Azərbaycanın qeyri-hökumət təşkilatlarının (QHT) nümayəndələrinin Qarabağda Rusiya sülhməramlılarının müvəqqəti məsuliyyəti zonasında keçirilən etiraz aksiyası ikinci gündür ki, davam edir.
Trend xəbər verir ki, QHT nümayəndələri vətənpərvərlik mahnıları sədaları altında tonqallar yandıraraq aksiyalarını davam etdirirlər. Onlar “Ekoloji terrora son qoyun!” şüarları səsləndirirlər.
Məlumata görə, etirazçıların sayı getdikcə artır. Bakıdan daha bir qrup QHT nümayəndəsi Şuşaya gələrək etiraz aksiyasına qoşulub. Onların sayı artıq 400-500 nəfər təşkil edir.
Bildirilir ki, aksiya iştirakçılarının qarşısını kəsən Rusiya sülhməramlıları artıq başa düşüblər ki, azərbaycanlılar aksiyanı dayandırmayacaqlar. Ona görə də onlar aksiya keçirilən ərazidə modul tipli kazarmalar quraşdırmağa başlayıblar. Yük avtomobilləri vasitəsilə əraziyə gətirilən çadırlar rusiyalı sülhməramlılar tərəfindən qurulur.
Bundan əvvəl Rusiya sülhməramlıları aksiya keçirilən ərazidə modul tipli yataqxanalar quraşdırmağa başlayıb.
“Report” isə xəbər verir ki, aksiya iştirakçılarının təhlükəsizliyini təmin etmək üçün əraziyə Azərbaycan Daxili İşlər Nazirliyi Daxili Qoşunlarının (DQ) hərbçiləri ilə yanaşı, polislər də cəlb edilib. İştirakçılar polislərin əraziyə gəlişini alqışlarla qarşılayıblar.
Aksiya hazırda “Azərbaycan oyaqdır, sərvətinə dayaqdır!”, “Yaşasın Azərbaycan!” şüarları ilə davam edir.
Xəbərdə o da bildirilir ki, Rusiya sülhməramlıları Şuşa-Xankəndi yolunda akisya keçirilən əraziyə əlavə canlı qüvvə cəlb edib.
Xəbərə görə, havanın soyuq olmasına baxmayaraq, aksiya iştirakçıları ərazidə qalmaqda qərarlıdırlar.
Aksiya iştirakçılarının təhlükəsizliyini əraziyə cəlb edilmiş Azərbaycan Daxili İşlər Nazirliyi Daxili Qoşunlarının (DQ) hərbçiləri və polislər yüksək səviyyədə təmin edirlər.
Dilarə Əliyeva adına Azərbaycanın Qadın Hüquqlarını Müdafiə Cəmiyyəti nəzdində fəaliyyət göstərən "Qadın: Sülh və Təhlükəsizlik Mərkəzi"nin rəhbəri Dilarə Əfəndiyeva bildirib ki, aksiyanın azərbaycanlı iştirakçıları erməni əsilli həmvətənlərinə təcili tibbi yardım göstərilməsini asanlaşdırmağa hazırdırlar...
O qeyd edib ki, dinc aksiya iştirakçıları bu insanlara operativ tibbi yardım göstərilməsində maraqlıdırlar: "Ermənistan mətbuatında məlumat yayılır ki, erməni əsilli həmvətənlərimizin tibbi yardıma ehtiyacı var və buna görə onlar aksiyamızın keçirildiyi yol boyu hərəkət edirlər. Mən bir qadın və bir ana kimi Xankəndidə, eləcə də Azərbaycanın digər şəhər və kəndlərindəki Rusiya sülhməramlılarının müvəqqəti məsuliyyət zonasında yaşayan vətəndaşlarımızı əmin edə bilərəm ki, biz dinc aksiyanın təşkilatçıları olaraq bu insanlara operativ tibbi yardım göstərilməsində səmimi şəkildə maraqlıyıq. Ona görə də telefon nömrəmi qoyuram. Mənimlə hər zaman əlaqə saxlaya və xəstələrin daşınması ilə bağlı təşkilati məsələləri müzakirə edə bilərlər. Radikalların və millətçilərin qarşısını almaq cəhdlərinə baxmayaraq, məhz insanlar arasında təmaslar vasitəsilə biz bir daha Azərbaycanda dinc və harmonik birgə yaşayışa qayıdacağıq. Aksiya iştirakçıları adından bildirirəm ki, fərdi avtomobillərin keçməsi üçün lazımi yardımı göstərməyə hazırıq. Aksiyanın özü isə davam etdiriləcək”.
Azərbaycan xalqı bu aksiya ilə birliyini, əzmkarlığını bir daha nümayiş etdirdi.
Bunu isə aksiya iştirakçısı, "Səssiz Dünya" ictimai birliyinin sədri Aidə Səfərova deyib.
"Dünəndən bəri ictimai faəllar QHT nümaynədələri bu aksiayda iştirak edir. Baxmayaraq ki, gecə soyuq oldu, lakin heç kəs buranı tərk etmədi. Şüarlar dünəndən bəri dayanmadan səsləndirilir. Ekoloji terrora son qoyulmasını, ekoloqlarımızın monitorinq keçirməsini tələb edirik. A.Volkov tələblərimizə cavab verməyənə qədər buranı tərk etməyəcəyik. Hətta aksiyanın müddətsiz davam etməsinə belə hazırıq", - deyə o bildirib.
Aksiyada iştirak edən Ekologiya və Təbii Sərvətlər Nazirliyi yanında İctimai Şuranın sədr müavini Nərminə Qəribova isə deyib ki, xaqlımızın gələcəyi üçün bütün təbii sərvətlərimizi qorumalıyıq.
Digər Şura üzvü Amil Məmmədov "Tələblərimizə cavab almayana qədər aksiyanı dayandırmaq fikrində deyilik" deyib. O xatırladıb ki, ötən həftə - cümə günü ətraf mühitin mühafizəsi sahəsində fəaliyyət göstərən 30-a yaxın qeyri-hökumət təşkilatı müraciət imzalayaraq Rusiyanın Azərbaycandakı səfirliyinə təhvil verib.
"Müraciət Rusiya sülhməramlı kontingentinin komandirinə ünvanlanıb. Bu müraciətdə biz general Volkovdan tələb edirik ki, ekoloqlarımıza Qızılbulaq və Dəmirli yataqlarının monitorinqi üçün şərait yaratsın, bu yataqların qanunsuz istismarının ətraf mühit üçün nəticələrini öyrənsin. Təəssüf ki, azərbaycanlı mütəxəssislər Rusiya sülhməramlılarının müşayiəti ilə bu ərazilərə gələndə onların qarşısını separatçılar aldı. Sülhməramlılar buna mane olmadılar. Ona görə də biz bura gəlmək qərarına gəldik. Dünən səhərdən buradayıq. Onların keçid məntəqəsini bağladılar. “Ekoloji terrora son qoyun”, "Azərbaycanın təbii sərvətlərinin qanunsuz istismarına son qoyun" kimi tələb və şüarlarımızı səsləndirməyə başladıq. Dünən (12 dekabr – red.) biz sülhməramlıların komandiri general-mayor Andrey Volkovun da bura gəlməsini və suallarımızı cavablandırmasını tələb etdik. Onun siyasi məsələlər üzrə müavini polkovnik Kovalçuk zabit sözü verərək Volkova xəbər verildiyini dedi və yaxın saatlarda onun bura gələcəyini söylədi. Ancaq artıq ikinci gündür ki, o, bura gəlmədi. Qəribədir ki, o, Azərbaycan ictimaiyyətinin nümayəndələri ilə əlaqə saxlamır. Biz geri çəkilmək fikrində deyilik, bizim konkret tələblərimiz var. Dəqiq cavab almayana qədər bu aksiyanı dayandırmaq fikrində deyilik”, - deyə Məmmədov bildirib.
Qeyd edək ki, Azərbaycanın qeyri-hökumət təşkilatlarının nümayəndələri Rusiya sülhməramlılarının Şuşa şəhəri yaxınlığındakı postu yanında etiraz aksiyası keçirirlər. Onlar azərbaycanlı mütəxəssislərin Azərbaycan yataqlarının qanunsuz istismarı ilə bağlı monitorinq aparmaq üçün əraziyə buraxılmamasına etiraz edirlər.
Xatırladaq ki, 2022-ci il dekabrın 3-də və 7-də Rusiya sülhməramlı kontingentinin komandanlığı ilə keçirilmiş müzakirələrin nəticəsi olaraq, dekabrın 10-da Azərbaycan Respublikası İqtisadiyyat Nazirliyi, Ekologiya və Təbii Sərvətlər Nazirliyi, Əmlak Məsələləri Dövlət Xidməti və “AzerGold” Qapalı Səhmdar Cəmiyyətinin mütəxəssislərindən ibarət heyət faydalı qazıntı yataqlarının qanunsuz istismarı, bundan irəli gələn ekoloji və digər törəmə fəsadlar ilə bağlı ilkin monitorinqə başlamaq üçün Rusiya sülhməramlı kontingentinin müvəqqəti yerləşdiyi Azərbaycan Respublikası ərazilərinə yola düşüb.
Monitorinq zamanı faydalı qazıntı yataqlarına, xüsusilə Qızılbulaq qızıl və Dəmirli mis-molibden yataqlarına yerində baxış və müxtəlif istiqamətlər üzrə monitorinq, əmlakın kadastr uçotunun təşkili, ətraf mühitə, yeraltı və yerüstü su mənbələrinə potensial zərərin və risklərin qiymətləndirilməsi nəzərdə tutulmuşdu. Lakin heyət Rusiya sülhməramlılarının müşayiəti ilə sözügedən yataqların yerləşdiyi ərazilərə gəlsələr də, hər iki istiqamətdə təxribatla üzləşiblər. Beləliklə, nəzərdə tutulan ilkin baxış və monitorinq Rusiya sülhməramlıların nəinki lazımi şərait yaratmaması, əksinə, bu prosesin qəsdən pozulması ssenarisində iştirakına görə baş tutmayıb.
