Azərbaycan ərazisində mövcud olan separatçı dəstənin və dəstəbaşı Arayik Arutyunyanın, onun quyruğu olan Ruben Vardanyanın oyunbazlığı bitmək bilmir. Gündə bir oyun çıxarıb özlərini məşğul göstərmək istəyirlər. Bilirik ki, separatçılar tərəfindən qanunsuz silahlı dəstələr saxlanılır və o dəstələr də sırf təxribat törətmək üçün bəslənir.
Qarabağda məskunlaşan erməni separatçıları ərazilərimizdə qanunsuz əməllərini davam etdirirlər. Çox təəssüf ki, bu qədər qanunsuz hərəkətlərə dünya susur, laqeyd yanaşır.
Separatçıların Qarabağda həyata keçirdiyi qanunsuz əməllərdən biri də bu günlərdə üzə çıxıb. Azərbaycan mediası separatçıbaşı A.Arutyunyanın saytına istinadən məlumat verir ki, Qarabağdakı erməni separatçılarının "prezidenti" Arayik Arutyunyan azərbaycanlıların Şuşadakı dinc aksiyası ilə əlaqədar “hərbi vəziyyət” elan edib. "Fərman"da Xankəndi-Gorus yolunun guya azərbaycanlılar tərəfindən bağlanması ilə bağlı yalan məlumatlar əksini tapıb.
Qeyd olunur ki, Qarabağ ərazisində sərbəst hərəkət və çıxış, habelə toplantılar və tətillər keçirmək hüququ məhdudlaşdırılıb. Yaranmış vəziyyətlə əlaqədar “dövlət naziri” Vardanyanın rəhbərliyi altında Operativ Qərargah yaradılıb.
Heç şübhəsiz, Xankəndidə "hərbi vəziyyət" elan edilməsi Azərbaycanın suveren ərazilərində özbaşınalıqdır. Bu artıq o deməkdir ki, onlar hər hansı bir sülh prosesində maraqlı deyillər. Eyni zamanda, "hərbi vəziyyət" in elan olunması Qarabağın ərazisində qanunsuz olaraq saxladıqları hərbi birləşmələri qanuniləşdirməyə cəhddir. Bu vəziyyət şəraitində özlərinin qanunsuz hərbi dəstələrini daha da gücləndirmək istəyirlər. Ona görə də Rusiya və digər vasitəçi ölkələr buna biganə qalmamalıdır. Bu "hərbi vəziyyət” başlanmış olan sülh prosesinə mane olur. Həm də bununla onlar Qarabağdakı qanunsuz silahlıları hələ də saxlamaqda maraqlı olduqlarını nümayiş etdirirlər.
“ABŞ-ın, Fransanın, Rusiyanın Qarabağ ermənilərini şirnikləndirən hərəkətləri olmasa, onlar da öz həddlərini bilərlər...”
Məsələyə şərhv verən Azərbaycan Naminə Alyans Partiyasının sədri Abutalıb Səmədov “Bakı-Xəbər”ə bildirdi ki, Qarabağda erməni separatçıları tərəfindən “hərbi vəziyyət” elan olunması onların bugünə qədər apardıqları siyasətin davamıdır: “Qarabağ erməniləri həm Avropa İttifaqının, həm ABŞ-ın, hətta Rusiyanın apardığı sülh danışıqlarını qəbul etmədiklərini dəfələrlə nümayiş etdiriblər və dünya buna səssiz qalıb. Bütün danışıqlarda Azərbayacanın Qarabağ üzərində suverenliyi birmənalı şəkildə qəbul olunub. Bu həm Praqa sənədində öz əksini tapıb, həm də son Soçi görüşünün yekun sənədində Ermənistan, Azərbaycan və Rusiya öz imzaları ilə təsdiqləyiblər. Ancaq Qarabağ erməniləri yenə də bəyan edirlər ki, onlıarın Azərbaycanın tərkibində qalması mümkünsüzdür və Azərbaycanın Qarabağ üzərində suverenliyini qəbul etmirlər. Ermənilər cəzasızlığa adət ediblər. Bu onların sülh prosesini pozmaq, bölgədə gərginliyi artırmaq istiqamətində atdıqları növbəti addımdır. Əmindilər ki, bu addım da cəzasız qalacaq. Əslinə qalsa, Qarabağ ermənilərinin sülh prosesini pozmaq cəhdlərində ən böyük günahkar vasitəçi ölkələr və təşkilatlardır. Bunlar bir tərəfdən Azərbaycanın Qarabağ üzərində suverenliyini qəbul etdiklərini bəyan edirlər, digər tərəfdən Qarabağ ermənilərinin beynəlxalq hüquqa və razılaşmalara zidd olan addımlarına göz yummaqda davam edirlər”.
A.Səmədovun sözlərinə görə, QHT fəallarının, ekologiya təşkilatların etiraz aksiyalarına həm ABŞ Dövlət Deportamentinin, həm Fransa Xarici İşlər Nazirliyinin, həm də Avropa İttifaqının sərgilədiyi münasibət göstərir ki, ikili standartlar siyasəti davam etməkdədir: “Təbiidir ki, bu da Qarabağ ermənilərini cəsarətləndirir və onları bu cür addımlar atmağa sövq edur. Heç kimə sirr deyil ki, Qarabağda Ermənistanın silahlı qüvvələrindən başqa separatçıların özünün də “ordusu” var. Yaxın aylarda hətta həmin “ordu”ya “komandan” da təyin olunub. Onlar bunu gizlətmir. Dünya niyə buna göz yumur? Vasitəçilər niyə buna münasibət bildirmirlər? Bu tamamilə başqa sualdır. Hesab edirəm ki, biz ilk növbədə bu sualın cavabını tapmalıyıq. ABŞ-ın, Fransanın, Rusiyanın Qarabağ ermənilərini şirnikləndirən hərəkətləri olmasa, onlar da öz hədlərini bilərlər və sülh prosesini pozmaq üçün növbəti addımlar atmaqdan çəkinərlər. Ancaq çox təəssüf ki, Qarabağ ermənilərinə hədlərini bildirməli olan güclər hələ ki, onları şirnikləndiurməklə məşğuldur”.
İradə SARIYEVA
