Fransadan Azərbaycana yönəlik növbəti həyasız ittiham. Fransa Xarici İşlər Nazirliyinin yaydığı bəyanatda Azərbaycan 10 noyabr öhdəliklərinə əməl etməməkdə ittiham olunur:
“Fransa Ermənistanla Dağlıq Qarabağı birləşdirən yolda, giriş dəhlizində nəqliyyatın hərəkətinə maneələrdən təəssüflənir, bildirir ki, bu ciddi humanitar nəticələrə səbəb olub. Paris Dağlıq Qarabağda yaşayan əhalinin hüquqlarına əməl edərək, bölgəyə girişin və təchizatın qeyd-şərtsiz bərpasına çağırır. Azərbaycan Respublikası 9 noyabr 2020-ci il tarixli üçtərəfli bəyannaməyə uyğun olaraq, Laçın dəhlizi vasitəsilə hər iki istiqamətdə adamların, nəqliyyat vasitələrinin və yüklərin təhlükəsiz hərəkətini təmin etməyi öhdəsinə götürüb”.
Qeyd edək ki, Laçın-Xankəndi yolunda etiraz aksiyası keçirən azərbaycanlı ekofəallar lap əvvəldən mülki yüklərin hərəkətinə mane olmurlar. Onların etirazı azərbaycanlı mütəxəssislərin Qarabağdakı mədənlərə buraxılmaması və qanunsuz metal hasilatı nəticəsində Azərbaycan ekologiyasına ziyan dəyməsilə bağlıdır. Erməni tərəfi isə bunu təhrif edərək başqa yöndə təqdim edir. Fransa da ermənidən çox ermənilik edir. Axı həmin 10 noyabr razılaşmasında həm də Naxçıvana maneəsiz gediş-gəlişin təmin olunması öhdəliyi öz əksini tapıb. Maraqlıdır, bəs bu niyə Parisin yadına düşmür?
“Bu, hər zaman olduğu kimi, rəsmi Parisin ənənəvi ermənipərəst siyasətinin davamıdır”
Məsələyə münasibət bildirən politoloq Tural İsmayılovun sözlərinə görə, Fransanın mövqeyi bizim üçün qəbuledilməzdir: “Nəzərə almaq lazımdır ki, Fransa həm 44 günlük Vətən müharibəsinə qədər, həm müharibə dövründə, həm də postmüharibə dövründə birmənalı Ermənistanı dəstəkləyib. Məhz bu yanlış siyasətin nəticəsində Paris Cənubi Qafqazda Azərbaycan kimi önəmli ölkəni itirdi. Baxmayaraq ki, Azərbaycan hər zaman Fransa ilə qarşılıqlı münasibətlərin inkişafında maraqlı olub. Azərbaycan 1997-ci ildə Fransanın ATƏT-in Minsk Qrupunun həmsədri olmasına razılıq verdi. O vaxt ümid edirdik ki, rəsmi Paris ədalətli vasitəçi olacaq. Ancaq Fransa bununla bağlı üzərinə düşən öhdəliklərə əməl etmədi. Əksinə, Ermənistanın təcavüzkar fəaliyyətini görməzdən gəldi. Nəticədə Ermənistan xoşluqla ərazilərin işğalına son qoymadı. Azərbaycan hərb yolu ilə ərazilərini işğaldan azad edəndə yenə həmin Fransa buna qarşı çıxdı. Fransa 10 noyabr 2020-ci ildə imzalanan bəyanatda Ermənistanın üzərinə götürdüyü öhdəlikləri yaxşı bilir. Sadəcə, İrəvanın o öhdəliklərə əməl etməməsini görməzdən gəlir. O baxımdan Fransa Xarici İşlər Nazirliyinin məlum qərəzli bəyanatı təəccüblü deyil. Bu, hər zaman olduğu kimi, rəsmi Parisin ənənəvi ermənipərəst siyasətinin davamıdır. Bununla belə, Fransa Ermənistandan Azərbaycana və Türkiyəyə qarşı təzyiq vasitəsi kimi istifadə edir. Onu da nəzərə almaq lazımdır ki, Fransa türk dünyasının birləşməsinə qarşıdır. Paris istəmir ki, türk dövlətləri kommunikasiya əlaqələrini birləşdirsin. Fransa istəmir ki, Azərbaycanla Türkiyə Avropa ilə Asiyanı birləşdirən qovşaq rolunda çıxış etsin. Ona görə də Fransa məqsədyönlü şəkildə belə qərəzli siyasət yeridir. Bu səbəbdən Fransa İranla birlikdə hərəkət edir. Ona görə də bütün bunlar bir-biri ilə əlaqəlidir. Fransa bu siyasətini davam etdirəcək. O üzdən, biz bir sıra məsələlərə hazır olmalıyıq. Bu hələ son deyil. Cənubi Qafqaz uğrunda geosiyasi mübarizənin daha da güclənəcəyi güman olunur”.
Bir sözlə, politoloq hesab edir ki, Fransadan bundan sonra da ədalətli siyasət gözləməyə dəyməz.
Vidadi ORDAHALLI
