ABŞ Nümayəndələr Palatası ermənipərəst konqresmenlər tərəfindən 2023-cü maliyyə ili üzrə ölkənin müdafiə büdcəsi layihəsinə təklif olunan Azərbaycan əleyhinə düzəlişləri qəbul etməyib.
Belə ki, 858 milyard dollarlıq müdafiə büdcəsini ehtiva edən Milli Müdafiə Səlahiyyət Qanunu (NDAA) layihəsinə 350 nəfər səs verib.
Ermənpərəst konqresmenlər - demokratlardan Adam Şiff, Frenk Pallone, Cudi Çu və respublikaçılardan Qas Bilirakis sənədin əleyhinə səs veriblər. Mövcud qaydalara əsasən, qanun layihəsi ABŞ Senatında da səsverməyə çıxarılaraq qəbul edilməli və daha sonra imzalanmaq üçün Prezidentə təqdim olunmalıdır.
Qeyd edək ki, 2023-cü maliyyə ili üzrə ölkənin müdafiə büdcəsi layihəsinə ermənipərəst demokrat konqresmenlərdən Robert Menendes və Aleks Padila tərəfindən iki, Ceki Şpeyer, Frenk Pallone, Adam Şiff və Toni Kardenas tərəfindən isə 5 düzəliş təklif olunmuşdu. Onlardan 682 və 724 saylı düzəlişlər ABŞ-ın Azərbaycana yardımlarına qadağa qoyulmasını özündə ehtiva edirdi.
“ABŞ 2021-ci ildə Əfqanıstanı tərk edəndə erməni lobbisində belə əminlik yaranmışdı ki...”
Məsələyə münasibət bildirən Yeni Yol Partiyasının sədri Ramil Hüseynovun fikrincə, bütün bunlar Azərbaycanın artan önəmindən xəbər verir: “Məlum olduğu kimi, Birləşmiş Ştatlar 2000-ci illərin əvvəllərindən dövlət səviyyəsində Azərbaycana yardım edir. Əfqanıstanda başlayan hərbi əməliyyatlar Azərbaycan üzərindən yüklərin daşınması zərurətini yaratdı. Azərbaycan antiterror koalisiyasına qoşulduğu üçün Əfqanıstanda sülhyaratma əməliyyatlarında iştirak edirdi. Bu səbəbdən 2002-ci ildən Azərbaycana dövlət yardımını qadağan edən 907-ci Düzəliş donduruldu. İndi olduğu kimi, o vaxt da ABŞ-dakı erməni lobbisi bütün vasitələrlə bunu əngəlləməyə çalışdı, amma prezident Corc Buşun adminstrasiyası buna imkan vermədi. Eyni zamanda, Azərbaycanda neft hasilatı ilə məşğul olan Qərbin böyük şirkətlərinin də bunda müəyyən rolu oldu. ABŞ 2021-ci ildə Əfqanıstanı tərk edəndə erməni lobbisində belə əminlik yaranmışdı ki, artıq Azərbaycana ehtiyac qalmadığı üçün Vaşinqton bu məsələyə yenidən baxacaq. Yəni Azərbaycana dövlət yardımını qadağan edən 907-ci Düzəliş dondurulmayacaq. Üstəlik, erməni lobbisi 44 günlük Vətən müharibəsi ilə əlaqədar Azərbaycana qarşı böyük şou təşkil etmişdi. Guya ki, Qarabağda etnik ermənilər genosidə məruz qalır və s. Ancaq bunların heç biri işə yaramadı. Bəlli oldu ki, Əfqanıstandan sonra Azərbaycanın önəmi nəinki azalıb, əksinə, daha da artıb. Regionda İranın artan destruktiv, aqressiv siyasətinə qarşı Azərbaycana əvvəlkindən daha çox dəstək verilməsinə ehtiyac var. Bununla belə, Avropaya qaz ixracının artması da Azərbaycanın önəminə müsbət təsir edir. Bir sözlə, erməni lobbisinin konyunktur maraqları ABŞ-ın dövlət maraqlarından öndə ola bilməz”.
Vidadi ORDAHALLI
