənclərimizin siyasi iradəsi daha çox hiss olunur.
- Qidalanma ilə bağlı vəziyyət necədir? Məlum, hava soyuqdur. Soyuq qış günlərində isti qida verilirmi?
- Qidalanma ilə bağlı heç bir problem yoxdur. Hər iki saatdan bir çay, kofe və digər lazımi təamlar aksiya iştirakçılarına təqdim olunur. Eyni zamanda, burda tibb məntəqəsi fəaliyyət göstərir. Mütəmadi olaraq aksiya iştirakçılarının təzyiqi ölçülür, onlara hər bir tibbi dəstək göstərilir. Aksiya iştirakçılarına lazım olan dərman dərhal verilir. Onu da deyim ki, media mənsubları üçün media çadırı qurulub. Demək olar ki, hər bir aksiya iştirakçısının qayğısı diqqətlə izlənilir və qarşılanır.
Günel CƏLİLOVA
