Azərbaycan əleyhinə daim qərəzli fəaliyyəti və qərarları ilə yaxşı tanınan Avropa Parlamentinin korrupsiya, rüşvət mənbəyi olması barədə illərdir ölkəmizdə səslənən fikirlər artıq faktiki təsdiqini tapmaqdadır. Artıq məlumat verildiyi kimi, Avropa Parlamentinin sədr müavini Eva Kayli Belçikanın paytaxtı Brüsseldə cari dünya çempionatı ilə əlaqəli korrupsiya işi ilə bağlı saxlanılıb.
Qeyd edək ki, daha öncə Belçika prokurorluğu polisin böyük xüsusi əməliyyat keçirməsi, bu əməliyyat zamanı keçmiş Avropa Parlamentinin deputatı və Beynəlxalq Həmkarlar İttifaqları Konfederasiyasının prezidenti də daxil olmaqla 4 nəfərin saxlanılması barədə məlumat yaymışdı. Onlar da dünya çempionatının keçirilməsi ilə bağlı korrupsiyada və Qətərin maraqları üçün lobbiçilikdə şübhəli bilinirlər. ABŞ-ın “Politico” nəşri yazır ki, axtarışlar nəticəsində polis təxminən 600 min avro nağd pul aşkarlayıb. Belçika prokurorluğu saxlanılanların hamısının adlarını açıqlamasa da, Belçikanın “Le Soir” qəzeti yazır ki, əsas şübhəlilərdən biri məhz Avropa Parlamentinin vitse-prezidenti, Yunanıstanın PASOK sosialist partiyasının üzvü Eva Kaylidir. Yunan mətbuatı artıq Kaylinin korrupsiya iddialarına görə partiyadan qovulması ilə bağlı bəyanat yayıb. Məlumatlarda qeyd olunur ki, Qətərin əmək naziri ilə görüşdə Eva Kayli Qətərdə Olimpiya obyektlərinin tikintisi zamanı işçilərin hüquqlarının pozulması ilə bağlı beynəlxalq qurumların çoxsaylı bəyanatlarına baxmayaraq, Qətəri “işçilərin hüquqları baxımından lider ölkə” adlandırıb. Belçikanın digər nəşri “Knack” yazır ki, ölkənin federal prokurorluğu iyul ayından Avropa Parlamentində mümkün korrupsiya faktlarını araşdırır. Nəşr son hadisələrlə bağlı 16 evdə axtarış aparıldığını vurğulayır. Reydlər, deputatlarla yanaşı, Avropa Parlamentinin qanunvericiləri üçün işləyən köməkçiləri də əhatə edir. Avropa Parlamentinə 27 ölkədən seçilmiş 705 nəfərdən hər birinin köməkçiləri var. Kaylinin “F.G” adlandırdığı köməkçisi də saxlanılanlar sırasındadır. O, əvvəllər İtaliya parlamentinin deputatı Pier Antonio Panzeri üçün işləyib. Prokurorluğun sözçüsü Erik van Duijs deyib ki, idarə “Fars körfəzi dövlətlərindən birini” Avropa Parlamentinin iqtisadi və siyasi qərarlarına təsir etmək cəhdində, xüsusən də rüşvət alma və rüşvət verməkdə şübhələnir. Həmçinin KİV-in məlumatına görə, saxlanılanlar arasında Beynəlxalq Həmkarlar İttifaqları Konfederasiyasının baş katibi Luka Visentini və İtaliyadan keçmiş Avropa Parlamentinin deputatı Pier Antonio Panzeri də var. Mütəxəssislərin fikrincə, çoxsaylı insan haqları pozuntusunda ittiham olunan Qətər hakimiyyəti üçün hazırda ölkənin müsbət imicini formalaşdırmaq çox vacib məsələdir. Bununla yanaşı ekspertlər onu da qeyd edirlər ki, Rusiyanın Ukraynaya təcavüzündən sonra başlayan “qaz müharibəsi” fonunda Avropa rəsmiləri də dünyanın əsas qaz istehsalçılarından biri olan Qətərlə yaxşı münasibətlərdə maraqlıdır. Bu fonda onlar rüşvət almaq imkanlarından da maksimal şəkildə yararlanırlar. Özü də rüşvət müxtəlif ölkə və dairələrdən alınır. Məsələn, elə Kayli özü Avropada fəaliyyət göstərən erməni lobbi qrupları ilə də sıx əməkdaşlıq edib. Məsələn, 2021-ci il noyabrın 19-da Avropa Parlamentində Azərbaycan əleyhinə qəbul edilən bəyanatda erməni diasporunun rüşvəti ciddi rol oynayıb. Həmin sənəd Avropa Parlamentinin adından elan edilsə də, bəyanatı yalnız 33 nəfər parlament üzvü imzalayıb. Həmin 33 nəfər isə Avropa Parlamentində təmsil olunan “Ermənistanla dostluq qrupu”nun üzvləridir. Bəyanatın hazırlanmasında və qəbul etdirilməsində Lukas Furlas, Lefteris Xristofor, Lars Patrik Berq ilə yanaşı, yunan deputat Eva Kayli də xüsusi aktivlik göstərmişdi. Avropa Parlamenti üzvlərinin hazırladıqları bu bəyanat Avropa Erməni Milli Komitəsi, həmçinin, “Ədalət və Demokratiya Naminə Ümumavropa Erməni Federasiyası” ilə əmkdaşlıq nəticəsində ortaya çıxıb. Yəni həmin erməni qruplarından “Ermənistanla dostluq qrupu”nun üzvlərinə yaxşıca rüşvət verilib.
Ümumiyyətlə, bir sıra Avropa ölkələrində kifayət qədər siyasi korrupsiya faktları mövcuddur. Məsələn, Fransa parlamentində olan zəngin erməni diasporu ölkənin siyasi qərarlarına öz təzyiq və təsirini rüşvətlə göstərir. Bəzi Avropa banklarında məhz siyasi elitanı ələ almaq üçün müəyyən vəsaitlərin aşkarlandığı barədə də məlumatlar var. Avropada korrupsiya bataqlığında olan nüfuzlu medianı da unutmaq olmaz. Hazırda baş verən olayların üzərindən sükutla keçmək onların üzərindəki ciddi şübhələri daha da artırır. Avropa Parlamentinə gəlincə, onun fəaliyyətinə müxtəlif lobbi qrupları getdikcə daha çox təsir edir və bu zaman rüşvət faktı ön planda yer alır. Bunu Almaniyadan olan “Yaşıllar fraksiyası”nın rəhbəri Rebekka Harms da etiraf edir. Bir müddət əvvəl o, müsahibəsində qeyd edib ki, Avropa Parlamenti Avropaya birbaşa aidiyyəti olmayan mövzuları daha çox müzakirə edir. Avropa xalqları üçün zəruri olan məsələlərə isə kifayət qədər yer ayırmır: “Avropa Parlamentinin gündəliyini lobbi qrupları formalaşdırır. Hər kəs öz marağını təmin etməyə çalışır”. Rebekka Harms Avropa Parlamentinin lobbi qruplarının paliqonuna çevrilməsindən narahatlığını ifadə edib. Bütün bunlar Avropa Parlamentinin anti-Azərbaycan mövqeyinin əsl mahiyytini də ifşa edir.
Nahid SALAYEV
