Azərbaycanlıların Şuşa-Xankəndi yolunda keçirdiyi aksiya ilə bağlı Qarabağdakı qondarma “rus icması”nın sədri Aleksandr Bordov təxribatçı açıqlama ilə çıxış edib.
O bildirib ki, “Dağlıq Qarabağ”da yaşayan soydaşlar öz mülki, siyasi, sosial, iqtisadi və mədəni hüquqlarını həyata keçirməkdə, öz hüquqlarını qorumaqda Rusiyanın dəstəyinə arxalanmaq hüququna malikdirlər. Bordov özünün təxribatçı çıxışında ölkəmizi 10 noyabr Üçtərəfli bəyanatını pozmaqda ittiham edib:
“Təəssüf ki, bizim ciddi problemlərimiz var və bu, ilk növbədə, müharibədən sonrakı reallıqlara aiddir. 10.11.2020-ci il tarixli Üçtərəfli atəşkəs sazişi vaxtaşırı kobud şəkildə pozulur”.
Qeyd edək ki, Azərbaycanda Rus İcması rəsmən qeydiyyatdadır və aktiv də fəaliyyət göstərir. Bu icmanın rəhbəri Mixail Zabelin həm də millət vəkilidir.
O halda belə bir qondarma qurumun adından bəyanat vermək nəyə lazımdır? Qarabağda barmaqla sayılacaq sayda erməni qalıbsa, hansı ruslardan söhbət gedə bilər?
Demokratik Dəyişim Partiyasının sədri Əli Mustafa “Bakı-Xəbər” qəzetinə açıqlamasında bildirdi ki, Qarabağda baş verən hadisələr əslində bizim üçün gözləniləndi: “Biz uzun illərdi deyirik ki, ruslar təxribat törətmək üçün hər şey edirlər. Ənənəvi, klassik rus imperiyası fitnəkarlığını həyata keçirirlər. Yeni bir siyasət yoxdur. Yəqin ki, 3-5 rusu ora köçürüblər. Məqsəd “rus icması” adı ilə onlardan istifadə etməkdir. Bütün hallarda, Rusiya Cənubi Qafqazda mövqelərini qorumaq üçün Qarabağ kartından istifadə edir. Bütün bu addımlar suverenliyə, beynəlxalq qanunlara və normalara, üçtərəfli razılaşmanın müddəalarına ziddir. Amma rus imperiyasının əxlaqına tam uyğundur. Təəccüblü olmasa da, bunun qarşısını almaq lazımdır. Bu icmanın fəaliyyəti və mədənlərin qanunsuz istismarı ilə bağlı BMT-dən tutmuş, bütün nüfuzlu beynəlxalq platformalara müraciət ermək lazımdır. Bu təxribatları bir-birindən ayırmaq lazımdır. Belə təzahürləri ayrı-ayrılıqda zərərsizləşdirmək lazımdır. Ermənilərin bu gedişləri ilə bağlı biz qərbi azərbaycanlılar amilindən istifadə etməliyik. Bu amili gündəmə gətirməməklə böyük yanlışlıq etmiş
oluruq. Həmin soydaşlarımızın Ermənistana qaytarılması məsələsini ortaya qoymalıyıq. Ermənilərin Qarabağdakı varlığını ora bağlamaq lazımdır. Ukraynadakı proseslər Rusiyanı zəiflədir. Buna görə də, onlar regionda qalmalarını hansısa formada rəsmiləşdirməyə çalışır. Bu bəhanəni ona vermək lazım deyil. Amma “rus icması” adı ilə olan maipulyasiyaları ifşa etmək lazımdır. Belə addımlar Rusiya ilə aramızda olan strateji müttəfiqlik razılaşmasına ziddir. Həmin ölkəni mehriban qonşuluq münasibətlərini qorumağa dəvət etməliyik. Orada yaşayan ruslar Azərbaycan vətəndaşı deyilsə, hansısa icma yaratmaq haqları da yoxdur. Qarabağ müstəqil subyekt deyil ki, orada belə qurum yaratmaq legitim sayılsın. Belə adamlar ümumiyyətlə depiort edilməlidir. Azərbaycan öz yurisdiksiyasını bərpa etdikcə, pasport rejimini də həyata keçirəcək. Bizim vətəndaşımız olmayan şəxslərin icazəsi olmadan ərazimizdə yaşamaq hüququ yoxdur. Azərbaycanda rus icması var və onların da mövqeyi bizə bəllidir”.
Məhəmmədəli QƏRİBLİ
