Azərbaycanın qeyri-hökumət təşkilatlarının (QHT) nümayəndələri Şuşada Rusiya sülhməramlılarının postunun yaxınlığında azərbaycanlı mütəxəssislərin yataqların qeyri-qanuni istismarı ilə bağlı monitorinq aparmaq üçün əraziyə buraxılmamalarına qarşı etiraz aksiyası keçirirlər.
Trend-in Şuşaya ezam olunmuş əməkdaşının məlumatına görə, etiraz aksiyasının iştirakçıları çadırlar qururlar. Şuşada Rusiya sülhməramlılarının postu yaxınlığında etiraz aksiyası keçirən Azərbaycanın qeyri-hökumət təşkilatlarının (QHT) nümayəndələri sülhməramlı kontingentin komandanı Andrey Volkovun gəlməsini tələb edirlər.
Məlumata görə, Azərbaycan ərazisində müvəqqəti yerləşdirilmiş Rusiya sülhməramlılarının əraziyə gələn polkovniki azərbaycanlı jurnalistlərin və etirazçıların suallarını cavablandıra bilməyib.
Aksiya iştirakçıları polkovnikin sərxoş olduğunu bildiriblər.
Xəbərdə o da bildirilir ki, Azərbaycan ərazisində müvəqqəti yerləşdirilmiş Rusiya sülhməramlıları əraziyə zirehli hərbi texnika və xeyli sayda canlı qüvvə cəlb ediblər.
Məlumatlarda o da deyilir ki, gətirilən texnikalar arasında modul tipli yataqxanalar da var. Bu yataqxanaların quraşdırlması üçün qaldırıcı kran da əraziyə gətirilib. Sülhməramlılar aksiyanın keçirildiyi ərazidə gücləndirilmiş rejimdə xidmət aparmağa başlayıblar. Aksiyanın gecə də davam edə biləcəyi ehtimalına görə sülhməramlıların bu addımı atdığı bildirilir.
Şuşada aksiya keçirən etirazçılar Laçın dəhlizi üzərində Azərbaycan bayrağını qaldırıb, "Yaşasın Azərbaycan! Yaşasın Azərbaycan bayrağı!", şüarları səsləndiriblər.
Şuşa şəhəri ətrafında Rusiya sülhməramlılarının postunda etiraz aksiyası keçirən Azərbaycanın QHT nümayəndələri dağılışmaq fikrində deyillər. Etirazçılar “sona qədər burada qalacağıq” deyirlər. Onlar sülhməramlı kontingentin komandiri Andrey Volkovun gəlişini tələb edirlər.
“Bu gün bu aksiyanın keçirilməsinin səbəbi mədənlərimizin qanunsuz istismarına son qoyulmasıdır”. Bunu Trend-ə etiraz aksiyasının iştirakçısı Ekologiya və Təbii Sərvətlər Nazirliyi yanında İctimai Şuranın üzvü Arzu Əliyeva deyib.
O qeyd edib ki, ermənilər illər öncə bizim təbii sərvətlərimizi mənimsəyiblər və buna son qoyulmalıdır.
"İstəyirik ki, Rusiya sülhməramlı qüvvələrinin komandanı general-mayor Andrey Volkov buraya gəlsin və bu məsələyə son verilsin. Gələməyənə qədər yolun açılmasından, geri çəkilməyimizdən söhbət belə gedə bilməz", - deyə o əlavə edib.
Aksiya iştirakçısı, hərbi-siyasi ekspert Telman Qasımov isə deyib ki, aksiyanın əsas məqsədlərindən biri Qarabağda təbii sərvətlərimizin, mədənlərimizin ermənilər tərəfindən həm talan olunması, həm də ekologiyamıza vurulan ziyanların qarşısını almaqdır.
"Tələb edirik ki, Rusiya sülhməramlı qüvvələrinin komandanı general-mayor Andrey Volkov buraya gəlsin və cavab versin. Komandan gəlməyənə, sözümüzü deməyənə qədər buradan tərpənməyəcəyik. Artıq burada çadırlar qurulub", - deyə o əlavə edib.
Ekoloji Maarifçilik Monitorinq İctimai Birliyinin rəhbəri Qəmzə Yusubova Rusiya sülhməramlı qüvvələrinin komandanı general-mayor Andrey Volkovdan baş verənlərlə bağlı açıqlamalar istədiklərini deyib. “Səhər saatlarından etibarən aksiya davam edir, lakin Volkov hələ də gəlməyib. Biz də bəyan edirik ki, Volkov gəlib bizim suallarımıza cavab verənə qədər heç bir yerə getməyəcəyik - deyə o əlavə edib.
Qeyd edək ki, 2022-ci il dekabrın 3-də və 7-də Rusiya sülhməramlı kontingentinin komandanlığı ilə keçirilmiş müzakirələrin nəticəsi olaraq, bu gün Azərbaycan Respublikası İqtisadiyyat Nazirliyi, Ekologiya və Təbii Sərvətlər Nazirliyi, Əmlak Məsələləri Dövlət Xidməti və “AzerGold” Qapalı Səhmdar Cəmiyyətinin mütəxəssislərindən ibarət heyət faydalı qazıntı yataqlarının qanunsuz istismarı, bundan irəli gələn ekoloji və digər törəmə fəsadlar ilə bağlı ilkin monitorinqə başlamaq üçün Rusiya sülhməramlı kontingentinin müvəqqəti yerləşdiyi Azərbaycan Respublikası ərazilərinə yola düşüb. Monitorinq zamanı faydalı qazıntı yataqlarına, xüsusilə Qızılbulaq qızıl və Dəmirli mis-molibden yataqlarına yerində baxış və müxtəlif istiqamətlər üzrə monitorinq, əmlakın kadastr uçotunun təşkili, ətraf mühitə, yeraltı və yerüstü su mənbələrinə potensial zərərin və risklərin qiymətləndirilməsi nəzərdə tutulmuşdu. Lakin heyət Rusiya sülhməramlılarının müşayiəti ilə sözügedən yataqların yerləşdiyi ərazilərə gəlsələr də, hər iki istiqamətdə təxribatla üzləşiblər. Beləliklə, nəzərdə tutulan ilkin baxış və monitorinq Rusiya sülhməramlıların nəinki lazımi şərait yaratmaması, əksinə, bu prosesin qəsdən pozulması ssenarisində iştirakına görə baş tutmayıb.
