Ermənistan parlamentinin tribunasında hakim “Mülki müqavilə” fraksiyasının deputatı Vigen Xaçatryan bildirib ki, Rusiya Ermənistanı Azərbaycanla müharibəyə çəkmək istəyir:
"Mən əminəm ki, Rusiya bizi Azərbaycanla müharibəyə sürükləmək istəyir. Məncə, Rusiya Qarabağdan əl çəkməyə və bunun müqabilində Ermənistanı Azərbaycandan almağa çalışır. Biz bunu başa düşməli və birbaşa Azərbaycan və tərəfdaşlarımızla danışıqlara başlamalıyıq. Bir daha deyirəm ki, Rusiya bizi müharibəyə sürükləmək istəyir”.
O, həmçinin hesab edir ki, yaranmış vəziyyət Ermənistanın Qarabağla bağlı Rusiyanın mövqeyini bölüşməsi ilə bağlıdır:
“Qərbə üz tutmaq lazımdır. Əcnəbi həmkarlar bizə kömək etsinlər və tələb etsinlər ki, Rusiya ya öz öhdəliklərini yerinə yetirsin, ya da öhdəliklərdən imtina etsin”.
Ermənistandakı hakim fraksiyanın bu mövqeyini nə ilə izah etmək olar?
Politoloq Elşən Mustafayev “Bakı-Xəbər”ə açıqlamasında bildirdi ki,
2022-ci il dekabrın 3-də və 7-də Rusiya sülhməramlı kontingentinin komandanlığı ilə aparılmış müzakirələrin nəticəsi olaraq əlaqədar qurumların mümayəndələri Azərbaycan ərazilərində faydalı qazıntı yataqlarının qanunsuz istismarı, bundan irəli gələn ekoloji və digər fəsadlarla bağlı ilkin monitorinq aparmalı idi: “Lakin sülhməramlıların qanunsuz davranışı ucbatından monitorinq baş tutmayıb. Bundan sonra Azərbaycanın bir qrup ictimai fəalı Laçın yolunda etiraz aksiyası keçirməklə bağlı qərar verdi. Ermənistan rəhbərliyi bundan bərk narahat oldu. Hətta Təhlükəsizlik Şurasının iclasını da çağırdılar. Ermənistan hər zaman ikibaşlı oynayıb. İndi də bu məsələni Rusiyanın üzərinə atmaq istəyir. Əslində bu, diqqəti əsas məsələdən yayındırmaqdır. Bununla görüntü yaradırlar ki, güya ermənilər də Rusiya və sülhməramlılardan narazıdır. Onunla razıyam ki, Rusiya birbaşa təmaslara mane olur. Ancaq Ermənistan heç vaxt belə təmaslar üçün təşəbbüs göstərmir. Əksinə, onlar Rusiya sülhməramlılarının arxasında gizlənib sülh prosesini sabotaj edirlər”.
Elşən Mustafayev hesab edir ki, Ermənistan tərəfi həqiqətən yeni müharibədən qorxursa, sülh prosesi ilə bağlı üzərinə götürdüyü öhdəlikləri mütləq yerinə yetirməlidir: “Bunun üçün separatçıları ərazimizdən çıxarmalıdır. Zəngəzur dəhlizinin işləməsinə maneçilik etməməlidir. Ən əsası isə, bizim sülh sazişi ilə bağlı təklif etdiyimiz 5 prinsipi yerinə yetirməlidir. Bunların heç birini etmədən belə istək nümayiş etdirmək səmimi təsir bağışlamır. Bütün bu açıqlamalar siyasi manipulyasiyadan başqa nəsə deyil. Hakim fraksiya belə düşünürsə, onda Paşinyan onların bu danışıqlarına uyğun addım atsın. Biz bunu görmürüksə, deməli, Ermənistan eyni anda iki stulda oturmaq siyasətini davam etdirir.
Ermənistan da rəsmi olaraq Rusiyanın strateji müttəfiqi hesab olunmaqda davam edir. Hələ də KTMT-nin üzvüdür.
Bu təşəbbüsün özü həm də onu göstərir ki, Aİ Ermənistan-Azərbaycan münaqişəsi və onun nəticələrinin həlli istiqamətində səylərdə vasitəçilik təşəbbüsünü ələ keçirməyə və Rusiyanı bu prosesdən sıxışdırıb çıxarmağa çalışır. Eyni zamanda, Rusiya Qarabağda sülhməramlı missiyasını tam şəkildə yerinə yetirməyə davam edir. Ermənistan rəhbərliyi Qarabağ problemini mahiyyətcə Rusiyanın üzərinə atmağa çalışır. Münaqişə zonasında heç bir öhdəlik daşımayan Qərb faktiki olaraq Ermənistan hakimiyyəti ilə münasibətlərdə ciddi jestlər edir. Ermənistana onlar tərəfindən ayrılan milyardlarla yardım bunun ən bariz nümunəsidir. Bir sözlə, bütün bu addımlar sülh sazişindən yayınmağa, vaxt udmağa və Avropadan qazanc əldə etməyə yönəlib”.
Məhəmmədəli QƏRİBLİ
